【公路電影】200號公路
▲路旁聰和烏豬杰相招出去𨑨迌，兩人駛著彼台銅管仔車就來起行。行規早仔，兩人攏恬恬。一直到油欲無矣，揣著加油站，才來講話：
聰：烏豬--ê，你車後斗囥彼橐（lok）是啥物碗糕？
杰：你有看著喔。
聰：一粒遐大丸敢若炸彈呢，曷毋是目潲無漿泔。
杰：喔。
聰：彼啥潲啦？
杰：嘛無啥，有路用的時陣就知啦！
▲ 油加滇，車就來行。
杰：頭拄仔彼个妹仔扭（gió）喔！
聰：伊共我捽目尾，你有看著無？
杰：看著鬼啦！伊是提發票予你啦！痴哥！
聰：有就有啦！笑咪咪真迷人！
杰：你想傷濟啊啦！
聰：無咱轉去問伊？
▲ 烏豬杰無應話，車就按呢繼續行，行三、四點鐘，景緻全無變化。
聰：這光景袂䆀喔，有氣質。
杰：啥物有氣質！我看袂出來氣質佇佗？
聰：橫直就是有氣質啦！
杰：哼！自離開加油站，你就睏甲鼾鼾叫，怎有佇咧看？無你佇咧陷眠啊！
聰：我就是有看著啦！就算佇夢內底，嘛是有氣質。
杰：哼！哼！硬諍⋯⋯著啦！腹肚枵矣！來食暗啦！
▲ 兩人就來勻勻仔行，斟酌看路邊有食的無⋯⋯
聰：彼个妹仔對我笑咧！
杰：騙痟--ê，你是枵甲起痟矣啦！路兩爿空lo-lo，怎有妹仔？
聰：就有啊！閣真肉感，媠噹噹！
杰：你閣佇咧陷眠sioh！
聰：有啦！有啦！你看！
▲路旁聰就共檳榔盒頂頭的媠姑娘仔圖扲出來，烏豬杰去予騙去，氣一下去共𢼌（pa）頭，一个無張持，handel扞無好勢，車頭偏去，歪去路面邊仔，挵入去林投欉，車就來衝煙。
杰：攏你害的啦！車顧路矣！
聰：是你䆀才，駛車技術爛，閣怪我！
杰：啥講你欲騙我！媠姑娘仔無咧笑啦！
聰：好啦！好啦！莫閣共我戮（lak）啦！緊叫修理車的來啦！
▲ 烏豬杰敲電話，一通一通問，上緊的來到位，愛半工。
聰：彼毋就明仔早拍殕仔光才會來！
杰：無法度，逐間烏手的攏講：恁哪會去遐？鬼才會去！
聰：不過是出來流流--ê爾爾，咱走來遮是啥物碗糕所在啊？
杰：就兩百號公路啊！連GPS，𤆬路機嘛揣無，locate霧嗄嗄啦！
聰：按呢欲按怎⋯⋯姑不將就來等囉⋯⋯我腹肚枵甲欲死啦！
杰：拄起行的時陣你問東問西，這馬有路用啊！
▲ 烏豬杰就共車後斗拍開，共彼袋大橐仔𢯾（mooh）出來，閣有火炭、火種、網仔、架仔。
聰：你是當做欲出來烘肉喔！攢遮的家私頭仔創啥？
杰：就透早去踅菜市仔，雄雄想著的。
聰：阿娘喂！這橐是豬頭！正正是豬頭！你豬頭啊！你起痟矣啦！
杰：咱就那𠞭（liô）豬頭皮、那烘肉，這滋味百面讚！
聰：閣有這步？我真正予你拍敗！
杰：行，咱來去烘肉。
▲ 兩人就行到海沙埔起火，風真透，攏免擛火，火就旺旺燒。
聰：喂！烏豬--ê，我閣看著媠姑娘矣，對我肉文仔笑。
杰：莫共我驚啦！林投姐sioh！我驚鬼啦！
聰：毋是，你看海面，夕陽就欲落海矣，染五彩。
杰：你是咧譀想喔！莫閣提檳榔盒仔來共我騙啦！
聰：有影啦！你心肝頭有啥，彼个落海的夕陽就會為你照出啥。
杰：敢有影？
聰：有欠的人就有影。
杰：好，我來斟酌看。
▲ 火炭燒甲紅貢貢，兩人無去烘豬頭皮，先繩（tsîn），繩寬寬仔落海的夕陽，到海面的浮光攏去予𠞭（liô）了了矣，天地暗漠漠。 ▲ 兩人仝時間越頭看後壁，因為有光炤來，炤過海沙埔、炤過林投仔樹。彼的光，毋是來救援的光，毋是路旁的光，毋是人的光──是切袂化、禁袂掉，自路起行就有的光光光。 【完】
分享至
成為作者繼續創作的動力吧！
鄭順聰的沙龍 的其他內容
- 【元宵鬼談】不滅的天燈
- 【台北百萬遍】永康街醉生夢死（詩） 顏色歡欣跳舞
- 【台北百萬遍】賀年詞
- 【台北百萬遍】永康街醉生夢死（三）心酸敢有聲音？
- 【台北百萬遍】永康街醉生夢死（二）人生敢是了然？
- 【台北百萬遍】永康街醉生夢死（一） 稀微敢有藥醫？
你可能也想看
- 「天天秋嗨嗨」：vocus 秋季徵文，五大主題 & 獎品登場！
- 11/20 NVDA財報前Preview, 財報前股價波動走勢觀察
- 維持皮膚健康與活力｜6款超人氣保濕、舒緩敏感化妝水評比
- 200字的今天｜外婆ㄟ手路菜
- 因为一场失恋，我暴走了200公里（2）
- 因为一场失恋，我暴走了200公里（1）
- 2009 台灣電影 金門【夏天協奏曲 Summer Times】我不是過客，我不會讓另一隻夫妻魚死的 (張睿家 林逸欣 林美秀 康丁 李嘉文)
- 2009大陸電影【風聲 The Message】我相信，愛我的人會明白我的心情 (周迅 李冰冰 張涵予 黃曉明 蘇有朋)
- 2004韓國電影【跆拳對決 Spin Kick 迴旋踢】我想改變，請讓我打到最後(玄彬 金烱完)
- 2006韓國電影【醜女大翻身 미녀는 괴로워 200 Pounds Beauty】我想你，漢娜 (金亞中 朱鎮模)
發表回應
成為會員 後即可發表留言
© 2024 vocus All rights reserved.