我今年70歲。我少年的時，看報紙、雜誌、冊頂懸的文章，若寫著厝內面的代誌佮人，攏是大家咧講話，用伊的立場、做法來講新婦（予伊看無順眼，抑是袂曉、做法無仝），我咧想，新婦有伊的立場佮看法，佮大家是無仝的，毋過無人寫，我毋捌看過。
我中年的時，拄著講大家官佮新婦鬥陣的時陣的問題，沓沓仔有人為新婦講話，我感覺誠歡喜。紲落來，新婦家己出來講話，講結婚了後，生活上佮大家官（抑有翁婿in兜的人）做伙的時，做法無仝款、無爽快、大家管傷濟的代誌。
這馬有查某囝出來講伊的老母，伊決定欲共老母擲捒，委託「#代理家人」公司服務伊的老母的養老佮送山。雖然伊是日本人，台灣一定嘛有，只是猶未寫出來，抑是我無看著。表示時代閣進一步，有人敢按呢講。
昨昏看著這篇文章，心情足䆀，佮看著剴剴的代誌仝款。剴剴死去，這个作者大漢了後，家己共伊細漢的時予伊老母凌治的代誌寫出來，閣決定欲擲捒老母，伊誠勇敢，這嘛是誠大的悲劇，伊一世人攏愛治療老母造成的傷痕。
細漢囡仔沒氣力，晟養伊的人按怎對待，伊就愛按怎受，家己一點仔嘛無法度。
朱亞君 ◤四歲的我無數次被母親「殺死」，在父親書房裡徘徊於生死邊緣◢
https://www.facebook.com/photo?fbid=23978922731744222&set=a.216625138400648
