Tha̍k "Guns, Germs and Steel" ê kám-sióng - tē-gō͘ phiⁿ

Tè-kok ê chhut-hoat-tiám sī hong-hù ê si̍t-bu̍t （chia̍h ê mi̍h-kiāⁿ）. Ū kàu mi̍h-kiāⁿ chia̍h, tō ū khó-lêng kè-sio̍k chìn-hòa lo̍h-khì, hoat-tián chhut pēⁿ-khún（Germs）, hóe-phàu, kǹg-thih, bûn-jī, hok-cha̍p ê tiong-iong chèng-hú, téng-téng.

Koh-kóng chi̍t-pái, Jared jīn-ûi, siā-hōe chìn-hòa ê ki-chhó͘ sī lông-gia̍p. Seng-ū lông-gia̍p, sè ê siā-hōe chiah-ū khó-lêng （m̄-sī it-tēng）chiām-chiām piàn-chó tōa ê siā-hōe.

Jared ê chheh ê tē-saⁿ pō͘-hūn, tō leh soat-bêng lông-gia̍p siā-hōe, án-chóaⁿ chìn-hòa kàu chhin-chhiūⁿ Se-pan-gâ lâng kâng-khoán, ū-hoat-tō͘ sái-chûn tō͘-kòe Tāi-se-iûⁿ khì cheng-ho̍k Inca tè-kok.

Ì-gōa ê sī （m̄-koh tōa-pō͘-hūn ê lâng i-kēng thiaⁿ-kòe chin-chē pái）, chiàn-cheng m̄-sī Se-pan-gâ lâng cheng-ho̍k Bí-chiu chú-iàu ê hong-hoat. Koh-khah ì-gōa ê sī, Se-pan-gâ lâng m̄-sī tiau-kang án-ne chòe ê -- pēⁿ-khún kèng-jiân sī chú-iàu ê goan-in.

Se-pan-gâ lâng in-ūi hoat-tián lông-gia̍p chin-chá, pau-koa chhī tōng-bu̍t - koe, gû, ti, iûⁿ kap kî-tha ê cheng-siⁿ/ka-thiok. Só͘-í Se-pan-gâ lâng m̄-sī khah-chá tio̍h si̍p-koàn tōng-bu̍t iû-lâi ê pēⁿ-khún （khah-chá ū siā-khu bián-e̍k）. Pháiⁿ-ūn ê Bí-chiu lâng, in-ūi bô siā-khu bián-e̍k, só͘-í chi̍t-tōa-pò͘-hūn ê lâng tō hō͘ pēⁿ-khún thâi-thâi sí khì ah.

Bûn-jī sī tōa-hêng lông-gia̍p siā-hōe ê lēng-gōa chi̍t-ê tiōng-iàu ê hoat-bêng. In-ūi bûn-jī ê hoat-bêng, tì-hūi ē-sái khah kán-tan thoân lo̍h-khì.

Bûn-jī bô-it-tēng lóng-sī ka-tī hoat-bêng ê. Chin-ū khó-lêng sī in-ūi siā-hōe kap siā-hōe ê kau-liû, koh-ū bûn-jī chin-chiàⁿ hong-piān ê só͘-chai, só͘-í keh-piah ê siā-hōe, ē siūⁿ-beh lī-iōng i-kēng ū ê bûn-jī lâi chhiong-si̍t ka-kī ê seng-oa̍h. Au-a tāi-lio̍k, put-chí ū hoat-tián tōa-hêng lông-gia̍p ê ki-chhó͘, pí-khí-lâi khah hong-piān ê bō͘-e̍k tō-lō͘, mā hō͘ bûn-jī ê phó͘-ki̍p（thóng-tī kai-kip）ū-hoat-tō͘ sêng-kong.

白話字轉漢字, https://suisiann.ithuan.tw/

#POJ, #白話字, #chiàn-cheng, #chiàn-lia̍k, #GunsGermsandSteel