《大士爺厚火氣》第三集：尾溜

台語文學

「欲下願就愛講予明，講『觀音大士在上，請受弟子李明窗一拜……』愛誠心誠意啦！」阿媽有指示。

「知啦！」挩窗有夠煩，目睭擘金，相著空中的牌匾，頂頭寫「慈悲普濟」。伊感覺怪奇，彼个字「悲」頂頭的「非」，寫甲若潦草的「飛」，袂輸欲飛起來！挩窗閣看落來，掣一趒，叫一聲：「啊！有鬼啊！有鬼啊！」

「囡仔人有耳無喙！啥物鬼啦！」阿媽共睨。

「你看，伊的面是青色的，頭殼額閣插兩支角，目睭橫霸霸，彼毋是鬼！是啥？」挩窗驚甲倒退後，慄慄掣：「彼隻鬼喙齒利利，舌吐長長，紅紅袂輸蜈蚣，有夠恐怖啦！」挩窗共香擲予阿媽，覕尻川䫌後壁。

「戇囡仔，自你出世我就偝你來拜大士爺伯，你就看過遐濟擺啊！閣會驚！咱民雄往過叫「打貓」，聽講古早的七月時仔，街仔會反冷風、罩烏陰，鬼王就走來為非做歹、𧿬踏地方。好佳哉，觀音大士慈悲為懷，收服鬼王，打貓街仔才平靜落來……免驚啦！鬼王是來扞普渡的頭，會共好兄弟管理甲好勢啊好勢！」阿媽共挩窗的頭挲挲咧。

「我看伊面遐歹，手閣夯旗仔，敢若你夯箠仔欲來共我摃啦！」挩窗硞硞搝阿媽的褲頭。

「啥物！你共我當做鬼！莫搝啦！我的褲欲予你遛落來啊！」阿媽直直攏褲。