喺「首爾」之前，呢個城市叫「漢城」；漢城係一個大得令人好疲累嘅城市。唔止一次，我喺返工或者放工嘅時間，迷失咗喺熙來攘往嘅交通或者人群之中。唔係盪失路嗰隻迷失，係突然間個人變得好迷惘，明明有目的地，但係突然唔識點去、突然唔知應該點去、突然唔想去。揸緊車、搭緊地鐵、或者搭緊巴士，我都試過咁迷失。
喺民宿休息咗一晚，第二朝早上，我依照約定，搭地鐵去到一個叫「江邊」嘅地鐵站，教會嘅辦事處就喺距離地鐵站大約10分鐘嘅腳程。
漢城令我最迷失嘅其中一樣嘢，就係無論你喺邊個地鐵站趷個頭出嚟，街外嘅環境都係差唔多：一條人多車多嘅馬路、一群又一群嘅人潮、一幢又一幢嘅高樓大廈。三年時間，我能夠認到嘅地方仍然唔多。喺教會嘅辦事處入面，我哋嘅傳道人曹先生正在等緊我。曹先生係美籍韓人，未慕道之前係個公務員（我預視到如果我留喺美國打政府工嘅下場），我哋喺佢嚟漢城傳道之前喺教會見過面，但冇傾過計。佢見我嘅主要目的，係試吓我嘅oral English喺咪美國口音，同流唔流利；佢覺得ok的話就會帶我去見校長。
「我英文得唔得？我用英文問候你娘親都仲得呀！」當然，呢句嘢我只係心諗，面上仍然係一派必恭必敬；畢竟大家都係同一個字頭（教會），真係咁串嘴我唔驚你同阿公（即係我個牧師，罪過罪過）篤我背脊咩！
曹先生睇完我嘅學歷，同我閒話家常咗幾句，就話帶我去見校長。我見佢講得咁輕巧，心諗學校都應該係喺附近啫，於是隨口應承。
點知原來要搭成個鐘嘅地鐵。
學校嘅地點喺地圖嘅另一個方向，離開咗漢城，喺京畿道一個叫「高陽市」嘅地方，亦即係早幾年啲港女睇到成地水（口水，咪亂諗）嗰套『來自星星的你』嘅影廠所在地「一山」（其實差咗兩三個站嘅路程，不過都係一山區）。由教會辦事處搭地鐵唔知邊條線去到一個叫「馬頭驛」嘅地方，連埋轉車一個鐘有多。
諗返起其實都覺得自己幾潮，當年全智賢都唔知高中畢業未我就喺度蒲喇，超！
馬頭驛當年係一個幾純住宅區嘅地方，一幢幢唔係現代就係韓進新簇簇嘅住宅。由車站再行十分鐘，就到咗馬頭一洞，即係學校嘅所在地。
學校嘅位置就喺Tofel個招牌嗰層，當年呢頭冇咁旺，如今經已面目全非；學校據聞亦幾度易手。
校長係一個叫Esther嘅中年女人，身材瘦弱、陰聲細氣。唔知點解，就算佢笑嗰陣，我都覺得佢係一臉愁容；佢講嘢嗰陣我要好留心，一來因為佢嘅口音，二來係因為佢太細聲。
學校位處於一座小型嘅社區商場入面，大約有十個課室。Esther帶住我一邊行一邊講，大約係解釋一下學校嘅近況，要教嘅英文級別等等。然後就話我聽簽證學校會幫我搞，學校會提供宿舍，距離大約五分鐘嘅腳程。然後佢又話我聽，學校係時薪制，每日教幾多班就有幾多錢；冇堂嘅時間學校唔會理會我哋嘅活動，即係暗示我哋可以兼職賺外快。
兼職？我連韓文一二三都唔識呀，兼咩唧兼！做洗地定做鴨？
最後，Esther同我講：「你喜歡的話，聽日可以開始返工㗎喇；宿舍我今日會準備好。」
但係，我真係未諗清楚喎。
（待續）
