編輯嚴選

當首爾仍是叫漢城的那些年（肆拾肆）

人生，係一段充滿未知之數嘅歷程；正因為呢種「未可預期」嘅特性，令到人生充滿趣味。

幾個月前，我仲係同 Colette 如膠似漆咁喺漢城遊歷；如今，伴隨喺我身邊嘅已經變為 Chloe。地方冇變，變嘅係人。

（我老婆按：講到咁好聽，係你變心啫，衰佬！）

1998 年 1 月中某個星期五。

「你好嘢呀你，有異性冇人性；」電話裏面傳嚟 Colette 嘅聲音。「有新女朋友就將我忘記得一乾二淨，等我孤零零一個人，自己食 pizza 同睇帶過聖誕。」

「Mademoiselle Colette，我知你已經好努力，」我好鎮定咁答。「但係扮可憐搏同情真係唔係你強項，算把啦你；我估你聖誕返咗 LA 陪媽媽。」

「妖！你𠱁吓我唔得嘅，係都要玩踢爆！人哋失戀你都唔讓吓我！妖！妖！」佢真係講廣東話係咁妖我㗎！

「妖！我夠失戀咯，仲係俾你個死婆飛𠻹呀！你知唔知我幾傷心幾可憐呀！All by myself. Don’t want to be, all by myself anymore…」我唱埋出嚟。

「妖！慳啲啦仆街！呢頭失戀，嗰頭就拖住個靚靚韓國小姐過聖誕啦！我返 LA，仲俾媽媽問到我口啞啞，話點解你唔返嚟陪我過聖誕呀！妖！」一個鬼妹廣東話英文夾雜咁一輪嘴講嘢，其實幾 cute 嘅。

「咁你點答呀？」我擔心佢阿媽會拆咗我間屋。

「冇呀，話你冇時間囉，唔想解釋咁多。」佢聲線無奈；無計，嗌分手嗰個係佢，我愛莫能助。

「咁都啱嘅……」唔係咁可以點？

「你呀，識咗新女朋友，就對人好啲喇；」Colette 好似我阿媽上咗身咁，喺度教訓我。「唔好仲係咁冇心肝，唔係個個都好似我咁，咁就得你㗎！」

「我有幾冇心肝呀？你又點就得我呀？」我唔服氣；咁多年你個死婆有幾何會就吓我！

「妖！成三個星期，你電話都冇個打俾我呀！你話呢？Heartless little shit! 我咁都仲會打俾你，睇吓你死得未呀！你話呢？Heartless little shit!」佢大聲到我要拎開啲個電話。

法官大人，我冇嘢問喇。

下晝兩點幾，Chloe 已經入咗嚟高陽。睇嚟佢逢星期五都將佢要教嘅堂，安排晒喺其他時間，以便下晝入嚟陪我，開始我哋個 weekend。

我女朋友咁熱衷陪我，我當然好開心；但我亦有少少擔心，佢會唔會掛住陪我，連正經嘢都冇心機做？但都係嗰句，除非我真係察覺到有唔妥，否則我都係選擇信任我女朋友嘅判斷；畢竟 Chloe 都唔係細路女。

「銀美蠢蛋，」我都俾佢影響到，開始鍾意幫佢改花名。「你覺唔覺我係好冇心肝嘅人呀？」

「覺㗎！」佢一邊食 떡볶이 （辣炒年糕/Tteokbokki），一邊成嘴辣汁咁答我。「人哋鍾意咗你咁耐都唔知，仲唔係冇心肝？」

「我唔係唔知，我係小心行事啫。」我更正佢。

「仲衰，」佢搵支篤住舊年糕嘅竹簽指住我。「即係明知我鍾意你，都仲要扮唔知，拖我時間。」

「唔係，係我同美恩傾過之後，覺得唔可以任性行事，要謹慎。」我再更正佢。

「再衰啲，」佢放埋舊年糕入口，𡁻住講。「同第二個女人傾我同你嘅感情事，然後聽人講拖我時間。」

「……冇事喇，你食嘢啦。」算啦，毋多言，多言多敗。

「哈哈哈哈！蠢蛋呀，你唔夠我講㗎喇！嘻嘻！」佢錫咗我一啖；𠵱……啲辣汁好辣呀！

「我一陣過去上堂，你喺呢度等我？順便諗吓，今晚想食乜？」我一邊抹嘴一邊講。

「我又要過去！」Chloe 都抹緊嘴。

「你過去做乜？」係囉，乜旗你都插晒啦，學校邊有雌性動物敢埋我身。

「嘻嘻！你個惠晶實在太好玩，我嚟到唔激吓佢，會周身唔安樂；哈哈！」我個惠晶……點解啲女人硬係鍾意咁講嘢嘅呢？

百厭妹vs百厭妹？惠晶呢次有對手喇。

四點，我同 Chloe 返到學校。喺搭𨋢嘅時候，我察覺到有啲唔尋常，因為樓上好嘈，嘈到喺𨋢度都聽到。我同 Chloe 交換咗個眼神，佢按咗樓下一層嘅掣。

我哋喺學校樓下一層出𨋢，行樓梯上去。

上到學校，我見到喺門口有好多人企咗喺度。

細心一睇，有兩個貌似古惑佬嘅人，喺度聲大夾惡咁鬧緊人，Esther 喊緊，Sophie 喺佢隔離陪住佢，Ricky 同 George 都企咗喺度、欄住其中一邊嘅學生；仲有好多睇緊熱鬧嘅學生，俾 Kirsty 欄住咗。

究竟發生乜事？

我見到惠晶驚到縮埋一角，佢見到我，我用眼神示意，叫佢過嚟。佢行到埋嚟，啤咗 Chloe 一眼，然後話：「嗰兩個係嚟收數㗎，佢話校長爭佢哋五億圜呀！」

五億圜？！三百幾萬港幣！

當時嘅我連五億圜有幾多都計唔掂。事發後幾日，我先知道個故事嘅全豹：

原來 Esther 個老公係個失敗生意佬，原本喺金融風暴之前，已經唔係好掂，爭落好多街數。金融風暴爆發，生意淡薄、不如賭搏；條友日日去賭（華克山莊之類嘅賭場，唔俾韓國人進入），結果將佢同 Esther 喺一山層樓按上按兼輸埋，仲要爭多筆五億貴利。

好喇，一窮二白輸 Q 晒，就攬住個情婦著草；淨低條貴利數等個老婆孭。連埋生意按樓貴利等等，合共十一億圜！成八球港幣。

唔怪得之 Esther 個樣永遠都咁愁，有個咁嘅仆街老公，想唔愁都幾難；佢撐到咁耐，真係算佢叻。

現場，兩個古惑佬完全冇見好就收嘅意思，仲係咁鬧 Esther。我望住呢兩隻嘢嘅一身 Yakuza 打扮（即係成個北野武咁款）、其中一個仲夾住個男裝手袋，個心笑咗出嚟。

曾經喺 Disco 打過工嘅我，學到嘅其中一樣嘢，就係喺古惑仔世界裏面，個樣越勁個底就越流、聲越大就越冇料到；「鱷魚頭老襯底」就係呢啲。講真，你真係有料到的話，你著晒 Mark 哥褸戴晒超、喺南大門 Samsung Plaza 前呼後擁咁慢鏡頭行緊出嚟啦，使乜撈收數咁折墯！

我問惠晶：「你哋報咗警未呀？」

「唔知呀，應該未啩……」惠晶個樣有啲驚。

「唔使驚，你靜靜哋行樓梯落街，然後用手提報警。」惠晶聽完，點一點頭，然後慢慢行咗落樓。

Chloe 全程冇出過聲，我感覺到，佢拖住我嗰隻手好凍同有啲震。咁又難怪嘅，個傻妹身嬌肉貴，應該未見過呢類「大場面」。

我喺佢耳邊講：「唔使驚，企喺我身後一步，有咩事等我頂。」佢點一點頭。

我拖住 Chloe，向 Esther 嘅方向慢慢行過去，直到我企喺佢右邊隔離，Chloe 企咗喺我同 Esther 之間嘅後半步。我明白件事唔關我事，但我又真係唔忍心、睇住兩個女人俾兩個大男人兇、自己企埋一邊睇戲。

其中一個古惑佬見到我行埋嚟，好大聲咁同我噏咗一輪韓文。

「都唔知你噏乜鳩，蒲你阿麼個早死仔！」我用廣東話答佢；我唔係潮州人，至於點解我喺呢個時候會講潮州粗口，就永遠是個謎。

個古惑佬當然唔明我講乜，於是用更聲大夾惡嘅 tone，再講一輪韓文。

「都話唔知你講乜撚嘢咯屌你老母！係開拖就快啦，等影相咩！」我認，我雖然讀過吓書，但爛起上嚟，唔會輸俾啲爛仔。當年喺 disco 兼職，日日都對住班爛鬼，想唔爛都難。

呢個時候，喺我側面，響起一把女仔聲，講咗句：「 젠장 ！」

係 Chloe； 젠장 （Jenjang）即係 shit，算係粗口。傻妹你搞乜呀？

大家要明白，韓國係一個非常玻璃心嘅民族，好多時只不過係同需要講敬語（ 존댓말 ）嘅人講半語（ 반말 ），或者同講開半語嘅朋友講咗敬語，都隨時初則口角繼而動武。Chloe 喺呢個有人擺明尋釁滋事嘅環境下無啦啦爆粗，一定有嘢跟尾。

果然，條古惑佬聽到之後，扯晒火，一句「 씨발 ！」之後，作勢想摑 Chloe！

仆 — 你 — 個 — 街 — 你 — 敢 — 郁 — 我 — 女 — 人？！

電光火石間，我攝埋去佢同 Chloe 之間嘅位，一攤一伏，格開佢隻手，再一擸，將佢扯埋我身。我已經坐好馬，右邊膊頭等緊佢埋嚟，對正佢雞心位，借力一拉一甩，然後發力撞過去。

我學嘅係 Krav Maga，我師父見我識啲詠春，於是幫我融入實戰。我打嘅詠春唔係正宗套路，但打爛仔交足夠有找。

其實我冇諗過要同佢格鬥，只不過係想將佢轟開，等佢唔敢亂嚟。但係唔知係情急定係扯火，用力猛得滯，無情力又食得應；佢向後飛開，跌咗落學校嘅落地玻璃門度。「𠹶」一聲，成度門碎裂！

全場靜晒，條韓佬坐咗喺地下，成頭血。

佢個同伴見狀，走埋嚟唔知想點。我一個箭步閃去佢面前約一呎，擺開我嘅問手，準備迎戰。佢向後退一步，想拉開架式，我就步步進逼，唔俾佢擺陣。

我知你啲死韓佬個個服過兵役，識跆拳最叻起腳，我就偏唔俾你起腳；大家短距離搏拳，睇吓邊個瞓低先囉！拳頭交我使驚你件蛋散！？

佢連退三次，我都跟上去，問手距離佢唔夠一呎。三次之後，佢放棄，轉身睇佢個爆晒缸嘅同伴。

我轉身行返埋 Chloe 身邊，佢嚇到面都青晒，對眼有兩泡眼淚。我行埋去攬住佢，喺佢耳邊講：「冇事喇。」

佢醒一醒，然後攬住我，伏喺我膊頭喊咗出嚟。

（待續）