香港侍應趕客盲目追求翻桌率 無品牌保護意識害自己失業

1｜餐廳兩極化

話說雖然「復常」咗，但感覺到個市真係麻麻，特別係餐飲業。以前無人排嘅餐廳，一係執咗笠，一係苦苦死撐，都係無乜人流。而以前要排長龍嘅，依家假日晚市基本直入唔使等位。由7點入到去，食到8點，發現間鋪竟然半空，做到一輪生意咁大把。

2｜侍應態度奇差 趕客成日常

喺灣仔返工食lunch都算多選擇，乜價位都有。小弟多數食60-90呢個價位，港台泰越餐廳都會食。但發現到啲侍應態度越來越差，成日趕客。例如見過隔離枱兩個人食完飯，飲緊檸檬茶，個侍應行去叫對方飲快少少，好多人等。我又試過同同事食飯，佢差隻炸雞翼未食，個侍應行去打斷我哋傾偈，問佢仲食唔食，話出面好多人等緊。

攝於香港（Alex，2024）

3｜短視的前線會害自己失業

老實講，出面多唔多人等又關我咩事？有良心嘅客會食快少少讓返個位，但都未食完又點讓呢？況且放lunch都會想行出公司，唞多一陣，而非趕頭趕命食完走人。明白前線侍應見條龍好長，會想做多幾轉，賺多幾枱客，但有冇諗過食緊嘅客會點諗？如果個食客因為體驗唔好而下次唔返來食，變相賺到單次生意，但長遠蝕咗個回頭客。最後贏粒糖輸間廠，餐廳結業，自己份工都保唔住。

4｜普通餐廳都要保護品牌

唔係得大公司先要保護品牌，細公司都要。中低價位嘅餐飲業單筆利潤好少，無可能好似高級餐廳噉有幾枱客就回到本，好多時要靠薄利多銷。而其中一個重點係睇客人嘅LTV（Lifetime Value），如果個客成日來幫襯，仲會帶人來，又會推介比人，真係要好好留住。傳說搵一個新客嘅成本係留舊客嘅3倍（希望未過時）。中小企餐飲業本身做宣傳嘅預算已經唔多，而食客因前線做得唔好而流失，最後面臨倒閉嘅結局都係正常不過。

攝於東京（Alex，2024）