家不成家 | 《Sweet Home》觀後感 (極度劇透，慎入)
說在前面
本公子在此不詳述《Sweet Home》創作背景，畢竟都係吐糟文，重點返回故事和劇本上。因為要吐糟，今次我會用多一點廣東話口語來寫，應該較為傳神。
利申，本公子無睇過韓國漫畫原版，只係睇過Netflix果三季影集。
以下極度劇透，諗過先好睇！
故事簡介
第一季
成個故仔好簡單︰某國忽然出現一群忽然變成怪物嘅人類，佢哋會殺人。某幢大廈「綠之家」住咗一班基層，裡面啲人忽然變咗怪物。男主角車賢秀諗住自殺，點知佢發現自己出現變怪物嘅特徵，即係狂流鼻血，所以佢唔想死。因為外面好多怪，主角同啲居民逼住留響「綠之家」，但係啲居民亦陸續變成怪物，即係外面又有，裡面都有。之後又好多人黎咗「綠之家」，為咗生存，大家一齊打怪。最後因為怪太多，人亦死得多，最後大家要著草，離開「綠之家」。片尾遇到班軍人，全部人畀人捉晒。
呢一季嘅資訊係︰怪物化原因係慾求不滿，有某一種強大嘅慾望，就會變成相關嘅怪物。
第二季
主要講班軍人「烏鴉部隊」去咗一個大球隊，話係保護一班平民。主線係女主角李恩宥，響個球場生活嘅片段。呢一季集中講人性，但韓國文化我真係唔理解，好多時都入唔到戲。故事中另一條線係講消防員徐伊景生咗個女，但阿女出世時已經係怪物，而呢個女嘅能力可以使人變成怪物。而男主角主動畀人捉咗做研究，希望協助個科學家做回復藥。然後男主角就被開發出能夠進入怪物思想，又能夠幫佢哋回復返人類意識嘅能力。
最後講有個軍人為咗條女，單人匹馬去怪物巢穴攞藥，然後一幫好兄弟去搵(或救)佢。之後就見到大奸角，班軍人全部畀人捉晒。總之又係累街坊果啲情節。
呢一季嘅資訊係︰車賢秀可以透過接觸去窺探怪物嘅慾望。有一班人能夠怪物化又保有人類意識，叫半人怪或特殊感染者。男主車賢秀同大奸都係呢一type。
第三季
開場就講，消防員徐伊景一直要搵嘅未婚夫南相原，其實就係大奸。上季尾，徐伊景畀個女陰咗，怪物化咗，但今季開頭畀車秀賢救返，又變返人類。而另一方面，上次去搵同伴果班軍人死淨一個，但又遇到女主李恩宥響第一季失散咗嘅大佬李恩赫。阿大佬發現怪物化之後捱到變特殊感染者，之後返去「心臟」，即係結成蛹，就可以進化成「新人類」。成為「新人類」後，個樣無變，有不死身(應該係可復活？)同整體能力強咗，但係就無晒情感。另外大奸去球場搵個女，諗住用佢個殼變得更強。但同一時間佢條女徐伊景又去球場搵女，咁大奸就殺咗條女，捉咗個女。
最後就所有人集合響球場，車賢秀同李恩赫向南相原挑機。點知最後係南相原控制果個身體本來嘅大叔邊尚昱嘅精神未滅，反控制佢焚身以火，燒膠死咗。(之後就大家一齊BBQ，Happy Ending。)
結局係男一二同女一，聯同死剩果啲人返去「綠之家」，途中又搵到一班「新人類」。大家就響「綠之家」快快樂樂咁生活落去，呢個就係「Sweet Home」喇！
呢一季嘅資訊係︰新人類。
柑想
先講唔好意思，呢齣劇本來好地地，第二季開始就崩壞。(不過仍然好過《驅魔麵館》)
第一季啲怪好正，配合不同慾望變成唔同嘅型態；而打怪嘅節奏同情節都營造得好好。而第一季嘅四大美人亦相當吸晴，女一高旻示(飾女學生李恩宥)，女二李施昤(飾消防員徐伊景)，做到第二季嘅朴珪瑛(飾少女尹智秀)，仲有高允貞(飾護士朴宥莉)。本公子最鍾意李施昤，身型好Fit，顏值又高。另外三位都係顏值相當高嘅演員。
去到第二季，雖然大球場條Line都有靚嘅女角，但感覺都好似奇奇怪怪咁。而班烏鴉部隊又真係好煩。或者係韓國文化，但佢哋果啲態度真係唔理解，一班大隻佬婆婆媽媽咁。而男一車賢秀，本身講到佢好勁，右手變成隻翼，但又係婆婆媽媽咁，超過一半時間都係一個廢人。成季就係睇住女一李恩宥，成個乞衣look咁行行企企。好彩仲有徐伊景可以睇吓，最後怪物化嘅造型亦相當性感。
第二季尾，明明李恩赫青靚白淨全裸咁由個蛹跌咗出黎，咁怪物圍住佢跪拜，但去到第三季，又變返爛面，之後返去個蛹先變返靚仔，劇中又無解釋，係咪畀大奸果班特殊感染者虐待過？
第三季呢，算係有啲良心，至少個故仔肯埋尾。總之大奸就係首位怪物化嘅人類南相原，本身講佢係發現怪物化嘅第一人，之後畀政府捉咗後就失蹤。原來係畀任博士呢位朋友捉咗黎做研究，條友係痴線嘅，成日都想怪物化，但又變唔到。最後就逼到南相原離開咗自己驅體，進入咗另一個特殊感染者鄭毅銘嘅身體。第一季尾就去咗男三邊尚昱身體。不過南相原一直都覺得特殊感染者係最理想嘅型態，所以佢要捉多啲怪物化嘅人，令佢哋變成特殊感染者；另外佢知道新人類係佢哋剋星，所以就取之而後快。
老實講，成套影集最吸引應該係怪物造型同打怪過程，Sor9ry，只有第一季有，另外兩季講人性。頂你，睇人性就睇《寄生獸︰灰色部隊》喇！《Sweet Home》有咩人性講到出黎？咪又係親人變咗怪物，又唔忍心親手對冧佢，啲婆婆媽媽劇情。真係好鬼煩，本來一兩秒做完嘅嘢，拖捉一集，口水鼻涕留晒出黎先肯開果鎗。同埋啲怪係由慾望變出黎嘛，點解第二季有怪係量產？果啲響森林衝出黎嘅怪係一群一樣架！佢哋share埋慾望呀？都唔合理！
最憎係個男一車秀賢，對外能力係右手隻翼，講到好高攻，但係使用起上黎就廢到暈。男二李恩赫嘅新人類仲瀟洒過佢，第三季巴士打鬥果幕，根本就屌打佢。而且男一鍾意李恩宥，一直都唔告白。有咩咁怕同佢人講，條女本身都冧你架啦！又唔會派好人咭畀你，韓國戲就係咁。如果係TXB，上埋床生埋仔分埋手啦！
S3E7，南相原帶住邊尚昱軀體入咗火堆，將主體逼咗出黎，入咗個女軀體。邊尚昱軀體應該燒咗。S3E8，最後決戰，南相原用緊個女嘅軀體打男一二，但個女忽然從裡面反抗，令佢被李恩赫嘅小李飛刀入咗。南相原即時離開個女，走咗入火堆，拎返燒焦咗嘅手下身體出黎(應該係實驗體二號)，但係就畀車秀賢插住黎BBQ。南相原就當然再走。然後李恩赫就出埋啲屎橋，話願意畀南相原走入身體，然後堅持燒到同歸於盡。好啦，觀眾有晒心理準備等男二BBQ後，忽然南相原變返一個青靚白淨嘅邊尚昱身體嘅火堆邊走返出黎！你話係咪要鎅櫈！邊尚昱個軀殼係由S3E7嘅日光日白走入個火堆，而家S3E8都變咗夜晚，都燒咗幾個鐘，你而家仲要無穿無爛咁走返出黎！媽呀，我睇咗咩呀！
好，唔合理都算，當科幻片咁睇。諗住男一二三會有啲動作場面，黎個BL3P，點知真正嘅邊尚昱意識又走返出黎，控制個軀體爬入火堆，仲要堅持到同歸於盡？大佬，想慳錢都唔好咁玩自己。男一二就係咁企響度，食住花生，睇住邊尚昱爬入火堆，之後大奸南相原就GG咗。OMG，個導演係咪有咩苦衷？
而女一李恩宥自己返咗去綠之家怪物化，男一二就帶住啲球場生還者去綠之家。途中遇到一班唔知做咩企咗響度嘅「新人類」！？帶埋佢哋一齊去綠之家。最後男一二響天台見返女一，但佢已經變成無情感嘅「新人類」，要重新學習。不過都好過無，至少都齊齊整整囉！
說在後面
《Sweet Home》啲女角真係幾靚，韓片選女角都係睇顏值。而男一宋江真係好似保錡@Error，而男二李到硯都幾靚仔。
良心啲講句，又唔係差到要棄劇果款，但係韓劇文化真係唔一定人人受得住。不過都推介《寄生獸︰灰色部隊》同《雖然不是英雄》，本公子覺得呢兩齣韓劇都係值得睇。
喜歡本公子文章的朋友，請給我一個小心心，讓我更有動力繼續創作，謝謝！
