我佇面冊有一篇寫：
「我有同學講，伊佮大家蹛做伙，伊有３个囡仔，嘛咧上班，伊講：「我婆婆不准我先生做家事，所以他不能幫忙做家事。」」
一、有某有囝的查埔人，逃避做厝內面的工課
彼篇下跤有人回應：「這是大家疼家己的囝，毋甘予後生做代誌，欲叫新婦做工課的藉口。」
我昨昏想著，敢講是伊的翁家己無愛做，用老母的話做理由，予伊免做？
我閣想著幾若件代誌：
￭伊的大家是共伊翁應該做的份提去做，抑是徛佇邊仔，看伊無閒。有一站仔時間，伊有身、上班、閣咧讀研究所，因為伊生２个查某囝，大家共伊講，閣生一个，無的確是查埔的，伊就閣生。
￭我的老母佮三兄蹛的時陣，in有一个厝邊仔，翁拄著我老母的時，定定講：「我媽媽說，她已經帶了一代了，不再帶了。」講清楚伊無愛閣𤆬（tshuā）囡仔，無欲做厝內面的工課，我心內咧想，彼个老母誠勇敢，會共伊無愛做的話講出來。In是外省人。有的阿媽無愛做，嘛無敢講這句話。
￭我有一个朋友，結婚了後，才知影伊的翁腰子有問題，換過腰子，身體無好。伊的大家共伊講，袂叫in囝做工課，「伊應該做的份我來做。」
￭我的翁進前攏是７點轉來，那看電視新聞，那食飯，伊認為伊誠巧，會曉省時間。
真濟年了後，我聽較少年的同事講，伊會叫in翁幾點愛到厝，鬥做工課。我哪會無想到遮仔代誌。下班了後，去接囡仔，轉到厝，那煮飯，那看囡仔，食飯、洗碗、共囡仔洗身軀……，攏是我家己一个人做的，伊轉來就認為飯菜囥佇桌上是當然的代誌。我這馬才想著，有機會欲共伊講：飯菜是自天頂落落來的，清氣的衫自動行入去你的衫櫥頂，囡仔「自動」大漢……矣！
￭阮翁講，伊熟似一个營造廠內底的人，有一个小姐誠𠢕（gâu），備料、叫貨、排工程行程……，啥物攏會曉做。有一个工程師佮伊結婚，結婚了後，查埔共查某講：「我的下班時間是晚上９點。」
阮翁講：「按呢in某就袂叫伊做厝內面的工課，伊就毋免做。」阮翁的意思是，伊誠巧，誠聰明。
二、老母佇厝內面的地位佮權力遐懸喔！
我想欲揣佮我的查某孫講台語的伴，想著彼个伊的大家不准伊的翁做厝內面工課的朋友，這２工佮伊聯絡，我寫：「我想跟你聊聊和孫兒女講台語的事情，你們家跟孫兒女有講台語嗎？」
伊回：「沒有誒！我自己也沒講很好」
我：「很多年前，在一間大樓碰到你和你女兒，你說你先生規定在家裡要講台語，講華語的話罰10元。聽起來，你們是台語家庭。現在沒跟孫子講了？好可惜。現在有些家庭跟孩子講台語，你知道嗎？我跟孫女全台語，也招了一團台語囡仔團，和別的小孩一起講台語，只是現在常常沒別的小孩來，我要另外找小孩同伴。」
伊：「我不記得我有這樣講過了，若有那也是因為要讓聽不懂國語的婆婆可以跟我們互動，所以要求小孩講台語，
現在孫子都大了，有一點點聽得懂但講得不好，」
是喔！佮我想的無仝款。我注意著這點：「因為要讓聽不懂國語的婆婆可以跟我們互動，所以要求小孩講台語，」
大家聽無華語，伊可能無讀冊，無看報紙，看電視干焦看台語的。一个人干焦靠生活中家己的經驗，聽人講的，伊家己外巧、外聰明嘛是無夠的，愛讀冊，以早是看冊、看報紙，這馬閣加看電視、網路，較知影其他真濟的代誌佮知識。
「老母」這个身分佇厝內面有誠大的地位佮權力，逐家攏愛聽伊的話，伊不准後生做厝內面的工課，後生就毋敢做，新婦嘛接受，家己做。彼个大家若徛咧無人熟似伊的團體，伊猶有這个權力無？有人欲聽伊講的話無？照伊講的做？
毋是講無讀冊就攏袂曉，愛看是啥物代誌？現代佮古早時代無仝款的代誌，伊毋知影，序細是按怎愛聽伊的？
閣想著２件別人的代誌：
￭進前，我的朋友強欲掠狂：「我公婆沒唸書，不識字，要幫我的小孩取名字。」
￭有一个同事，伊的大家、官是外省人，in號的囡仔名in翁仔某無啥甲意，大官講：「在大陸老家，取名字是長輩的事情，你們看著辦吧！」
伊講：「每次小孩生病，打電話掛號時說：『孫逸仙的逸』，對方問：『孫逸仙是誰？』」
