不專業足球筆記（五）

不專業足球筆記（五）

1. 星期三晚八點，疫情之後復辦既第一個省港盃響旺角場舉行首回合既賽事，港隊今次入選既球員以年青球員同邊緣球員為主，當然其中都有陳肇鈞、孫銘謙呢啲叫上咗位既大港腳，其中新加盟理文既李毅凱仲做埋隊長。

2. 首先有一樣嘢好值得讚賞，就係換咗一班人踢正選都好，果種有收有放既逼搶戰術都好體現到出黎，呢點安達臣真係做得好好。進攻套路我覺得都同大港腳一樣，以長傳為主，配合兩邊翼既快放去進襲廣東隊既大門。

3. 攻勢其實集中響左路為主，所以擔任正選左翼既張憙延Marcus非常搶鏡，多次響左路以個人技術去做出威脅，第一球入波真係黎自佢響左路既傳送，然後陳肇鈞射個世界波入網。

4. 港隊上半場其實係有唔少攻勢，潘沛軒同Marcus都有兩個好黃金既機會，其中以潘沛錯失咗一次單刀最可惜，把握力係無論大港腳定呢隊以年青球員為主既香港隊都要力求進步既一環。

5. 上半場中段開始，香港隊稍為收後少少防線，令廣東隊多咗時間響後場猜波，但真正有威脅既埋門並唔算太多，有次近射唔中目標，另外都有一次右路傳中，曾以行禁區入面跣腳，對方任頂，好彩冇事。

6. 我覺得上半場成隊表現得好好，係曾以行踢右閘唔知係咪唔慣既關係，啲位企得有啲唔係幾好。聽旁述講話佢響英國仲未拎到工作證，淨係跟操冇得出場比賽住，而且唔係踢佢慣常既中堅位有影響。

7. 下半場Marcus響反擊之中傳咗比孫銘謙，孫銘爆贏對手左閘之後，沿左路壓入禁區，然後橫傳比潘沛，射成二比零。潘沛都好有心，入波之後做咗個J字手勢出黎，獻比啱啱響德國過身既港隊、愉園球迷James。

8. 之後話就話廣東隊控球較多，但實際上兩面既攻勢都差唔多，各有半chance，但大家都把握唔到。

9. 廣東啲球員係幾高大，而香港球員睇落好細粒，但落到場拍落去既時候，對抗性都唔差。不過大家踢落都好肉緊，都有小小飛沙劈石既感覺，而球證老實都唔算好控制到個場面。希望班港腳作客保持健康，唔好唔記得當年黃威比盧琳踢到腳都斷埋。

10. 今場好多個球員都踢得好好，最搶眼既有余在言Jesse、林衍廷Fat Gor、Marcus、少爺仔，後防既鐘樂安同埋隊長阿凱都好令人安心，最後謝家榮面對唔少高空波都冇有怕，喜見佢哋既成長。尤其是阿凱，佢自從亞運之後真係好似升咗一個level咁。

11. 次回合會響2月7號舉行。

#不專業足球筆記

#香港隊勁揪 #香港隊

#省港盃 #香港對廣東

#香港2比0廣東 #潘沛軒 #陳肇鈞

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

如果有興趣睇下我既其他寫作作品，可以上leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上https://www.penana.com/membership_plan?id=52938 或者https://m.penana.com/stream?id=52938