Ōe-Thâu

Góa siá Pe̍h-ōe-jī ê chho͘-chiong, sī siū-tio̍h ＂A-î＂ LiuZhongjing lāu-su ê bîn-cho̍k hoat-bêng-ha̍k ê kám-tōng, chin hi-bāng lán Tâi-oân ē-tàng thoat-lī hàn-jī ê to̍k-hāi, chiâⁿ-chò chi̍t-ê sú-iōng pheng-im bûn-jī ê bîn-cho̍k kok-ka.

Lí-sióng bē-tàng ǹg lâng ta̍t-sêng, ka-tī tio̍h-ài liâu--lo̍h-khì chiah thang soeh-ho̍k pa̍t-lâng. Chit-ê só͘-chāi tō sī góa beh khai-sí liān-si̍p siá Pe̍h-ōe-jī ê pêⁿ-tâi.

Sui-bóng góa m̄ sī chin kāu-ōe, thâu-khak-té mā sī tiāⁿ-tiāⁿ khang-khang, chóng-sī beh o̍h ē-hiáng chi̍t-hāng lêng-le̍k, ài ū tn̂g-kî ê hùn-liān kap si̍t-chò, só͘-í góa ē chhōe chi̍t-kóa chú-tê lâi siá, chhin-chhiūⁿ sió-ha̍k-seng siá chok-bûn án-ne.

M̄-ku góa mā bē-sái hō͘ ka-tī siuⁿ khùn-lân ê bo̍k-phiau, ài tùi kán-tan kàu lân, chi̍t pō͘ chi̍t pō͘ bān-bān-á lâi. M̄-hó chi̍t-ē tō beh siá chin-chē, iá-sī siūⁿ beh siá kah chiok hó, che lóng bô pit-iàu.

Siōng tiōng-iàu ê, tō sī ài it-ti̍t siá--lo̍h-khì.