“Lán khì khiâ kha-ta̍h-chhia hó--bô?”A-hûn teh kā A-bûn kóng i siūⁿ beh khì chhit-thô.
“Hó ah! Tú-á hó góa bô tāi-chì, lán tō lâi khì ah! ”A-bûn kóng kah teh pì-sù.
A-bûn siūⁿ-tio̍h sè-hàn ê sî-chūn, i hām A-hûn chhiāⁿ chhiāⁿ sńg chò-hóe, in chū sè-hàn tō se̍k-sāi, sī khò͘-thâu kat sio liâm ê hó pêng-iú.In-ūi in sī chhù-piⁿ, siang-hong ê pē-bú put-chí ah se̍k-sāi, tī siàu-liân teh phah-piàⁿ thó-thàn ê sî chūn, tō lóng ū teh chit-chiap--ah! Che khòaⁿ--khì-lâi sǹg sī "bōng-nî-chi-kau "lo̍h!
In ê pē-bú āu--lâi kóng lán ê gín-á nā-sī tōa-hàn liáu, tō hō͘-in sêng-chhin chò ang-bó͘, in-ūi chit tùi chhiⁿ mûi tek má nā ē-tàng chò ang-á-bó͘ mā bōe-bái lah！ ta̍k-ê koh ē-tàng chò-hóe siàu-liām tông-nî, hō͘-siōng chiàu-kò͘, si̍t-chāi sī chiok chán ê tāi-chì.
A-bûn ê kò-sèng chū sè-hàn tō chiok gâu hām lâng pôaⁿ-nóa, in-ūi lāu-pē sī sêng-lí-lâng, in pa-á ta̍k-kang kap lâng-kheh chip-chiap, kú--lâi i tō chai-iáⁿ beh án-nóa hām lâng kiâⁿ-ta̍h.
Sui-bóng i se̍k-sāi chiok chē súi ko͘-niû-á, m̄-koh i jīn-ûi siōng súi--ê iáu sī A-hûn. A-hûn ê bīn-bô͘-á chiâⁿ iù-siù, sin-hêng sán sán ah, in bú--á lóng ē kā chhēng kûn koh kòa chhiú-liân-á, ta̍k-kang tō kā chng kah súi súi súi. Ū bōe-chió tsa-po͘-gín-á siūⁿ beh hām i chò pêng-iú, m̄-koh i lóng chai-iáⁿ hiah ê lâng lóng sī khòaⁿ i seⁿ chò súi chiah siūⁿ beh chiap-kīn--i lah!
Chit-má tōa-hàn ah! I kap A-bûn ē-tàng chò-hòe ê sî-kan khah chió, i mā bô oàn-thàn, siūⁿ kóng seng chò hó Tâi-gí lāu-su ê kak-sek khah iàu-kín. Ah A-bûn leh? I tō tòe in A-pah chò seng-lí, sì-kè cháu-chông, thang hó thàn-chia̍h ê kang-hu！
In siang-hong ê pē-bú kóng hó in ê gín-á tōa-hàn liáu beh chò chhin chiâⁿ ê tāi-chì, bōe hō͘ in ê gín-á chai. Put-jī-kò, in m̄-chai in 2 lâng pún-té tō lóng ū ì-sù ah! Án-ne kóng--khì-lâi,nā-sī beh kiat-hun m̄-tio̍h tùi-tâng tùi-tâng--ah? Kaⁿ-nā sī-tōa-lâng bô kā in kóng khí niā niā.
In sè-hàn siōng-ài chò ê tāi-chì tō-sī khiâ kha-ta̍h-chhia kiâⁿ-ta̍h, chit-má tōa-hàn nā-sī ū-êng, mā ē koh khiâ kha-ta̍h-chhia lâi pôe-phoaⁿ tùi-hong, in kám-kak khiâ kha-ta̍h chhia sī kā sè-hàn ê hôe-e̍k chhōe--tǹg-lâi!
Ū chit kang, A-hûn beh khì ha̍k-hāu siōng-khò, soah tú-tio̍h chi̍t ê cha-po͘-lâng beh tùi i siáu-ti-ko, A-hûn chiok kiaⁿ-hiâⁿ--ê, i tō kóaⁿ-kín khà tiān-ōe kā A-bûn kóng, A-bûn mi̍h-kiaⁿ khǹg leh, sûi chông-khì kiù A-hûn ah!
A-bûn seⁿ-chò chin kau-chhiâng, i kàu hiah ê sî, hit ê cha-po͘-lâng khòaⁿ-tio̍h i, tō A-pô-á làng-káng, sûi cháu-khì bih ah！I khòaⁿ chit ê chiok siūⁿ-khì--ê, tō kā A-hûn kóng: “Chit tiâu lō͘ m̄-thang kiâⁿ, siūⁿ kòe gûi-hiám ah! í-āu lí beh khì siōng-khò, ài sè-lī, góa ē àm-tiong pó-hō͘--lí, m̄-bián kiaⁿ!”
A-hûn thiaⁿ i án-ne kóng, i chiok kám-sim--ê, i sim-lāi teh siūⁿ, góa beh kè hō͘ i. Siūⁿ-tio̍h chia, i ê bīn lóng âng-kòng-kòng ah! I ê A-bú mā teh siūⁿ kóng hām A-bûn ê chhin-sū ài kóaⁿ-kín tēng lo̍h-lâi, ah bô i beh piàn chiâⁿ chi̍t ê lāu ko͘-niû lo̍h !
Kòe bô jōa-kú A-bûn i tō khì A-hûn hiah thê-chhin, siūⁿ beh kín kā chit ê ū tì-hūi koh chiok súi ê koo-niû chhōa ji̍p-mn̂g, m̄-thang koh tán-lo̍h--khì ah!
A-hûn ê pē-bú chiap-tio̍h A-bûn ê thê-chhin, tong-jiân mā ìn hó, in khòaⁿ ē chhut-lâi i sī chit ê ē-tàng hō͘ A-hûn hēng-hok ê lâng, jî-chhiáⁿ in siang-hong chá-tio̍h kóng hó--ah, kan-nā ah-bōe khui-chhùi, soah hō͘ A-bûn chá chi̍t po͘ khí-kó͘ ah!
In khòaⁿ-tio̍h A-bûn tùi tsa-bó͘-kiáⁿ hiah-nī chiàu-kò͘, sim-lāi chiok kám-tōng.
Kiat-hun liáu-āu, A-bûn mā-sī ē hām in bó͘ khiâ kha-ta̍h-chhia, tâng-chê hôe-sióng gín-á sî-tāi ê kì-tî. In sù-phòe ê hêng-iáⁿ hō͘ in hit-chng ê lâng chiok him-bō͘--ê. Tī in ê tsa-bó͘-kiáⁿ chhut-sì chìn-chêng, in koh ē khì khòaⁿ pò͘-tē-hì, kám-chêng chin-chiàⁿ sī hó kah liân thiⁿ-chhiⁿ lóng kā in chiok-hok!
漢羅版
「咱去騎腳踏車好--無? 」阿雲teh 共阿文講伊想beh去chhit-thô。
「好ah!拄仔好我無代誌，咱就來去ah!」阿文講kah teh 閉思。
阿文想著細漢ê時陣，伊hām阿雲chhiāⁿ-chhiāⁿ耍做伙，in自細漢就熟識，是褲頭kat sio黏ê好朋友。
因為in是厝邊，雙方ê爸母不止仔熟識，tī少年teh phah拚討趁 ê時陣，就lóng有teh chih 接--ah！ In看--去-來算是「忘年之交」落!
In ê父母後--來講咱ê gín-á若是大漢了，就予in成親做翁bó͘，因為chit對青梅竹馬若會當做翁仔某嘛bōe-bái lah! ta̍k-ê koh會當做伙數念同年，互相照顧，實在是chiok ê代誌。
阿文ê個性自細漢就chiok gâu hām人盤nóa，因為老爸是生理人，in 阿爸ta̍k工kah人客chip接，久--來伊就知影beh án-nóa hām人行踏。
雖罔伊熟識chiok 濟súi ko͘-niû-á，m̄-koh伊認為上súi--ê iáu是阿雲。阿雲ê面膜仔誠幼秀，身形sán sán--ah，in 母仔lóng ē kā穿裙 koh kòa chhiú-liân-á，ta̍k工就共妝kah súi súi súi。有 bōe-chió tsa-po͘-gín-á 想beh hām伊做朋友，m̄-koh伊lóng知影hiah-ê人lóng是看伊生做súi chiah想beh接近--伊lah!
這馬大漢ah!伊kap 阿文會當做伙ê時間khah少，伊嘛無怨嘆，想講seng做好台語老師ê角色khah要緊。 Ah 阿文 leh?伊就tòe in阿爸做生理，四界走chông，通好賺食ê工夫!
In雙方ê父母講好in ê gín-á大漢了beh做親情ê代誌，無 hō͘ in ê gín-á知。不而過，in m̄知in 2人本底就lóng有意思ah! Án-ne講 -- 去 - 來，若是beh結婚m̄-tio̍h tùi-tâng tùi-tâng--ah?干焦序大人無共 in講起爾爾。
In細漢上愛做ê代誌就是騎腳踏車行踏，這馬大漢若是有閒，嘛會koh騎腳踏車來陪伴對方，in感覺騎腳踏chhia是共細漢ê 回憶chhōe--tǹg-lâi!
有chit工，阿雲beh去學校上課，soah 拄著一个查埔人beh對伊siáu-ti-ko，阿雲chiok驚惶--ê，伊就趕緊去敲電話共阿文講，阿文物件khǹg --leh，隨chông 去救阿雲ah!
阿文生做真kau-chhiâng，伊到hiah-ê時, hit-ê 查埔人看著伊，就A-pô-á làng-káng，隨走去 bih--ah!伊看chit-ê chiok生氣 --ê，就共阿雲講:「Chit條路m̄-thang行，想過危險ah!以後你beh去上課，愛細膩，我會暗中保護 -- 你， m̄免驚!」
阿雲聽伊按呢講，伊足感心--ê，伊心內teh想，我beh嫁hō͘ 伊。想著chia，伊ê面lóng紅貢貢ah!伊ê阿母嘛 teh想講hām阿文ê親事愛趕緊定落來，ah無伊beh變成一个老姑娘落!
過無偌久阿文伊就去阿雲hia提親，想beh緊共 chit-ê有智慧koh chiok súi ê姑娘chhōa入門， m̄-thang koh等-落--去ah!
阿雲ê父母接著阿文ê提親，當然嘛應好， in看會出來伊是chit-ê會當hō͘ 阿雲幸福ê人，而且in雙方早著講好--ah， kan-nā ah-bōe開喙，soah hō͘ 阿文早一步起鼓 ah!
In看著阿文對查某kiáⁿ hiah-nī照顧，心內chiok感動。
結婚了後， 阿文嘛是會hām in bó͘騎腳踏車，tâng-chê 回想 gín-á 時代 ê kì-tî。In sù-phòe ê 形影hō͘ in hit-chng ê人 chiok羨慕--ê。Tī in ê tsa-bó͘-kiáⁿ出世進前，in koh會去看布袋戲，感情真正是好kah連thiⁿ-chhiⁿ lóng共 in祝福!
*刊tī教會公報社NO.3532期(2019/11/04~11/09)
P.S.向陳明仁老師致敬的作品
