Tī 頂篇文章，góa 本意按算借《緊急查問隊》某一集 ê 劇情來解說，sī án-ná góa 支持序大人 mā 有情愛 ê 需求。原底 góa 心肝 teh siōⁿ, 既然有緣講 tio̍h chit 齣劇，結尾 tō koh sió-khóa-á 插花仔解說，ūi cháⁿ-iūⁿ 台語文版 ê 劇名 góa ē án-ne kā 翻譯？Sáng 知影講 siōⁿ boeh 寫--ê, sī 愈寫愈長，chŏaⁿ kā 獨立 chòe 一篇，來探討 tām-po̍h-á 日本齣翻譯 ê 議題。
對華語版 khah 熟似 ê 朋友應該知影，chit 齣劇 ê 名，無論 tī Netflix、KKTV iá-sī 緯來日本台，lóng hō-chòe《女王偵訊室》。毋知 boeh án-ná 講，自從天海祐希 2005年主演《女王 ê 教室》了後，chi̍t-kóa 伊 chòe 主角、台灣 koh 引進播送 ê 日本齣，lóng hŏng tī-leh 華語翻譯 ê 劇名中加添「女王」兩字：
《女王的教室》（日語：女王の教室），2005
《主播台女王》（日語：トップキャスター），2006
《演歌女王》（日語：演歌の女王），2007
《BOSS 女王》（日語：BOSS），2009，2011
《女王偵訊室》（日語：緊急取調室），2014，2017，2019，2021
《女王的營養午餐》（日語：Chef〜三ツ星の給食〜），2016
天海祐希 tī《トップキャスター》內底搬演 ê 椿木春香，是一个電視台 ê 主播。
見若伊欲上台播送 ê 時，tō ē 掛一跤囡仔 chò 𨑨迌物 ê 手指，提醒 ka-kī mài bē-kì 追求獨家、
關懷新聞背後人物 ê 精神。（フジテレビ，2006）
Chiū góa ka-kī 所看、所知影 ê 作品當中，天海祐希 tī《トップキャスター》iá-ū《BOSS》chit 兩齣戲內底，確實 chok 有 hit 款頂司 ê 氣勢，有影真大範。雖然有時仔伊 ê 角色嘛展現出 tām-po̍h-á 甘草人物 ê 特質，予人看著笑咍咍，m̄-koh 天海予 góa ê 感覺, tō sī 一个英雄、一个值得 góa 學習、接近、欽服 ê 英雄。
天海祐希 tī《Chef〜三ツ星の給食〜》當中，演一个 chòe 法國料理 ê 總舖師。
Tú 開始 ê 時陣，伊因為替餐廳提 tio̍h Michelin 三粒星 ě 榮耀，感覺 ka-kī 真 chhiaⁿ-iāⁿ,
soah 去予餐廳頭家陷害辭頭路。尾仔靠 ka-kī 煮食 ê 功夫，替國校仔 ê 囡仔朋友煮中晝頓，
mā ka-kī 出外開一間賣法國料理 ê 擔仔，重新 koh-chài 追求 Michelin 三粒星。
（フジテレビ，2016）
講 tio̍h《緊急取調室》kah《Chef〜三ツ星の給食〜》，góa ê 感受 tō khah bô-kâng. Chhím 開始 góa 聽講有 chit 兩齣戲 ê 時陣，mā-sī chok 期待天海有啥款展示氣勢 ê 表現，規个看煞了後，chín 翻頭 kā sioⁿ, 感覺天海祐希伊 ê 角色無 chhiōⁿ khah-chá, 宛然救世主 ê 模樣，甚至伊 tiāⁿ-tiāⁿ tú-tio̍h 阻礙，無法度共大局掌握在手頭。M̄-koh góa m̄-sī 無 kah-ì chit iūⁿ ê 安排，有時陣 góa 甚至認為 che khah 倚近咱 ê 現實：做人無可能逐項 ē, ē 去 tú-tio̍h 頂頭 ēng 強勢 ê 權力 kā lí 壓迫，mā ē 予四箍圍仔 ê 人質疑 lí ê 能力、kā lí 剾洗。Chún-kóng chit 款 ê 角色，看來無 chhiōⁿ「女王」chiah gâu hiah 有風釆，góa 猶原 chin 欣賞天海帶自信 ê 笑容，以「天天二四點」ê 精神，tī-leh 挑戰各種難題，毋驚風 mā 毋驚雨。
翻頭來講，góa 本身 án-ná 思考 kah 翻譯《緊急取調室》chit 个劇名 ê 代誌。Chhiōⁿ 頭前兩季，iá-ū 第三季、第四季 ê 主視覺，lóng-sī 主演天海祐希 khiā 中央，m̄-koh 有看劇、koh 詳細了解 tō 知影，tī 伊身軀邊有真 chōe partners, lóng-sī kah 伊平等--ê, 甚至 phēng 天海本身 koh-khah 資深 ê 演員，chhan-chhiōⁿ 小日向文世、大杉漣、緒方義博，iá-ū 大杉漣先生過往了後加入劇組 ê 塚地武雅，in 大部份 ê 人 lóng-sī tī-leh 田中哲司搬演 ê 梶山勝利下跤手 chòe 代誌，天海祐希 mā kâng-khoán. 所以以 góa ê 看法，iá-sī mài 學台灣華語版歹鬼 chhōa 頭，chhìn-chhìn-chhái-chhái tō kā「女王」兩个字安 tī-leh 天海主演 ê 劇頂頭。
頭先 góa 決心保留原標題「緊急」兩字。Koh-lâi boeh 看 ê sī「取調」，chit 个詞有收錄 tī-leh《台日大辭典》當中，m̄-koh góa ē 煩惱講，人 kám-ē 接受 che mā-sī 一項台語詞？坦白講 góa 原底 mā bat 躊躇，kám boeh 直接採用「偵訊 cheng-sìn」，a̍h-sī chhiōⁿ「質訊 chit-sìn」、「訊問 sìn-mn̄g」chit 款 ê 詞，iá-m̄-koh chim-chiok kā siōⁿ 看覓，雖然 tī「偵訊室」lāi-té 予嫌犯講出心內話 sī kài 關鍵 ê 過程，事實講負責 koaiⁿ tī-leh 房間內 ê 警官，mā-sī 愛 chhiōⁿ 搜查一課 ê 警官 kâng-khoán, 出去 cháu-chông 辦案。
Lí nā 講「審問 sím-mn̄g」，che ná-chhiōⁿ mā 無 siáⁿ 對同，因為「審問」sī 一款頂對下 ê 關係，mā kan-na 司法體系 ê 法官，chiah 有 hit 个權力 thang「審」，審理判決已經被檢察官起訴 ê 被告 kám 有罪 a̍h 無罪？M̄-koh chit 齣戲 ê 宗旨，sī teh 講嫌犯 kah 問案 ê 警官 sī 平等 ê 關係，tī che 過程中向警方破腹相告，坦白 ka-kī 犯罪 ê 經驗 kah 因端。
Góa siōng-bóe 先採用「查問 cha-mn̄g」ê 理由，sī 因為 che 有包含 kā 嫌犯問話，iá-ū 對外 chhōe 關係人訪查 ê 過程。Che mā-sī góa 改用「隊」，bô-koh chài 保留「室」ê 原因，因為 che 四季逐季 ê 主視覺，已經 lóng 講予咱知--ah, 破案 m̄-nā 靠天海祐希搬演 ê 真壁有希子一个人 tī-leh 激頭殼，mā m̄-nā 靠 koaiⁿ tī-leh 房間 té 問話 tō 會當解決代誌，有真 chōe 時陣 sī 因為搜查一課 ê 速水茂虎道 kah 鈴木浩介兩位警官，in 鬥相共出外奔波 cháu-chông，有小日向文世、大杉漣、緒方義博三个阿公級 ê 前輩 tī 開講 ê 時陣提供查案 ê 方向，iá-ū 田中哲司 chòe chhōa-thâu--ê, tàu 抵抗日本警視廳高層 ê 壓力，規个團隊 m̄-chiah 有法度繼續辦案，tī-leh 警方所起造 ê 江湖中，koh 喘一口氣。
「Che, tō sī《緊急查問隊 Kín-kip cha-mn̄g tūi》」
《緊急取調室》ê 意象，tī-leh 逐集 ê opening animation chiah ē 展現出來。
透過 chit 支 khé-m-lah, 會當看著嫌犯 kah 警方對敵 ê 影像，
mā 看 ē tio̍h 眾警官跤步踏離開 chia 了後，人去樓空 ê 形影。
（Netfilx, 2017）
