我老母過身了後，佇準備訃音的時，我的大漢小弟佇line頂面講：「小美的先生是查某的。」我講：「伊毋是小美的『先生』，是小美的『太太』，伊是咱阿母的『孫女媳』。」小美是阮大兄的查某囝，大兄離婚了後，囡仔攏綴老母，佮阮誠久無聯絡矣！大兄幾若年前過身。
我閣寫：「男同志的配偶，互相是對方的『先生』。」我建議大漢小弟去問小美佮伊的太太，伊的太太的名有欲寫無？看in家己的意見，嘛去問禮儀公司的人。訃音印出來，寫「孫女媳」。
進前，聽講公家機關提出來的表格，承辦人共欲申請的同性伴侶講：「恁家己去講好，誰人做『翁』，誰人做『某』？」佮囡仔有關係的：「啥人寫做老爸，啥人寫做老母。」予in無奈閣受氣，嘛毋知影欲按怎寫？聽講落尾表格有修改。公家機關佮任何單位、公司，逐家攏慢慢仔來學。
結婚了後，別人欲按怎稱呼？in欲按怎共親情、朋友介紹家己的先生、太太呢？華語佮台語有一點仔無仝款，華語已經有表出來，我感覺誠簡單了解，我佇網路頂面，猶無看著有人佇講台語按怎稱呼？我舉例佇下面：
誰人的配偶／華語＼台語
（￭— 原來的稱呼；○—厝內面的同志結婚了，＊台語的部份，逐家來想看覓）
￭後生的太太／媳婦，子媳＼新婦
○查某囝的太太／媳婦，女媳＼＊
￭查某囝的先生／女婿＼囝婿
○後生的先生／子婿＼＊
￭阿兄的太太／兄嫂＼兄嫂
○阿姊的太太／姊嫂＼＊
￭阿姊的先生／姊夫＼姊夫
○阿兄的先生／兄夫＼＊
￭小弟的太太／弟媳＼弟婦仔
○小妹的太太／妹媳＼＊
￭小妹的先生／妹婿＼妹婿
○小弟的先生／弟婿＼＊
￭阿舅的太太／舅媽＼阿妗
○阿舅的先生／舅丈＼＊
￭阿伯的太太／伯母＼阿姆
○阿伯的先生／伯丈＼＊
￭阿叔的太太／嬸嬸、叔母＼阿嬸
○阿叔的先生／叔丈＼＊
￭阿姨的先生／姨丈＼姨丈
○阿姨的太太／姨妗＼＊
￭阿姑的先生／姑丈＼姑丈
○阿姑（老爸的姊）的太太／姑姆＼＊
○阿姑（老爸的妹）的太太／姑嬸＼＊
