若是無熟似的電話敲來，有的人是攏無接；我有接，因為可能是診所、衛生中心，抑是公共服務的店來通知我代誌。有的是推銷，有的是騙人的。欲按怎應付？
有的朋友講，伊若接，攏刁工用假聲應，才袂共咱的聲音提去騙朋友。這个時代做人、做代誌誠無簡單。
我用過的方法有：
一、進前，我攏會聽伊講到煞，家己掛掉，予in開較濟的電話錢，哈！若是推銷的，我攏講：「毋免」、「無」、「無需要」。
二、我想欲講台語，頭一句「喂！」了後，對方一直講華語，等伊講停落來，我才講台語。
三、最近，我頭一句用台語講：「啥物代誌？」伊講完，我用台語應「無」、「毋免」。
四、前二工，想著一个改進的方法。拄才欲暗仔，接著一通電話，我用台語：「啥物代誌？」伊是中國的口音：「你有從ＸＸ寄東西回台灣嗎？」我台語應：「無。」伊馬上：「謝謝！打擾了。」哈！誠有用，毋免了氣力講話。
五、我拍算，下擺伊用華語講煞了後，我用台語應：「聽無。」哈！誠好耍。
你的方法是啥物？歡迎講來聽看覓！
