編輯嚴選

初雪（拾陸）

2005年初夏某深夜，長白朝鮮族自治縣，鴨綠江邊。

我同初雪嘅脫北計劃，今晚終於要實行。我喺長白縣嘅鴨綠江邊，望向對岸嘅惠山市，焦急咁等緊初雪嘅出現。

接到佢之後，我哋就要展開漫長嘅旅程，穿州過省咁向雲南進發，然後進入緬甸；目的地係泰國。之後，我會喺泰國等佢出獄，然後一齊去首爾生活。

計劃咗接近兩年，我哋終於可以團聚喇！

遠遠傳嚟一陣好急嘅腳步聲，係涉水嘅腳步聲。我向聲音嘅方向望過去。雖然夜幕低垂，但係憑著月色嘅照亮，我仍然認得，係初雪嬌小嘅身影。

「哥哥！」初雪都見到我，仲叫咗一聲；佢加快腳步，踏上咗河道呢邊嘅沖積平原；我亦都向佢嘅方向跑過去。

呢個時候，一陣警報聲劃破寧靜；探射燈照到初雪嘅身上。

「我哋係朝鮮民主主義人民共和國嘅邊防守衛，立即停止你嘅叛逃行為，否則格殺勿論！」

「初雪，伏低呀！」我向佢大叫。但係佢好似聽唔到咁，繼續跑過嚟。正當初雪跑到距離我大約十步嘅面前嗰陣……

𠹶！𠹶！𠹶！

三鎗過後，初雪停止咗奔跑。子彈透身而過，我清楚睇見，佢身上面嘅三個血洞……

我向初雪衝過去，佢中鎗嘅身軀，正好跌入我懷中。

「哥哥……我……我嚟……嚟咗喇……」一句說話之後，初雪再冇任何反應。

「初雪！初雪！」我抱住佢滿身鮮血嘅身體，傷心痛哭。

＊

然後，我喊醒咗，發現自己坐咗喺張床上面。身邊嘅初雪亦都俾我嚇醒咗，坐咗起身，好關心咁望住我。

「哥哥，你冇事吖嘛？」

我啲惡夢，可唔可以唔好咁真？

Day 18，早飯時間，應該係brunch時間先啱。一如以往，我同初雪落咗酒店餐廳去食早飯。

冇外人喺度，初雪又回復佢掃晒全檯食物嘅本色；坦白講，我真係好鍾意睇住個傻妹食嘢，滿滿嘅幸福感。

「哥哥呀，」佢吞咗口中嘅食物，然後好關切咁望住我。「琴晚瞓覺嗰陣，你冇事吖嘛？」

「哦，我發惡夢啫，冇嘢嘅。」我輕描淡寫咁答佢。

「個惡夢好驚㗎？」佢再問我。

「都幾恐怖㗎……」我唔想講個內容佢聽，於是繼續耍佢。

「你今晚攬實我瞓，可能就唔會發惡夢㗎喇；嘻嘻。」佢傻笑。

「我哋已經攬得好實咁瞓㗎喇；」我都笑咗一笑。「再攬實啲的話，會窒息㗎初雪小姐。」攬得咁實，我驚到時發嘅唔係惡夢，係綺夢囉……

食完早餐，我哋返咗上房休息。我打算今日full day乜都唔做齋hea；老老實實，為咗朴太太呢單嘢，忙又忙過、嚇又嚇過、又俾人搵鎗指心口又盛、連交都打埋，我話我要唞返一日都不為過啫。

我終於有時間檢視一下明根支鎗，不出所料，係國產黑星六四式。其實明根應該慶幸佢手上呢支唔係七七式，否則我嘅推滑架動作、再加上trigger guard上膛呢個聰明得嚟又帶點笨柒嘅設計，呢鑊仲唔係滿清十大酷刑嘅夾手指刑？佢隻食指應該會短咗一截。

我將彈夾裏面嘅子彈逐粒卸出嚟，有四粒；加埋jam彈嗰粒同我開嘅一鎗，即係當時有六飛子彈。如果我唔搏的話，每人一飛，夠殺晒我哋之餘，仲有子彈剩。

我將支鎗化整為零，全部拆開晒，然後我開始檢視滑架內部同鎗管。我用紙巾輕輕抹一下滑架嘅內部，紙巾變成近接黑色嘅深啡 — 呢啲唔係鐵鏽或者火彈痕，係鮮血俾鎗管嘅高熱「煮」過之後、再混合由滑架上面脫落嘅微量二氧化硒所做成嘅獨有痕跡。呢支鎗應該近距離殺過人。

當我仲喺度研究緊支鎗嗰陣，初雪都檢視緊嗰四粒子彈；然後，佢用子彈玩起「 공기 」（GongGi） — 一款任何韓國細路都識玩嘅類似「拋豆袋」遊戲。我唔知原來北韓嘅細路都識玩，睇嚟又係泛朝鮮族嘅傳統遊戲之一。

坦白講，呢個係個非常違和嘅畫面；喺我眼中，初雪用子彈玩 공기 ，感覺上同啲細路喺戰區拆地雷執手榴彈一樣，都係「once you’ve seen cannot unsee」嘅畫面。

「哥哥呀，」還好，佢玩咗一轉就放低子彈停手。「你諗住點樣處置支鎗呀？」

「拆散佢，然後續件掉落唔同嘅街邊垃圾桶。」佢聽完後點點頭。呢招我喺《教父 II》學返嚟嘅；搵唔到咁多支煙囪咪掉落垃圾桶囉。

拆完鎗之後，我檢視我嘅筆記簿，睇返呢段時期攞到嘅料，然後再估計一下我仲要啲乜嘢去完成我嘅故事。

「中國文……」初雪望住我筆記上嘅字。「好似好難學呀……咁多筆劃嘅……」

「其實都幾難㗎，」我答佢。「所以細個讀書都幾辛苦㗎。」

「可唔可以話俾我知，你諗緊乜呀？」佢一臉天真咁望住我。

「我喺度睇緊，究竟我仲需要啲乜嘢資料，去完成我嘅故事。」我唔敢講得太深入，反正佢唔會明。

「咁仲差啲咩呀？」佢仍然一臉天真。

「唔……」我諗咗一吓。「之前東元、韓先生同埋賓館老闆都分別提過朝鮮偷渡者，如果我可以搵到個偷渡者，同佢傾幾句就好喇。」

「偷渡者呀……」佢好認真咁諗。

「係呀，不過，話咁易咩；」我嘆咗口氣。「人哋就算係，都唔敢認啦！認咗俾人遣返咁點算呀。」

「偷渡者呀……」佢仍然回緊帶。

「傻妹，到我問返你：你諗緊乜呀？」我摸一摸佢塊面。

「其實呢……」佢有啲猶豫、吞吞吐吐咁講。「其實呢……我識一個朝鮮嚟嘅偷渡者㗎……不如……我帶你去搵佢吖？」

半個鐘後，「新羅飯店」嘅後門。

初雪帶我走後門、返入去佢工作嘅地方。經過一條曲折嘅走火通道之後，我哋去到廚房。可能係「落場」嘅時間，廚房冇乜人。初雪喺廚房望咗一陣，然後，佢帶我去一個類似備餐位置嘅地方；我見到有個中年女人喺嗰度食緊嘢。

「明月嬸嬸！」初雪好親切咁叫嗰個女人。

「哎喲！小饅頭！（呢句講國語）」中年女人見到初雪，擺低咗碗飯同佢打招呼。「（呢度開始除咗「小饅頭」之外都係係韓文）我嘅小饅頭嚟喇！唔見你咁多日，你去咗邊呀？呢個係……」中年女人對我好有戒心，立即擺出一個保護自己嘅姿勢。

「明月嬸嬸，唔使驚；」初雪拖住我隻手。「哥哥係好人嚟㗎！」

「哥哥？」明月嬸嬸仍然一臉半信半疑。

初雪行咗埋去明月嬸嬸身邊，一邊繑住佢隻手、一邊同佢耳語。

我又一次親眼睇住，初雪點樣以佢嘅親和力去「降服」別人。喺呢段日子，我暫時仲未見過，同佢相處過嘅人，會對佢反感。

幾分鐘後，佢哋傾完。明月嬸嬸行到我面前問我：「咁你想知啲乜吖？」

雖然佢面上仍然係冇笑容，但明顯已經冇咗之前嘅戒心。

「不如我哋搵個地方傾吖？」初說提議。「嬸嬸你一陣幾點開工呀？」

「四點。」佢答初雪。

於是，我哋去咗延邊大學飯堂。主要係貪呢度夠靜，同埋冇人會理你做乜。

我買咗啲小食同飽點，仲有三杯茶。我哋三個就一邊食、一邊「傾閒偈」。

「馮先生，」明月嬸嬸開聲先。「小饅頭話你係香港人，想知道朝鮮偷渡啫嘅事；你點解會對呢啲嘢有興趣？」

「其實我係香港嘅記者，主要係寫緊一隻脫北者嘅故事；」我答佢。「我對你哋喺中國嘅生活好有興趣，想知道多啲。」

「你會唔會寫我個名，同埋工作地方㗎？」佢有少少擔心。

「放心，我唔會寫任何可以識別到你身份嘅嘢。」我向佢保證。

我見明月嬸嬸冇再出聲，於是打蛇隨棍上：

「明月嬸嬸，你嚟咗中國幾耐喇？」

「差唔多三年喇。」佢答我。

「第一次嚟中國？」我問。

「第二次。第一次嚟唔夠半年，就俾人拉到，遣反咗朝鮮……」佢嘆咗口氣。「如果我再俾人遣返一次，應該冇命再嚟第三次喇……」

「上一次點解你會被遣返？」我好奇。

「當時我喺個養雞嘅農場度做雜工，做咗都有四個幾月。某日，老闆娘見我嘅衫穿咗個窿，於是俾咗件舊衫我。點知其中有兩個中國工人，話我向老闆打小報告，於是有獎勵。過咗冇幾日，突然有武警嚟搜查，我就俾人拉咗。報警嗰個人仲當住我面認係佢報警𠻹……」

「咁之後點呀，嬸嬸？」初雪問佢。

「之後？之後我俾佢哋關咗喺市看守所一個星期，然後轉咗去圖們看守所；」佢講到「圖們看守所」嗰陣，初雪望一望我。「圖門看守所係個活地獄，獄警又打我，其他囚犯又打我，我每日嘅主要『工作』就係捱打；幾耐唔記得喇，我諗大約關咗我一個月啩……」

「知唔知點解會俾人打？」我問明月嬸嬸。

「獄警打我，就係想迫供，睇吓仲有冇其他人同我一齊嚟，或者有冇犯罪。佢哋曾經想迫我認搶劫，但我冇做過又點認喎！」明月嬸嬸有啲激動，初雪掃一掃佢背脊。「至於囚犯打人……佢哋打人又邊使理由喎！好多時都係搶嘢食、搶財物呀咁囉！有時純粹係娛樂，或者發洩……又好難怪嘅，一個細細嘅囚室，關住成廿人！又熱又迫，又唔夠食，唔打人搶食，都唔知點生存……」

我嚟咗兩個幾星期，終於見（聽）到一啲似返中國嘅嘢喇。

「一個月之後，佢哋就將你遣返朝鮮？」我再問佢。

「哦。我仲記得，嗰日朝早，佢哋將我同埋其他十幾個朝鮮人綁好，然後帶過邊界。朝鮮守衛將我哋嘅身份資料逐個對，我同另外三四個就跟佢哋嘅指示、企埋另一邊。其餘嘅人就俾佢哋一班守衛推落地下拳打腳踢，佢哋甚至用鎗托打人。打咗好一陣，個個都頭破血流。然後，佢哋隨手喺嗰堆囚犯當中揪咗兩個出嚟，當住我哋面前，用刺刀割開咗兩個囚犯嘅喉嚨……」

「我哋都俾呢兩個人嘅血噴到成身成面都係。呢個時候，守衛同我哋講：如果你哋再敢叛逃的話，你哋嘅下場就會好似佢哋咁……」明月嬸嬸講完之後，面露恐懼之色。

「咁你之後去咗邊？」我問佢。

「勞動鍛煉隊。」嬸嬸好冷靜咁答我，然後擰過頭望住初雪。「小饅頭，你應該知道係乜啦？」初雪點頭。

「其實算好彩㗎喇，喺勞動鍛煉隊入面，都係做苦工開礦，雖然辛苦，但總算唔係要命嘅工作。一日嘅工作完成，點都會有少少粗糧到肚。如果第二次偷渡再俾人捉到的話，就冇咁好彩喇！可能就會好似當日另外一班囚犯嘅下場咁……」明月嬸嬸嘆咗口氣。

「你喺勞動鍛煉隊入面幾耐？」我問佢。

「半年；」佢答我。「半年後，佢哋放返我出嚟。過咗大約一個月，我再次偷渡去中國，一直住到而家。」

「咁危險，點解仲要嚟呢？」我當然知點解，但我希望佢嘅答案可以確定我嘅諗法。

「生存呀！我要生存。」佢好肯定咁答我。「我全家上下七口都餓死晒，如果我唔逃亡，我諗我一早就已經死咗……」

全家上下七口……除咗詫異佢嘅悲慘遭遇之外，我更詫異嘅，係我竟然唔係太震驚。睇嚟，要令到一個人變得麻木不仁，其實唔係一件咁難嘅事。完成呢次嘅採訪之後，我諗我真係要淨化吓自己；否則，我將會變成另一隻「係咁㗎啦」港豬。

「小饅頭……我嘅鬼靈精小饅頭……」明月嬸嬸捉住初雪、古古惑惑咁笑。「馮記者係咪你男朋友呀？」初雪冇答佢，淨係耷低頭傻笑。

「唔好返朝鮮喇你……」明月嬸嬸繼續開佢玩笑。「做個中國新娘咪幾好囉！喺呢度落地生根，生返幾個小小饅頭……」

「嬸嬸笑人嘅……」初雪繼續傻笑，但隨即收斂笑容。「咁容易咩……你應該明白啦……」明月嬸嬸聽到呢句，亦都收起笑容。

「嚟咗三年，有冇諗過之後嘅日子點樣過呀？」我再問明月嬸嬸。

「唉……」佢嘆咗一口大氣。「偷渡者又點會有將來呢？一日係偷渡者，一世係偷渡者。我就算喺中國住三十年、四十年、五十年都好，我呢一世都唔會成為中國人。就算有人肯娶我呢個又老又醜嘅女人，只要有人舉報，就算我嫁咗過嚟幾十年都好，都係要遣返朝鮮……怪只怪我喺個唔應該生存嘅地方生存落嚟……」

聽完最後呢幾句說話，我同初雪都唔知應該點安慰佢。

傾完之後，我哋送咗明月嬸嬸返去飯店。臨走之前，佢指一指後門對面嘅一個小門口，同我講：

「呢度係飯店嘅乾貨倉，我呢三年就住喺裏面。飯店包我伙食，俾地方我住；每個月仲俾返一百蚊我。佢哋對我算係咁喇……我聽過有中國老闆，專門請朝鮮偷渡客工作，然後到出糧嗰日就報公安拉人……」

我唔知係個心過意唔去定點，我將銀包裏面嗰五百蚊俾咗明月嬸嬸，同佢講：「呢少少錢，希望你收咗佢，當係喺中國生活要嚟旁身嘅應急錢啦。」

我知道以明月嬸嬸嘅經歷，呢啲錢佢唔會亂使。如果喺某日發生一啲「意外」的話，我希望佢手頭上有啲錢，可以救佢一命。喺中國，五百蚊可以係一道菜，亦都可以係一條人命。

「多謝你，馮記者。」佢同我點一點頭，然後收起啲錢。「小饅頭係好純嘅女仔，你要好好照顧佢。」我都同佢點一點頭。

離開飯店之後，我問初雪：「點解明月嬸嬸叫你做小饅頭嘅？」

「嘻嘻！哥哥唔准笑人㗎……」佢傻笑。「明月嬸嬸知我為食，於是成日將客人食剩嘅小饅頭留返俾我。夜晚收工後，如果冇客人的話，我會將晚市客人飲剩嘅酒收起俾明月嬸嬸，然後我哋一齊飲酒食饅頭。日子耐咗，我就變咗『小饅頭』喇……嘻嘻。」

可能，呢個世界嘅最底層，的確係個為生存乜都可以發生嘅地方；但同時地，喺呢個冇人睇得起嘅底層，先至會有啲咁真摰嘅友情。或者，呢啲就係「患難見真情」 — 你唔「患難」，又點會「見真情」？

（待續）

本故事人物及情節如有雷同，實屬巧合。