遐愛做

●倒糞埽

以早，猶未用塑膠橐仔貯糞埽的時，倒糞埽是共貯糞埽的桶仔提去糞埽車，抑是糞埽堆頭前，直接共內底的糞埽倒出來，倒完，共桶仔提轉去厝內面。

有一擺去同事in兜開講，in某講，in翁倒糞埽攏無共桶仔敲敲一下，共黏佇桶仔內底的糞埽倒清氣，「我無愛予伊倒糞埽，我家己去倒。」

●披衫

有的人（查某）講，厝內面的人去披衫，攏無共衫搝搝一下，共衫搝予平，「無愛予in晾。」

以上２件是真早進前我聽著的，這馬猶有人按呢無？厝內面的工課別人做的無甲意，查某人家己攬來做。我毋知曉。

下面這２件是最近拄著的：

●「我用拖的較省力」

我入去捷運站內底，看著行佇我頭前的一對翁仔某，翁手捾一个普通大的行李袋仔，某共彼个行李袋仔提過來，囥佇塗跤拖，那拖那講：「我用拖的，你浪費力氣。」翁予伊拖，無講話。

我心內感覺足好笑，恁翁用手捾，你毋免出力，你嫌用手捾了力，你搶來家己拖，用拖的用的力是較少一點仔，毋過嘛是愛用力，用著你的力，按呢敢有較省力？省著恁翁的力爾爾，你遐愛出力。

●魚仔愛買生的轉來

有一擺，我坐火車，我的邊仔有一个查某人，佮對面２个少年人是仝陣的。伊坐落來，提出弓蕉來食，嘛予對面彼２个一人一子。

伊家己食了，共皮囥入去塑膠橐仔入底，對面的查某囡仔共皮提佇手，手伸長長，目睭意思是欲予伊，伊行過去共皮提來，收佇橐仔入底。

我佮伊開講，伊講囡仔吵欲出來𨑨迌，喔！彼２个是伊的查某囝佮後生，看in有行李箱仔，我問：「恁欲去佗位耍？」毋知影，「欲佇佗一站落車？」毋知。

講著伊翁出去外面，轉來的時買熟的魚仔轉來，伊共翁講：「你要買新鮮的，我自己煮。」

我講：「咱查某人實在有夠戇，伊買熟的轉來，是伊出錢，咱毋免煮，閣較好食，一半擺仔食便的，嘛袂按怎，何必攏愛家己煮？」實在是誠愛做。

Eric Prouzet on Unsplash