店關起來，轉去台北照顧序大人
幾若年前來礁溪蹛，看到一間店，算簡餐類，餐點嘛誠濟項，有幾仔項宜蘭特色的。店內清氣、束結，有一面壁頂畫宜蘭特色的物件佮風景區，用誠古錐的畫法，頭家講是伊的朋友畫的。我有當時仔欲紮轉去厝內食，刁工去買一个較大的，不繡鋼的便當盒仔去貯，我無愛用紙盒仔，轉去食煞盒仔就愛挕捒。
我有追踪伊的迷眾頁，知影店內的情形。有一站仔，in接受宜蘭縣衛生局的輔導，營養、健康佮衛生方面，通過，店名囥佇宜蘭縣推薦餐廳的名單內底。
疫情進前，是頭家的丈姆，抑是伊的老母佇鬥相共，伊的太太開早午餐店，佇邊仔隔幾若間店的所在，餐點誠好食，生理真好，聽起來開真久矣！礁溪是伊太太的外家，太太佮囡仔一直蹛佇遮，聽起來，伊最近才來開餐館，本來佇台北。
伊的丈姆，抑是老母，較會佮我講話，有當時仔，in佇準備新菜的時，嘛提議頭家予我試食。
疫情期間，伊的太太佇我的社區樓跤店面開一間早午餐店，我去交關的時，佮伊的太太講話，講in誠拍拚，伊講本來彼間早午餐店倩人做，「阮有囡仔愛飼。」想欲加賺一寡仔，「有股東，阮出人工。」無若久，因為社區對in的排油煙有意見，店就收起來。
疫情了後，就看頭家家己一个人顧彼間簡餐店，下晡有歇睏時間，本來是沒歇睏的，伊講生意無好，嘛歹勢共老大人縛佇店內，伊家己做足忝耶！
有一工，佇礁溪人的社團看到頭家貼文，講伊的老爸年紀大，身體無好，欲轉去台北照顧，欲共店拍予人，希望有人來接這个餐館，一寡仔設備佮供應商等等攏會使同齊讓。
無偌久，我看彼間店換做飲料店，應該無揣得接手的人，時間閣趕，那間店就無去矣！我感覺足無彩耶！開一間有特色的店嘛無簡單，除了菜單、萬項物仔愛攢以外，共人客招倚來嘛需要時間，伊按呢共店關起來，轉去陪老爸，是會予人呵咾，講伊有孝，抑是有人佮我仝款，感覺足無彩的。
彼是去年的代誌。幾若工前，我坐公車經過彼間早午餐店頭前，門頂懸掛「頂讓」的牌仔，那間嘛無愛做矣！不知影in兜發生啥物代誌？
