愛真係可以重新嚟過？《大亨小傳》

（注意：此文有透露書中部分情節）

1925年出版嘅《大亨小傳》已經成為美國嘅殿堂級作品，出現喺多個「世紀百大」書單上。從今年開始，《大亨小傳》進入公有版權領域，大家可以上古騰堡網站免費下載英文原著嘅電子檔閱讀。

睇呢本書時，即使讀嘅係中譯本而唔係原文，都能夠察覺作者嘅文筆真係好優美。佢描寫景物同人物神態時落咗好多筆墨，寫得十分生動細緻。譯者張思婷嘅巧思亦令人讚歎。

故事情節並唔複雜，主要人物不足兩掌之數。作者透過筆下一個年輕敘述者Nick嘅雙眼，描述發生喺住喺佢隔籬嘅痴情男子Gatsby身上嘅種種。Gatsby付出一切，就只係為咗一個名叫Daisy嘅富家女。佢名車大宅、綾羅綢緞，咩都有；佢夜夜開派對，高朋滿座；但佢心裏最想要嘅，就好似海灣對岸嘅綠色小燈一樣，可望而不可及。作者用生花妙筆將上流社會嘅派對寫得活靈活現，但越係熱鬧嘅場面，就越映襯出Gatsby內心無可填補嘅空虛。

Gatsby對Daisy嘅執念固然動人，佢多年之後同Daisy重逢嗰刻嘅手足無措亦非常可愛，但我會諗，就算愛真係可以重新嚟過，邊個保證迎來嘅係美好，而唔係失望呢？回憶總係甜蜜，得唔到嘅人總係完美，但現實中嘅對方同心裏建構嘅對方可能已經相距甚遠。拖手嘅時候當然要珍惜，但鬆手之後都要記得，勞燕分飛係一定有原因嘅。（「忘了愛。過去的就讓它過去，曾經畢竟只是曾經。」此言並非毫無道理。）

對比故事前段嘅紙醉金迷，故事結尾鋪陳嘅係人情冷暖。仔細一諗，「以利交者，利窮則散」，用真心去結交嘅朋友都唔一定肯用真心去對待你，用酒肉去結交嘅所謂朋友，到頭來有咁樣嘅表現，又有幾意外呢？

作者：F. Scott Fitzgerald
譯者： 張思婷
出版社：漫遊者文化
出版日期：2015年8月
原著出版年份：1925年
電子書：讀墨、Kobo、Bookwalker、Kindle、Google Play