香城回憶錄006：水天圍的夜與霧

2020年6月25日的早上，音然還沒有起床。 「Kaza你點呀？早兩日你18歲生日，都未有時間同你講生日快樂，Happy Birthday！」我問著電腦屏幕另一端的Kaza。 「多謝你呀Mandy！而家我同青雲響黃磚大學幫手，暫時仲可以自由出入，你唔使咁擔心啦。」Kaza露出可愛的笑容。青雲是她男朋友龍榐博的別名，據Kaza所說，青雲的母親和別名青雲的方展博有點淵源，所以才有這個姓名和別名。 「咁你呢？我響中心大學啲group入面，知道Hugo走咗，你心情平伏番啲未？」Kaza接著問道。 「嗯…夜闌人靜嗰陣，一諗起同Hugo過去嘅日子都會喊咗出嚟，好彩有音然陪我…」我黯然地答道。 「有又堅強又樂觀嘅音然陪你，我就放心啲啦，不過如果你有乜嘢需要，隨時打俾我啦。」Kaza一邊說著，一邊回應著男友的呼喚。「我要去幫手先啦，遲啲見！」 「遲啲見！」

今年一月，我終於成功輪候到中心大學的學生宿舍。但父母上年去世，令我躊躇著是否要放棄入住宿舍，Hugo卻說住宿舍是大學生活裡，無論如何也要嘗試一下的體驗，亦可以令我改變心情，助我走出陰霾，所以我最後也有入住，Kaza就是我宿舍的室友。 Kaza中文全名叫溫初琳，剛剛完成電腦電子工程系一年級的課程。假如我和音然是一陰一陽，相輔相成的話，那麼Kaza就像我失散多年的妹妹，她升上中學時因為被鑑定是資優生，所以跳過中一和中二，直接入讀中三。亦因如此，雖然她和我大學的年級一樣，但年紀比我小大約一歲半。 我們的性格很相似，但她對人無戒心的程度，比我還要誇張，有時我會像音然擔心我一樣去擔心她。所以，當我知道她跟隨她的男朋友，到黃磚大學幫忙時，我就擔心起她的情況來。

至於Kaza這個別名，據她所說，是出自《科水嘅電磁槍》裡面的一個角色，Kaza跟她一樣，電腦和電子的技能非常高超。例如現在我和Kaza的視像對話，就是用她自己改寫了的一些開源程式來進行，她說，比起用市面上的非開源軟件，這樣會比較安全。

接近中午時分，音然又準備出發去水天圍了。 「音然，今日我陪你去，咁多人失咗蹤，我陪你一齊搭車穩陣啲。」我提議道。 「但係你跑得咁慢…」音然有點擔心。 「我唔上前線咪得囉，等陣我陪你飛的入去。我上網查過啦，附近有間商場入面有美食廣場，我響嗰度等你…」 「咁你咪會好悶囉？」音然問我。 「唔會，我會帶書去睇㗎啦。」

到了水天圍，兩個人都下車後，我往商場的方向走，音然則向警署的方向走。 「咦？嗰個咪係音然個friend Mandy？」當我在美食廣場看書時，前方傳來一把女聲。 「應該係啦，音然話佢鍾意睇書嘅…」這把聲音我認得，是阿采。 「Hi，阿采，今日我陪音然嚟，不過我跑得唔快，所以就留響度等佢。依位就係瑩瑩？」我放下了書，對著阿采問道。音然曾經帶阿采上來我家吃晚飯，但瑩瑩我只從照片上見過，所以不肯定。 「無錯，我就係瑩瑩，音然成日都提起你㗎，話你煮啲餸好好食…」 「係呀，上次我同音然上佢屋企，佢煮咗四餸一湯，我同音然全部都食到乾乾淨淨，你一定要去試吓。」阿采誇獎著我。 「擇日不如撞日啦，等陣活動完咗一齊上Mandy屋企咯。」瑩瑩建議道。 「嗯…可以呀，不過今日我都出咗嚟，你哋唔介意啲餸菜太簡單就得嘞。」我答道。 「梗係唔會！」阿采理所當然地說道。「越簡單，越考功夫呀！今次我哋有食神啦，瑩瑩！」 「就咁決定啦！我哋都差唔多要去join埋音然啦！」瑩瑩說道。 「一切小心呀！」我為他們打氣，然後就繼續看書了。

過了一會，覺得有點肚餓，就買了一個豆腐火腩飯當午餐。吃過午飯之後的兩小時，商場裡一片平靜，實在很難想像只需過幾個街口，就會到達烽火連天的戰場。

到了下午四時許，瑩瑩和阿采攙扶著音然回來了。 「音然你受咗傷？」我見音然走得一拐一拐的，焦急地問道。 「扭傷嗰度，舊患復發啫。」音然揮一揮手地答道。 「但點解你面色咁差嘅？」我見音然面色不太好，以為她不舒服。 「唔係，Saki俾狗咬，Samuel為咗救佢都俾人拉埋。」音然無奈地說道。 「通知咗佢哋媽媽未？」我問道，他們的父親在小時候去世了，多年來與母親相依為命。 「嗯，頭先我叫阿采用我個電話打咗俾佢，佢話會早啲收工趕過嚟…」音然答道。 「響電話入面，我聽得出伯母佢好支持兩姐弟，所以唔使咁擔心啦。」阿采補充道。 「咁就okay啦，我哋四個一齊飛的去我屋企咯？」我提議道。 「好！」「嗯！」「等我開個電召app先！」

的士到達半灣後，我在街市附近下車去買菜，下車前我將家裡的鑰匙交給阿采，使他們可以繼續行程，陪伴音然到我家休息。

晚飯時間，電視裡直播著各區的最新情況，原來除了水天圍，香城其他地區亦有不同活動，音然說，網上稱之為十區開花。 「Mandy你煮啲餸真係好好食呀！」瑩瑩讚賞道。 「所以今日中午嗰陣我咪話，我哋有食神囉。」阿采笑道。 「你哋太誇張啦，普通家常菜啫…」我有點害羞地說道。 「Mandy真係丫，唔使咁謙喎，你真係煮得好食嘛。」音然拍著我的肩頭說道。

晚飯之後，阿采和瑩瑩待了一會兒，就一起離開了。 她們離開了後，我在廚房裡洗碗，音然突然在客廳內叫道：「唔係掛！又嚟？仲要打孖上？」 我走到客廳，原來紅衣人又到方朗站斬傷月台上的乘客。同一時間，警察在伯心欣站用警棍和胡椒噴霧襲擊列車上的乘客。 「吼！我一定要搵到依班紅衣人算帳！！！」音然雙拳緊握，望著天花板，憤怒地吼叫道。 「冷靜啲冷靜啲，音然你冷靜啲，你得一個人都做唔到啲乜，唔好咁衝動…」我勸說道。 「Mandy你呀！由細到大都係咁，明明已經俾人踩到上心口，都仲係乖乖哋企響度咁俾人恰！」音然重提舊事，憤怒地說道。「今日香城已經搞成咁，你仲想繼續做乖仔乖女？仲忍一時風平浪靜？退一步褲都穿窿呀！」 「唔好咁激動啦，音然。咁激動對身體唔好㗎，你隻腳又未好番…」我嘗試轉換話題。 「得啦，得啦，唔使勸我啦，我冷靜咗啦。」音然見我沒有同意她的看法，無奈地說道。

接近十一時半，我刷完牙，準備上床睡覺時，又聽到音然在廳中大叫了一聲。 「明明今日下晝仲見到佢㗎喎？點會又唔見咗？」音然大聲地問道。 「又有人唔見咗？」我有點疑惑。 「阿Ling呀，明明今日我哋坐的士嗰陣，仲見到佢無穿無爛上咗校巴㗎。」

校巴，不是指學生上學放學的交通工具，而是指香城裡有私家車的人，自願把車駕到發生警民衝突的地點，去接載年輕的抗爭者到安全的地方。比較有經驗的抗爭者，通常不會直接叫校巴送他們回家，而是先在一些車站或地標下車，然後再步行或乘巴士回家，這樣對雙方都比較安全。

「可能佢今晚去咗啲friend到，未聯絡屋企啫。」我安慰著音然道。 「或者啦，最衰佢男朋友Samuel今日下晝又俾狗咬，唔係就可以問吓有乜嘢可以幫手。」音然無奈地說道。

到了後來，我才知道，所有在這幾天失蹤和被捕的人，都被送到一個叫仙湖嶺的地方，並將經歷數之不盡的折磨，在其他國家的記錄裡，稱之為仙湖嶺120天。裡面對手足的殘忍程度，並不下於《所多瑪120天》。直到多年後，我才從Saki的口中，知道當年他們在裡面的遭遇，是何等的慘無人道。

第二天早上，我又趁音然沒有起床，致電給她的父母。 可是，電話傳來的，卻是她父親的一則留言訊息，內容是說他們去了大亞帝國旅行散心，8月上旬才會回來。 「Uncle、Auntie做嘢向來有文有路，好少咁心急㗎喎…而且Hugo又啱啱走咗…」我一邊在心裡思考，一邊在準備早餐。思考的時候，音然也起床了。

早餐時，我跟音然說了留言訊息的內容。 「你使唔使番屋企睇吓情況點呀？」我一邊切著餐肉，一邊問音然。 「唔使啦，佢哋去大亞旅行都唔同我講聲，即係已經唔再當我係佢哋個女啦。」音然又開始激動了。 「唔好咁啦，音然，Hugo走咗佢哋都好唔開心，一諗到想散心就即刻出發，趕唔切通知你啫。」我嘗試勸說道。 「你唔好幫住佢哋啦，Mandy，我阿爸由我細個到大都教我同我阿哥，做嘢要有交帶，點知最無交帶就係佢哋兩個！」音然不滿地說道。「總之呢，一日佢哋唔道歉，一日我都唔會番去！」 「好啦好啦，你睇吓你丫，連通粉都噴埋出嚟啦。」我見音然還是聽不入耳，就一面用布替音然清潔餐桌上的通粉，一面轉換話題。

到了後來，我才知道，假如我和音然當時有到她家，看看究竟發生了甚麼事，之後的慘劇，也許就不會發生了，也許…