序 - 早晨, 我叫....

"♫♫梳過頭 熄了燈 出去記得鎖上門 和想清想楚 有沒有身份證 記得帶齊 信用咭 鈔票駕駛執照 為何仍然沒有自信心♩♩"

今日係我畢業後第一日返工, 個腦不自覺哼起陳奕迅呢首歌既句歌詞, 真係好貼切, 因為我個人本身真係冇乜自信心。

呀, 我介紹返先, 我叫阿賢, 全名叫王早賢。係呀冇錯, 同以前一個明星讀音撞名, 仲要係女明星。不過如果你識佢, 我諗你都應該有返咁上下年紀。咁點解我知? 因為我阿爸同我講, 佢以前好鍾意睇倩女幽魂, 所以就改佐我呢個名, 其實我諗, 佢應該係想生女多過生仔。

話晒第一日返工, 本身車程只係45分鐘, 我再預多佐30分鐘, 諗住禮貌D早少少上去打下招呼, 相信都應該冇死錯人掛。

正常返9:00, 見都差唔多15分鐘前, 我就上樓喇。

"叮噹"

"卡" 我推門入去, 戰戰兢兢咁行埋去接待處。

"你好呀, 我叫阿賢, 今日第一日返工"

面前呢位長頭髮, 眼大大, 目測差不多40歲既接待處小姐, 咬住個早餐三文治抬高頭望住我..

"阿賢? 全名呢?"

"呀......王....早....賢"

"下? 哈哈哈哈!! 倩女幽魂呀? 哦, 你就係黎做DESIGNER個位, 埋邊梳化坐陣啦, 經理冇咁早返, 通常9:30先返, 你等我食埋個早餐先搵人幫你啦, 小倩"

"好呀唔該..."

對於比人叫我做小倩, 我已經見怪不怪, 某程度上佢只係暴露佐佢既年紀囉。

於是我就坐係梳化靜靜咁睇住人來人往既同事返工...而我身為一個血氣方剛既正常男人, 當然係望下有冇靚女啦.....