編輯嚴選

《#性事傳紙仔》- 我地係點樣知道自己性傾向？

撰文// 馬天娜

上次有朋友投稿問我：「我地係點樣知道自己性傾向？」

我會覆兩個詞語：探索，同埋碰撞。

同我地對其他事物同行為嘅喜惡一樣，相信好多人都係喺成長環境同過程中，不斷探索。喺一堆問號、不安同埋說不清嘅情感之中，一步步確認自己嘅性傾向。有人可能生活喺非常嚴謹同高壓嘅家庭教育，內心可能會有好多掙扎；亦有可能有人成長喺有中性打扮長輩嘅家庭中，細個不經不覺中就有接觸到不同性別氣質。亦有人面對現實，「人生階段」嘅大潮流，加上朋輩影響，進入所居地嘅婚姻制度，經歷過不同關係階段，之後想有改變，都唔定。

過往會有人提出：「你對邊一種性別有性衝動，或者想有肌膚之親的想法，你就係有對嗰個性別嘅性傾向。」你亦都可能喺網上見過不少心理測試，都係僅供參考。

除左上面比較主流的方法，隨住多咗人提及無性戀（Asexuality）同埋無浪漫傾向（Aromantic），主流的方法都未必可以令自己確定到傾向。當然啦，到底你係恐性，定係無性，呢個就係睇你同你的成長同生活環境嘅關係。

面對主流大衆，面對異性戀常規，性小眾都有越黎越多嘅專有名詞，我地反而唔需要急住認領一個標籤。網上面有好多圖表，到底邊一個可以俾到你覺得最適合自己嘅描述呢？會唔會近排喺一個交叉點，過幾年，遇過不同人之後，你可能會有改變？

認清自己的第一步，就係接觸不同字詞、不同圈子。真係聽唔少年紀比我大嘅人講出到社會之後先接觸到lesbian/gay呢啲字眼架！，先慢慢去體會自己感受，用你嘅說話去形容自己喜好/傾向，你總有一日會知道答案。

記住，無人可以幫你你判斷性傾向，因為只有你自己最了解自己。