【台北百萬遍】陰沉風箏／烏陰風吹

【華文】

【台文】

烏陰風吹（oo-im hong-tshue）

1.

連紲落兩禮拜的冷雨，台北的天頂袂輸鐵枋，硩踮心情的肩胛頭，淺拖仔強欲擔袂起來矣。

伊敲電話喊伊的好朋友，風吹- -ê，駛車載伊離開這个烏陰澹漉的城市。

快車落南，行踮高速公路，風吹- -ê的技術實在一流，掠過這台、剪過彼隻，車phe甲真扭掠。

就是欲離開台北。

2.

拄起頭，山擋踮面頭前，車就軁對磅空去，軁過一空閣一空。

來到都市的邊仔角，人講郊區的所在，大樓若竹仔插懸懸，閣有一排一排的販厝，透天的別莊咬山坪⋯⋯交流道來相接，嘛共車輛牽起來。

這條路就來擋車。

檔仔小含一下，窗外的景緻就勻勻來行。

淺拖仔去看崎仔的菅芒，白茫茫，隨風寬寬仔咧搖。

3.

快車載淺拖仔離開台北，愈駛愈緊，愈離愈遠。

路途行一睏仔，猶原是貼烏陰，天頂彼塊鐵枋毋知是欲落雨的烏雲？或者是雲積甲傷厚紲來落重色？

風吹- -ê才無咧插遐濟，橫直，油門催咧就衝，欲衝破頭前彼塊鐵枋。

淺拖仔共音響捘開，人放予懶屍，雙手夯起來予頭架佇咧相扯的指頭仔頂，綴旋律來唱陳昇的歌：

「我是一隻愛耍閣自由的風吹，逐工予你掛心煩惱⋯⋯」

4.

歌唱咧唱咧，天煞來開一縫，有光旋入來。

風吹- -ê看著隨講：「淺拖仔你看，咱車愈行天開愈大縫⋯⋯你看，咱倒手爿的雲破去矣⋯⋯台北遐歹天，我毋知偌久無看著天清清啊啦！」

看著天開開，淺拖仔的心情嘛拍開，伊頭圇出去，共面頭前的光景看予斟酌。

雲，可比一塊裂破的布，勻勻仔搝去，一絲一絲、一條一條，毋甘離開。

日頭去予閘咧，按後壁炤，旋去的光若愛耍的囡仔，佇雲去予裂去的布尾遐𨑨迌、跤溜，染一款笑黃、粉紅濫摻變化的柑仔色。

5.

猶未共台北紮來的烏陰澹漉抨掉，風吹- -ê共油門催盡磅。

淺拖仔眼著，天愈來愈開，雲退去邊仔，零星零星，和下跤面愈來愈低、成做汫色線條的山陵愈來愈成。

敢若對同啊對同。

就佇這个時陣，雲內底發一粒白光，孵卵彼款，日頭就欲出來矣。

淺拖仔精神隨來，等待雲破日出的時陣。

車就來入磅空，一站烏暗和關禁的車聲。

車隨時出磅空，佇雲內底孵白光的日頭，就欲出來矣。

車閣來入磅空。

車隨時出磅空。

日頭按雲內底躘出來，大自由。

光真鑿目，淺拖仔用手去閘，煞看著頭前的車反射日頭光，一台車揹一粒日頭。

高速公路頂面，有幾十粒的日頭咧行。

6.

台北的烏陰就予淺拖仔擲㧒捔矣。

雲消退，天開開開，日頭統治了一切。

淺拖仔就看著遠兜的山，遐爾清，遐爾明。

一陵一陵，一鉼一鉼，一重一重，重重疊疊。

延伸閱讀：

【台北百萬遍】奢侈貧窮／奢華散赤

【台北百萬遍】抑鬱妄想／鬱卒譀想

【台語好日子・台北百萬遍】佮淺拖仔來拋拋走

編輯：宅編