當首爾仍是叫漢城的那些年（拾肆）

1993年春，UCLA Campus 某 common room。

「嘩！好正呀！我鍾意呀！」Bridgette，金髮藍眼俏鬼妹。「你下次可唔可以帶埋我去呀？」

「好，冇問題呀！」我答。心諗：你咁靚女，梗冇問題㗎。

突然間，背後響起一把熟悉、但係比平日高咗兩個 key 嘅姣屍扽篤作狀聲：「BB! BB 原來你喺呢度呀！」聲音主人係 Colette，棕髮綠眼俏鬼妹；佢從後面熊抱坐喺梳化同人傾緊偈嘅我，然後錫咗我一啖。

「BB 我好掛住你呀！錫錫！Muuuuuuahhh!」一個平日斯文淡定大方得體嘅女人使出絕殺，所為只有一件事。「BB 你今日有冇掛住我呀？你今朝出門口唔記得錫我呀！快啲補返先！」

「唔……下次啦，實有機會嘅！唔阻你哋喇，我走先！」訕訕嘅 Bridgette 接咗半招之後，認為唔值得為咗我同眼前呢隻嗲利互片，決定走先。

「Bye Bridgette!」Colette 好大聲咁送走眼前「敵人」後，細細聲講：「八婆！想溝我條仔！哼！」

佢然後笑笑口望住我：「How did I do?」

「Absofuckinglutely awesome……」親眼睇完呢段 NatGeo 動物求偶生態奇觀之後嘅我，唔知好嬲定好笑。

1997 年嘅韓國，想識個韓妹女朋友，易過唱散紙搭巴士。

我唔係想喺呢度嘩眾取寵，或者刺激你哋嘅神經，但呢個係實情。喺嗰個年代（或者以前）嘅韓國有個怪現象，就係適齡嘅男女各有各嘅社交圈子，男仔同男仔去打機打波劈酒叫雞，女仔同女仔就著到靚靚咁手牽手去 shopping，兩者河水不犯井水。

點解會咁呢？呢個同習俗有關。韓國男女到咗適婚年齡，父母就會透過「相親」介紹對象俾子女。呢種相睇嘅習俗係一種不可抗力，即係煮到埋嚟就要食，不得作無謂反抗。否則親身上演一齣無癌版嘅《藍色生死戀》或者《天國的雞批》，搞完場大龍鳳結果都係要娶/嫁老母幫你搵嗰件而唔係阿靜書或者誠俊哥，就自己攞嚟冇癮。

男仔一般喺呢啲情況下會行放任政策，有得玩就玩，有需要就去叫雞。女仔呢，可能係出於對戀愛嘅好奇心比男仔強烈，佢哋往往都會想試吓拍拖嘅感覺（都有可能係食過返尋味）。喺呢啲時候，我哋呢啲喺韓國生活嘅外國男仔就係好好嘅試驗對象。好多時，身邊嘅女性朋友，就算唔自己嚟，都會介紹俾啲姊妹們；肥水不流別人田。

兩年幾三年嘅韓國生活，總共有六個/次女性朋友嘗試介紹佢哋啲姊妹們俾我認識，當中起碼有四次，我認為對方係個靚女。至於呢類「有情人」結果係終成眷屬定係一鑊熟，嘿！咁容易可以開花結果的話，呢個世界仲邊有咁多韓劇韓片你哋睇。

聽我啲朋友講，呢種有女冇仔溝嘅情況喺亞洲金融風暴後已經有所改變；廿年後嘅今日我諗未必再有雷同情況發生。

星期日午飯時間，梨泰院某樓上英式酒吧。

呢間嘢聽聞有全漢城最好食嘅燒雞三文治，係 Kirsty 堅持每個星期日返完教會都要嚟食晏嘅地方。

「Alan 你有冇女朋友㗎？」首先發難嘅係 Sunnie，餐都未點就嚟料。

「係啦，有冇呀？」附和嘅係 Sarah。

「係喎，冇聽你提過嘅？」呢個係 Sammi。以上三人女子組合稱為「3S」，來自同一間大學同系嘅二年生，係我哋教會嘅最活躍份子之一。

「你哋可以慳返啖氣，Alan 有個法國妹女朋友㗎。」Kirsty 負責玩踢爆。

「哦？佢喺唔喺韓國㗎？唔緊要啦，識多個朋友都好㗎！」Sunnie 死心不息。可以肯定嘅係，另一邊托佢介紹嗰個好趕住溝仔。

「咁識多個識朋友我又唔介意嘅……」我今日食三文治，冇飯 lur，否則我唔介意 lur 飯應；當然，我都有我嘅矜持，唔會隨便展現我嘅猴擒。

「我話俾 Colette 知！」Kirsty 出絕殺，但其實佢唔識 Colette。

不過都唔使識，佢撻個躲我個心已經沉咗一半。講真，我唔擔心 Kirsty 走去同 Colette 踢爆我。就算真係俾 Colette 知道我識女仔，我認識嘅 Colette 根本就唔會當係咩一回事。六年時間，呢啲小風波你估我哋真係未遇過咩，把持得住就冇事發生，把持唔住嘅，都唔使恨啦講真。

我個心沉咗一半嘅原因，就係我仍然搞唔清楚我同佢嘅關係；佢嗰句口頭禪，飄洋過海嚟到韓國之後，由原本冇乜威力，變得好有殺傷力。以前晚晚攬住佢瞓，佢講呢啲我可以當唱歌；但係而家佢唔喺我身邊，呢句「我哋分咗手㗎喇」就變成一種有殺傷力嘅空虛感；我越嚟越唔喜歡呢種情況。

由細到大我都好怕人多嘅地方，一俾人群圍住我就有種講唔出嘅孤獨感覺，因為我知道我唔係屬於人群嘅一份子。喺我廿幾年嘅日子裡面，冇嘢俾我嘅感覺，比起一個人獨處喺一個成千萬人口嘅城市更加孤單，如果呢個時候我感受唔到 Colette 起碼係 mentally 喺我身邊的話，我未必可以再支撐落去。

以上說話由一個男仔講出嚟，聽落係好懦弱，但確實反映當時嘅實情；畢竟，我哋喺埋一齊嘅時間太耐喇。當你同另外一個人一齊生活得太耐，你會開始失去單獨生活嘅能力。

「喂！唔好發夢住，咁你想唔想識朋友㗎？」Sunnie 並未就此收手，可見佢背後應該俾人捽到甩皮。

「好呀！約佢出嚟飲咖啡囉！」我唔慣喺人前暴露自己嘅弱點，即使人哋未必為意；所以我反客為主。

傾吓講吓，一餐晏食到成三點。Sunnie 話約好之後會 call 我；坦白講，我唔係太在乎。識女仔好講 timing，好明顯呢期唔係好時機。

飯後，四個女人話去 shopping，我當然係搵位閃。唔係太鍾意留喺梨泰院呢個劏客區，我行返出三角地（ 삼각지 ），準備搭巴士出光化門轉車返高陽。（當年綠莎坪、梨泰院仲未有地鐵）

夜晚，循例去網吧上網；開 ICQ，Colette 已經喺度。如無意外，今晚晚餐宵夜都會喺網吧對住個 ICQ 食。而我幾乎肯定，喺太平洋嘅另外一邊，Colette 都準備好 pizza 之類嘅兩餐，同我一齊隔住個mon渡週日。

試問咁樣嘅兩隻 geek 唔喺埋一齊的話仲可以點？