當首爾仍是叫漢城的那些年（拾捌）

某年初夏，Santa Monica，Erika 屋企後園。Erika 係乜水？你睇落去咪知囉。

「你真係決定咗，要同 nerdy girl 一齊？」Erika 問我；nerdy girl = Colette。

「係；」我點頭。「你都知我鍾意佢㗎。」

「我知。你冇問題，我係諗緊佢。」佢皺一皺眉。

「Colette 會有咩問題？」我追問。

「佢咁小氣，又知道我同你嘅嘢，你唔會有好日子過。」佢似笑非笑咁望住我。

「過去式嘅嘢，應該冇事嘅；」我好老定。「更何況，我同你……嗰陣我都未識佢。」

「點解我教咗你咁耐，你都仲係咁純情嘅？哈哈！」Erika 摸一摸我塊面，邊笑邊講。「同女人講邏輯？以後有排你受呀！」

「點都好，我願意試。」我，語氣堅定。

「我知，你咁多年都冇變；」Erika 望住我，好滿意咁笑。「如果你大多幾年的話，我諗我都會同你一齊。」

1997年8月，晚上，酒店房內。

「你講，你對妹妹仔做過啲咩？」Colette 對呢啲嘢從來都唔會發脾氣係事實，但從來都唔會放過任何機會嚟玩「盤問男朋友」嘅遊戲，亦都係事實。

「你有冇對人哋暗示過啲乜？俾錯 signal 妹妹仔？」妹妹仔（baby girl，我諗係因為惠晶嘅 baby face）係佢俾惠晶嘅代號，應該係唔記得人哋個名。

「梗係冇啦！你第一日識我咩？」我堅持。其實都冇乜好堅持，佢鍾意玩，我陪佢玩，反正成個氣氛都係耍花槍性質，我由你。

「我點知你會唔會好似對『八婆 Erika』咁呀……」Colette 嘟嘴。

「嗱，係咪要講返咁耐嘅嘢先？」有擦槍走火嘅味道喇。

Erika 係我好朋友，佢有三個名，我叫佢做 Erika，Colette 叫佢做「八婆 Erika」（Erika the bitch/bitch Erika 任揀），呢個係佢心情好嘅選擇；心情唔好時，Erika 就會變成「你個 Erika」（your Erika）；當「你個 Erika」出現嗰陣就係我大禍臨頭嘅警號。

咁點解佢咁憎 Erika 呢？就係因為 Erika 喺我同 Colette 一齊之前，同我有過一段曖昧關係。Erika 來自紐約，拉美混血兒，年紀比我同 Colette 大，前文提及嘅紐約口音英文係佢教我嘅。我同 Erika 冇拍過拖，但係有過美國人所謂嘅「third base relationship」（自己 google 點解）。我哋嘅關係，維持咗一段唔短嘅時間。

除咗情慾之外，由於年紀嘅關係，Erika 亦都教識我好多有關女人、兩性關係、甚至係感情上面嘅嘢。喺青春期嘅日子，有一個亦師亦友嘅「姐姐」身教咁多兩性以至感情知識，Erika 其實係我嘅一本會行會走有身材有技巧嘅《姊妹》。

其實我同 Erika 嘅嘢，喺學校傳嚟傳去真係閒過立秋，傳返入 Colette 隻耳度亦都好正常；問題就出喺我同 Colette 喺埋一齊之後，佢玩秋後算賬，覺得 Erika 破壞咗我同佢之間嘅初戀關係。

非常唔理智嘅想法，但係我細細個已經明白，同女人講理智，即係同基督徒講進化論；想知點收科，你咪自己試吓囉。

之後，Erika 呢個名就一直係我哋之間嘅一個咒詛，亦都為我哋第一年嘅感情生活帶嚟幾負面嘅影響；好彩我哋慢慢克服咗呢個咒詛，Colette 亦漸漸承認我哋嘅初戀情人關係（我從來冇唔認佢係我初戀情人囉）。

點解我要寫返呢件事？因為當我哋有拗撬嗰陣，提起 Erika 呢個名通常都係衝突升級嘅先兆。

「我點知你會唔會悶悶哋連妹妹仔都唔放過㗎……」可能 Colette 都驚再玩落去會破壞埋個假期，於是搵位詐嬌收兵。

「你咁驚我識第二個，咁你又話要分手？」我意圖連消帶打咁解決埋我心裡面呢個大疑團；又唔係唔夾，又唔係有第三者，點解大半年前無端端要分手？

呢個時候 Colette 突然用一個好懇切嘅眼神好認真咁望住我，然後同我講：

「你唔好再追問住，信我，我係為咗我哋兩個好㗎；Je t’aime.」佢講完，錫咗我一啖。

究竟分手又點樣會係為我哋好呢？Colette 呢個答案冇解答過任何問題不特止，似乎仲喺我個舊問題上面，加多咗個新問題，令件事更加複雜化。

第二朝，我哋決定去樂天世界。對上一次同 Colette 去主題公園玩已經係兩年前去迪士尼嗰次，係時候搵小小刺激嘢測試吓個心臟。

漢城同其他大城市一樣，當你嚟旅遊嘅時候，好似《Lonely Planet》之類嘅旅遊書，都會俾到一籮籮旅遊熱點俾你。但當你住落一陣，再叫你帶人去玩的話，你未必諗到有咩地方真係值得一去。

皇宮個個差唔多樣；東大門南大門西大門西小門光化門一堆城門，都係簽個到影張相；明洞行吓冇壞，去南大門 shopping？你對上一次去赤柱大街 shopping 係幾時？新村梨大？唔好玩啦，女人街貨色，兜個圈仲得，邊行到咁耐。

到頭來，都係得返啲百貨公司shopping mall 同主題公園可以玩一日半日。

無論去邊玩都好，我哋係一定唔會錯過酒店個自助早餐嘅。除咗自己食，每朝睇住 Colette 食七咁食都係一件樂事；六件 pancake 兩杯 yogurt 再嚟煙肉炒蛋！細細粒嘅佢食量大過我，重要係無論佢點食，都唔會肥；呢啲嘢，真係冇得恨。

汲取咗琴日對碰嘅教訓，Colette 今日嘅對應策略係：帶咗個厚墊啲嘅 bra；我有啲唔習慣自己個女朋友一夜升 cup 嘅感覺，好唔真實。

可能由於係返工時間嘅關係，今日嘅地鐵迫人情況比琴日更恐怖，我哋兩個彷似入咗罐沙甸魚罐頭咁，由最初嘅緊抱狀態，變到只能拖住手。喺距離目的地蠶室驛（搭地鐵下蠶室，唔知司馬遷聽到有乜感想？）仲有幾個站嘅江南驛，由於係主要商業區嘅關係，埋站時嘅上落車人潮更加係走難級數。

喺呢個時候，我同 Colette 俾落車嘅人潮迫開咗，人潮一直將佢推咗落車，當佢正想上返車之際，說時遲那時快，列車閂門，隨即開車！我眼光光望住仲喺月台嘅 Colette 正隨住列車嘅離開慢慢遠去。我只能趕及喺佢從視線消失之前做咗個「你等我」嘅動作。

細個睇電影《緣份》，男女主角張國榮同張曼玉喺地鐵玩「緣份遊戲」；估唔到我同 Colette 會喺漢城重演呢段戲。

（待續）