又準備農曆新年喇！舊年我喺香港人市集講咗自己原創嘅《獅子山與老虎岩》故仔，今年我想試吓轉個方式，想以互動遊戲為主，仲要有適合大人玩嘅！由 Confirm 大會可以提供免費攤位俾我到市集當日，只係得 6日！真係大想頭！不過一年得一次可以聚集咁多移澳港人，可以一展所長兼且令人Remind 返香港人係幾咁有創意嘅機會，機不可失，我點都唔想錯過（自己讚自己有創意，我認我係幾厚面皮嘅）。Btw，好彩平時都有做 Research 收集素材、idea，所以趕得嚟都未算係mission impossible。
故事燕子遊樂場
又要諗故仔又要諗玩法，重要準備道具同排練下點講個故仔，成個禮拜就咁燃燒生命（呼～）。過咗嚟澳洲真係好少會咁Chur，但哩種忙嘅感覺好實在，唔通香港人真係咁鐘意返工？！
明明係義工點解我會話係返工？其實我喺香港其中一份工作就係藝術教育展覽嘅策展人，即係幫啲有教育目的嘅專題設計展覽，俾小朋友嘅展覽互動元素係必要之存在，我亦都曾經喺屯門搞過社區互動藝術節，嗰種可以一齊玩、一齊創作、分享嘅感覺真係好開心。嚟到澳洲至少依家仲未有機會可以靠哩種創作賺錢，將來嘅嘢唔知，不過既然係自己鐘意嘅事，有機會就盡做啦～如果有人打賞返一元八角俾我買吓顏色筆、膠水畫紙，都算係唔錯喇。
講返個活動先，6個故事遊戲嘅主題分別圍繞香港或者廣東話俗語：
🎡 白鴿氹氹轉：
故事取材自俗語「打個白鴿轉」，遊戲中亦會用到童謠「氹氹轉，菊花園」元素，主體內容係 3歲小朋友都玩到嘅配對卡。
🎡 大埔海底的星星：
以大埔海嘅採珍珠嘅歷史故事為骨幹，邀請參加者穿越到一千幾年前嘅大埔吐露港，用紙板偶扮演採珠女到海底採珠冒險。
🎡 甩繩馬騮山：
故名思意就係一隻喺「馬騮山」（金山郊野公園）上，一隻馬騮媽媽要追返「甩繩馬騮」囝囝嘅故事同遊戲，遊戲加入咗馬騮鐘意模仿人哋動作嘅元素。
🎡 通勝英語一分鐘：（大熱！當天榜首遊戲！）
專門為大人而設，標榜中英文幾叻都會R 晒頭嘅遊戲。故事取材自俗語「一本通書睇到老」，遊戲會用上通勝英語又稱「白鴿英語」嘅原典《華英通語》嘅內容。
🎡 老鼠拉龜定拉雞：
故事源起係俗語「老鼠拉龜」Crossover 急口令「一蚊一斤雞、一蚊一隻雞」，唯一一個集體遊戲，可以全家一齊玩！
🎡 爭奪寶藏船：
俾年紀大啲嘅小朋友，同埋帶點刺激同競賽成分嘅單人遊戲，以海盜張保仔嘅寶藏為題應該會受男孩子歡迎吧？古代海戰嘅背景加咗影偶講故事，或者下次可以發展為故事劇場 XD
6個遊戲中，以「通勝英語一分鐘」同「大埔海底的星星」最受歡迎，咁就不如簡單講吓係點㗎啦～
「通勝英語一分鐘」
作為一個大人，我自己私心都喜歡哩個「通勝英語一分鐘」嘅故仔同遊戲，research 個陣見到通勝英文嘅其中一個原典《華英通語》竟然有電子Scan 版本！內文全部係手寫字做印刷板，無論英文定中文嘅字體都好有趣，實在愛不釋手！所以直接 Print 咗出嚟俾大家一齊欣賞～下圖嘅 Book Cover 同字格都係出自原典㗎！
故事由玩家向「通勝」求教英文開始，之後就會玩配對同重組句子，最後「通勝」本尊會分享返「一本通書睇到老」嘅故仔。似乎好多朋友覺得哩個好有趣，連我嗰位喺台灣嘅契家姐都話好想玩，所以之後應該會將哩個故事遊戲拍片嘅，希望唔會變成空頭支票啦 XD
大埔海底的星星
本來 Research 到想做嘅故仔係香港嘅傳說人魚「盧亭」，但諗咗一陣都未有靈感點化成一個故事同遊戲，反而繼續搜集資料下知道大埔喺千幾年之前原來係中國著名盛產珍珠嘅地方，然後「吐露港」、「東方之珠」哩啲名詞同聯想就洶湧而出，東方之珠原來真係曾經盛產珍珠！吐露港唔只係美化，一個港口會吐出好似朝露咁嘅珍珠，簡直充滿詩意！再加上俾我搵到歷史圖畫，解釋當年漁民點樣全裸淨係綁住條繩係咁跳落水採珠，係海中九死一生嘅驚險場面就自然係腦海浮現，所以哩個遊戲都好快諗好同成形。
故事開始係一個喺岸邊喊緊嘅漁家少女「珠女」，好驚又要去採珠會無命返上水，然後就用歷史圖畫介紹採珠嘅方法，之後邀請參加者扮演珠女採珠。扮演方法係：畫一個向下潛水嘅公仔，用絲帶綁喺小朋友嘅手腕，請佢哋伸出好似較剪嘅手指當做公仔嘅雙手，參加者就會一邊聽住故事，一邊去尋找海底嘅珍珠。到佢成功幫珠女採到珍珠後，珠女會講返皇帝會用珍珠嚟做飾物同珍珠末嘅藥效，同珠女退場，我就會接續講返人工養珍珠嘅技術，同埋澳洲西北海岸嘅養珠場，以及香港大埔近年有重新養珠嘅生態保育計劃。
哩個遊戲之所以會成為第二受歡迎，原因之一係故事名直接道出大埔地名，有啲參加者喺香港就係住喺大埔，所以特別容易產生共鳴。
Stories Connected
我講故仔俾人聽，人哋又會講返佢哋嘅故仔俾我聽，哩個亦係我想做故事攤檔，而唔係一場單向嘅Storytime 嘅原因。因為親身接觸同對話咁講故仔、玩遊戲，我可以直接認識到對面哩位聽緊我講故仔嘅人，甚至佢哋願意同我分享佢哋嘅同香港嘅故仔。喺一個無親戚、又無乜朋友嘅新國度，可以用講故仔同其他人連結、構成美麗嘅相遇，都真係用錢買唔到。
我記得第一個埋嚟玩遊戲嘅少年非常體貼，除咗對於我未熟習運作、手忙腳亂嘅狀況，仍然充滿耐性、又好Supportive之外，佢仲留意到我把聲沙咗，好溫柔咁不停講「辛苦晒你喇」、「應該要幫你搵個咪，等你唔洗講得咁辛苦」（其實只係我未夠warm up 同未開聲），咁鬼體貼嘅少年大個一定溝死女！
仲有鐘意潛水嘅女生，話我知喺香港潛水水質同生物多樣性其實唔輸蝕俾澳洲，尤其係墨爾本，真係唔講唔知。
一個喺澳洲長大嘅移民二代女兒同佢曾經住喺大埔嘅媽媽一齊玩大埔星星故仔，女兒對大埔可能只有現代城市嘅印象，反而媽媽答得出大埔海舊名叫「大步海」，而且聽我講吐露港嘅地形海岸點解適合生產珍珠時，充滿緬懷嘅神情，我望住女兒望住佢媽媽，突然覺得我真係可以用故仔連繫住移民家庭之間平日難以浮現嘅情感。
亦有一家五口玩老鼠拉龜定拉雞個陣，媽媽平日一定係好盡心盡力照顧小朋友，而且佢亦會好投入親子時光，所以先會玩遊戲時太著緊，握痛囝囝隻手，哈哈。
勢估唔到竟然有人真係由細「刨」通勝大，哩個年輕嘅先生話佢屋企上一代係喺香港賣雞，為咗要了解幾時係大家「劏雞還神」嘅旺季同好日子，所以一定會熟讀通勝，自然對人們點樣使用通勝同埋通勝英文非常熟悉，所有我覺得難度好高嘅重組句子對佢嚟講都毫無難度，佢仲話返俾我知係由幾時開始通勝由活字印刷轉做現代印刷（好彩我講嘅故仔同文化內容都無出錯啫！），簡直要封佢做「通勝達人」！
個市集超級多人，到五點幾都仲要排隊入場，可能因為人多、現場無冷氣比較焗，所以唔算多小朋友嚟玩，反而係大人見到我個檔口好好奇，然後有人玩個陣附近都幾多人圍觀、八卦吓。或者下一次，我可以建議主辦單位安排我喺啲無咁多人嘅角落頭，咁大家玩嘅空間會鬆動啲，我都唔洗講故仔講得咁大聲 XD
好喇，以上係今次市集嘅分享，希望大家多多支持我繼續創作廣東話 & 香港故仔，等香港人嘅第二代、第三代… 都仲可以透過故仔同遊戲，通往我哋心目中美麗嘅香港文化。或者真實嘅香港土地已經面目全非，但只要我哋一直經營、堅守，大家心中嘅「隱形遊樂場」就一直會存在，直到有天佢再次活現眼前。
