香港 --> 加拿大, 多倫多

25.5歲的我從香港隻身一人搬來了多倫多。身邊的人都說我很勇敢，問我為什麼能作出這樣大膽的決定，我當時只有一個想法: 我想要自由。可能這個想法很自私，說走就走，沒有考慮家人的感受。可是，在我的人生觀裡，人生的旅途都是孤獨的，就算身邊有朋友有家人，最終還得是孤身一人走完一段路，不止是我，包括我的家人也是，沒有說少了誰不行。雖然我心懷愧疚，但請原諒我，我只是在盡力地對自己的人生負責。

打這篇文章的時候是2023年5月10日，我是2023年5月5日到達多倫多，現在已經第5天了，就讓我好好記錄一下包括從出發前到落地後的生活點滴吧!

以下文字將用粵語表達~

2023年5月4日 出發前一天

原本一直都好期待，想快啲走，覺得自己夠灑脫可以拋開哂一切，但到真係知自己真係要走既前一日，先知原來自己真係會唔捨得，心情好複雜，果種突然好想唔走，但又知道已經準備哂所有野，唔可以唔走，冇得返轉頭既呢個矛盾，再加上又意識到未來好迷茫，擔心去到又唔知搵唔搵到工，總之所有想法堆埋一齊就好沉重，同時亦都知道要將呢日留俾屋企人，要好好同佢地道別。仲記得果晚啊媽特登煮左我中意食既野，但我就冇咩胃口，食得唔多，雖然平時佢地都知我食得唔多，但只有我自己知道我只係唔想真係食完呢餐，食完就真係代表我真係要走。但係時間點都會過，果晚原本以為自己會訓唔著，點知竟然訓得幾好。。。。。。一切都太反常啦。

2023年5月5日 出發

早上10:45機，朝早6點起左身，從中學以黎就冇再煮過早餐我食既啊媽，特登起身煮早餐俾我，係滿滿不捨既愛。7點，朋友準時黎到樓下車我去機場，今次係我第一次坐佢車，估唔到會係呢個場景。

7點45分，平日黎好照顧我既朋友，亦都係我好欣賞既前輩一早就黎到(仲早過我)機場幫我打點，好多謝佢，如果得我一個應該會好手忙腳亂。check完in，送機既朋友陸陸續續到，好多謝佢地願意咁早黎機場，感恩。影完大合照，就正式入閘。

直航飛左15個鐘~

2023年5月5日 到達 (由於時差既關係，去到果日都仲係佢地既5號)

YYZ機場Terminal 3落機，然後跟隊行，行行下會有工作人員指示排隊去到申報機面前做入境申報，可以幾個人用一部機，填完之後會有一張白色飛仔彈出黎，一定要keep住呢張紙，啲工作人員都係用呢張紙做標示，安排你既去向，同埋離開機場前佢地要收番。拎住張紙繼續跟人行，行行下會見到一啲counter感覺差唔多要過關既擺設，跟隊排，然後中間有個工作人員會問你係咪第一次黎加拿大要拎study permit or work permit，答左係就會用粉紅色筆劃一劃你張飛仔，指出你行另一邊。行到另一邊就會再見到有好多坐住關員既counter，緊住排隊，排隊期間，可能前面啲人冇留意輪到佢，而關員完左一單又冇人上前，就feel dou啲關員好重火氣咁大叫next!果下嚇親，即刻提醒12分精神咁等待。然後排到我，明明係個關員揮手叫上前，睇落去係中上年男人，但去到發現佢同緊佢隔離同事吹緊水，仲要係冇意識停，勁無奈但又唔敢stop佢地，好尷尬咁企在counter面前等，可能呢個係佢既考驗? 終於在幾分鐘後，佢終於有意識要停，然後問我黎做咩，果下未完全醒哂、同埋未有意識係要用英文溝通既我，本身想講I would like to get the OWP但衝口而出咁用左錯既grammer，講成I am going to get the OWP，然後關員就即刻串我話you are going to? what if I don't give you? 果下真係勁無奈，只能乾笑，haha。不過好彩係佢都算係大粒野，有經驗 (見其他人見到佢要salute)，好快就出到OWP，出完張野係正正常常，冇其他gp友口中講果啲日期錯名錯條款錯果啲，同埋佢有喺passport蓋印架，因為之前聽講有啲冇蓋。拎完張野就拿拿臨走去拎行李啦更係。拎完行李本身諗住聽gp友話機場都有service canada所以想整埋SIN，點知去到(拎行李附近)竟然係關左門，咁唯有call uber番去airbnb先。題外話，去果陣service canada門口企住左一個女人，佢見係新黎，好好心咁提醒要黎張白色飛出黎俾關員收，然後又好熱情咁講welcome to Canada!! 果刻其實好感動同幾開心，有種我真係做到啦既一種感覺!!出機場果下感覺唔係話真係好凍，雖然溫度係11度，但天氣好好，仲好好太陽，著夠衫就ok，聽朋友講5號前仲係打風落雨，好好彩落地呢日即刻好天!!

搭左九個字終於到airbnb，去到大概四點半，住果條街全都是兩層屋，有啲出面有個花園仔，勁有美劇feel，我住果度好大勁舒服，nice!

休息左一陣就去附近一個商場開電話卡(passport, OWP)，發現呢度既電話費好好好貴，普遍45cad先有8GB (未計稅)，問左好多間之後行到一間睇落好少少既plan，諗住問多少少然後落訂果下，然後有位寫住係in-training既職員行埋黎問係咪new comer，話依家有優惠做緊45cad有20GB，成件事係好奇怪，不過都理唔到好多就揀左果間。之後去walmart睇有冇野要買，發覺多倫多啲野真係幾貴下，好多香港好平既野，黎到可以貴幾倍，例如啲菜20蚊港紙先有一細袋，12蚊港紙先有一棵生菜，呢度普通一餐連稅至少要70-80HKD，所以黎到真係要慳得就慳。以至第一餐(夜晚)竟然係食杯面......就咁完左第一日。

2023年5月6日

尋晚訓得麻麻地，唔太適應，多倫多慢香港12個鐘，所以suppose呢度夜晚12點其實只係香港中午12點，平時呢個時間點會訓呢?所以只能夠訓訓下又醒，訓訓下又醒。

今日約左開CIBC銀行戶口(passport, OPW)，過程中算順利，點知去到開信用卡果陣佢話系統reject jor，話我個phone number有人用過黎開，懷疑我既身份，佢個樣好嚴肅，叫我拎左SIN number再番黎試下，果下勁無奈，心諗唔係mobile store俾左人地用緊既number我下話? 一係就我個number係recycle既，但又擔心用住呢個phone number會唔會影響我個credit score，因為加拿大好依賴credit score呢樣野，租屋，申請信用卡，借錢等等都好睇呢樣野。之前都聽人講過因為撞名or撞姓or撞SIN (冇錯SIN都係recycle)既關係搞到同人撞file，影響左自己既credit score，結果要用幾個月時間去同人地澄清，建立新file。Anyways，唔諗得咁多，之後本身疊埋心水諗住聽佢講等埋拎SIN再搞。點知之後又屎忽痕走左去mobile store諗住問下佢check ng check到個number係咪recycle，有多個information都好，點知同職員解釋成件事之後，佢竟然話之前都有人試過好似我咁，又解釋話phone number 係會recycle咁用，但重點係佢竟然話可以幫我轉一個phone number lol??仲要係用電腦禁幾個制就搞店，連sim卡都唔洗轉，我部手機就自動認左第二個number，成件事好神奇，真係唔知個systen係點運作lol

好，咁轉左新number自然要update銀行，本身話可以用online banking改，點知填完新number，next step係要我做identity verification但係要用舊number 收sms，成件事係勁kam lol。咁之後打電話上客戶服務熱線，結果又叫我去分行搞...

2023年5月7日

星期日，冇咩野做，都係周圍行下，去左china town，但天氣好差同落雨，雖然都係8度，但比平時凍好多。最後都係買下啲日用品，完左一日。

2023年5月8日

一大早7:30去service canada排隊整SIN(人地開8:30，但聽人講要好早去排)，去到果陣係冇人，變左排頭位lol。btw多倫多既朝早好凍。終於等到一個鐘後開門，填完一張紙仔，跟住指示黎到一個partition俾文件職員，一心諗住好快申請到，點知過多陣，佢話我既OWP唔validate所以申請唔到，又話可能system未update，呢啲situation時不時會發生。然後叫我一係去機場IRCC問，叫佢地fix，然後番番黎再申請，一係過多幾日再黎試下，一係就online申請，等25-30工作天等佢寄SIN，咁心急既我更係話會去機場，咁佢就俾左張return slip我(呢張好重要!!有如王牌，幾時再番去都得，免受排隊既煎熬)。用左一個鐘飛奔去機場IRCC，BTW 第一次搭機場快線，好貴,CAD 9.45。去到時間係10:30，接待我既係一個保安(好nice)，同佢講番成件事之後，佢拎走左我既passport and OWP去俾IRCC check，之後冇耐出番黎話validate左，叫我俾時間system update，around 24 hours，第二朝再去service canada搞。於是乎，只能帶住惆悵既心情過今日。

完左呢單，咁因為晏就兩點約左搞HSBC既銀行戶口，去完機場出番黎仲有時間，咁就去左CIBC分行度update番phone number，個職員聽到我話改左phone number之後又suggest試下幫我再申請credit card，然後今次又得左lol真係唔知講咩好，只係因為我個電話number有人用左就唔俾?咁世間上一定唔止我一個人係用左recycle既電話number，定我真係「好好彩」，其實冇咩人會用番? 不過慶幸既係，咁應該之後唔會點搞到我個credit score?

咁完埋呢單，到到兩點去HSBC搞戶口，戶口之前在香港申請左，今日去只係拎番張debit卡，拎完之後咁就叫我去櫃員機set PIN (同香港係唔同，平時好似係派左俾你，之後係可以改番)，好好笑既係佢話我改密碼既時限expire左，問號?咩黎? 咁即刻去番問職員，然後佢話suppose我要一個鐘內set PIN，下?你冇同我講......不過我岩岩先拎張卡，前後15分鐘都冇......然後佢都話佢網上check係未過期，但可能atm傻傻地......咁佢叫我出去試多次去set，再唔得就要等一個鐘，佢禁reset，俾多一個鐘我......咁有驚無險，等一個鐘後(係啊，試多一次都唔得啊)，最終都set到。唉。

成日都好無奈。

2023年5月9日

因為尋日係10:30先話validate到，所以今日11:30先去到service canada，去到果陣超多人，排到出街，呢個時侯張return slip係好有用，簡直好似特快通道咁入去左接待counter，同佢交代件事佢就check我啲文件齊唔齊，最重要係佢係會走去check我本passport有冇印仔，問我係咪private entry lol 好彩記得係有印仔，如果冇，都唔知會發生咩事......check完之後佢就叫我去waiting area等叫名，咁等一陣好快有人叫我入去partition，又係一樣俾文件佢，尋日既情景再現，只不過心態完成唔同，係勁緊張，好驚又唔得，已經打定輸數再唔係就等一個月啦:(

不過!!好彩!!!最尾係整到，心情即刻鬆哂。

咁完左之後，又去左其他地方行下適應下新環境，順邊試左加拿大Starbucks之稱既Tim Hortons，飲左杯野同食左個donut，啲野好甜，但幾好食既。

2023年5月10日

感覺呢幾日好似坐過山車咁，同埋用左好多錢，今日決定留在民宿一日，唔用錢，同埋想好好記錄落地一星期既事跡。

一星期既心情總結

終於明咩係人地成日講既canadian style，好多問題都出奇不意，完全唔知呢個地方既system係點，大部分啲時間用左喺等時間到，果下可能會覺得呢啲香港一定唔會發生，但同時亦都令我反省到唔好再用香港既一套去先入為主，黎到一個地方總係會有唔同既經歷，有佢地既一套，等既途中反而提醒左自己要慢落黎，當初就係覺得香港太快先想走，呢啲只係開頭，黎緊仲有大把野要等，年輕人，就等你慢慢適應啦!

不過呢幾日已經經歷咁多，真係可以同自己講句: Welcome to Canada!

P.S. 如果有同路人都係新到多倫多，或者對我既經歷有所共嗚，歡迎搵我一齊傾訴哦!!