講古个「說」佮「演」

映泉鄉

　　最近我有試耍一个手機電動《映泉鄉》，故事敢若露天版个《神隱少女》，一个少女欲轉去阿媽兜，路裡煞落入去神明佮妖怪个世界，揣著轉去个方法進前，伊就踮遐个溫泉食頭路。

　　映泉鄉个溫泉攏是神明佮妖怪咧泡，這个電動个耍法是「囥咧收」，主要个目標就是搝愈濟無仝个人客來愈好，為著搝人客，愛請人摒掃、攢資源升級溫泉佮開新个溫泉。故事愛開故事卷才會當看，故事中央會當𨑨迌消珠仔，若有定定來泡溫泉、關係較好个人客，消珠仔个時會當揣來鬥相共。

　　我開始耍無偌久，猶未了解著敢有好𨑨迌，就發現一个佮故事有關个問題，毋是故事本身，故事本身——至少目前我有看著个頭兩章——感覺是穩穩，一个普通人來到異世界，耍者會當綴伊个目睭去了解彼个世界，然後開始世界个危機，毋過講故事个方式我感覺誠有問題。《映泉鄉》表現故事个方法其實嘛誠普通，畫面、人物、對話佮敘述，佮大部份个 AVG 差不多，問題是出佇咧敘述个部份，伊若像分袂清說明佮演出个無仝，分明踮畫面有演出个代誌，伊閣愛用文字閣講一擺，譬如講咱已經看著畫面頂懸个志明提一本冊予春嬌，伊閣愛加寫一句「志明共冊提予春嬌」，明明《映泉鄉》是用 3D 个角色，會當表現个動作閣較濟才著。

　　若是佮 FGO 比，FGO 是傳統个 AVG，干焦 2D 个背景佮袂振動个人物，伊用畫面演出表現个代誌煞比《映泉鄉》加較濟，內底个人倚近、行遠，抑是予我啥物物件，攏毋免說明，《映泉鄉》毋是做袂到，是毋知影家己已經成功矣。

　　講到遮我想欲來補充介紹一本冊——《故事造型師》，頭拄遮講个「說明」佮「演出」个應用，雖然我早就有體會，但是會當講予清楚是看著這本冊了後个代誌，所有想欲學講古个人，攏會當來看一本冊。另外，我前兩工閣買一本《教你按怎寫出遊戲劇本》，若看了閣來佮逐家分享。

　　最後，雖然我共《映泉鄉》刣掉矣，內底个音樂確實好聽，是南王姊妹花唱个，會當來共支持。