2020年9月9日
巴士司機事件繼續被炒作，一眾網媒已經爭相出片，示範巴士司機用士巴拿調教倒後鏡。就係一支士巴拿，就可以告你藏有攻擊性武器；如果一個唔好彩我被搜車嘅話，咁我就死梗喇，我架車長期有一頂安全帽，一對安全鞋，一件反光衣，一把鉸剪，一把鎅刀，照以上嘅表面證供，我將會被視為一個暴徒，持有超過一件攻擊性武器，就算我唔喺示威現場出現，班狗都會屈我去緊或離開示威現場。在現今社會，我冇辦法唔係咁諗㗎噃，腦海再次浮現出：【有咩同法官講。】
你老幾，幾時到你講嘢譚得志（快必）嗰單，後續嘅報導較少，因為佢真係去得好盡， 企得好前。 我相信佢都係為陳志全（慢必）犧牲嘅。快必出位嘅言論，囂張嘅態度，令到好多對正苦有反感嘅人有所共鳴，有少少似英雄嘅形像出現，不過佢嗰單畀巴士司機擁有一支士巴拿複雜好多。你真係要去咬文嚼字，先至知道來龍去脈。
快必擺街站時所叫喊嘅一連串口號，如：「黑警死全家」、「解散警隊」、「721唔見人 831打死人 10月1槍殺人」…等等，對控方嚟講都係大話，誣捏緊政府。
例如：
「黑警死全家」：喺每一個機構裏面，總有一啲害群之馬，包括警隊，而呢一班害群之馬，總有一日會畀天收，受到法律嘅制裁，令到佢哋嘅家庭受到某一種程度嘅影響。快必只不過係發洩佢對警察濫暴嘅情緒，而用咗個激嘅措詞，佢冇叫你哋剎點黑警，或者去殺死佢哋嘅家人。但對於某一啲人嚟講，佢就係去煽動其他人，去仇示整個警隊。
「解散警隊」：快必進一步去表達對投訴機制嘅不滿，表示投訴機制不平衡；即係警隊內部調查，要檢討嘅係，自己人查自己人。面對咁大規模嘅投訴，要處理咁多自己人，係咪可行嘅呢？
「721唔見人 831打死人 10月1槍殺人」：快必叫嘅呢一段口號裏面，响721，警察冇唔見人，警察唔係唔見人，只不過遲咗三十幾分鐘先到。831有冇打死人，警方聲稱無，但到而家我哋都唔知道事實，而10月1槍殺人，警方聲稱警員只係自衞開槍，冇開槍殺人。所以嚴格嚟講，快必只係將自己嘅觀點講咗出嚟，冇去客觀咁講出事實嘅真相或者疑點，有機會令人聯想到嗰三日真係發生咗啲咁嘅事。
不過每一個人都有自己嘅思想，去理解一件事情，好難單單畀人講咗兩句，就會覺得件事係咁樣。要有好多媒體，好多報道，先至可以改變到人對某一件事嘅理解，除非可以搵到無可反駁嘅證據，否則好難單單靠一個人嗌兩句口號，就會改變到其他人嘅思想。
國安法嘅實施，除咗要令到人唔可以上街抗爭，仲可以禁聲，等其他人聽唔到有別於國家要我哋見到嘅嘢，等我哋唔好胡思亂想。因為當人一有思想，就會做出一啲預計唔到嘅事。所以，未來嘅日子要安安分分，做你需要做嗰粒小齒輪，不要存有非份之想，好好享受領導給你的自由吧。
