Tī《語言學家破解台語》這本冊掠外吸收作者劉賢承先生其他 ê 作品《翻身．番身》佮《倒轉：Voyu Taokara Lâu》這 2 本冊 hōo 我目睭隨金 mā 隨上網搜揣，最後 tī 本底掠做伊無閣接續海外訂單 ê「台灣e店」揣著這 2 本冊隨落單。
講著 ē 掠做「台灣e店」無閣接續海外訂單，彼是我家己 ê 竹篙鬥菜刀 kā 公告讀無 tsiâu-tsn̂g。
總是，我真歡喜家己有閣寫批請教店東確定海外訂單 ê 事項 m̄-tsiah 有機會繼續讀讀其他 ê 台語文作品，增加無仝 ê 眼界。我 m̄ 知影其他國家 ê 文學是啥物生張，總是我真佮意德國文學 ê 生張，無冊腰無落落長 ê 𤆬讀。
講著𤆬讀，德國凡勢有，是我家己智識無夠 m̄ 捌拄搪 niā-tiānn。
Tshan-tshiūnn 這句「niā-tiānn」我 m̄ 捌講過，無表示伊是作者或是分張者無白亂 tsuānn。
是講，我 teh 講我是按怎 bué 著遮 ê 臺語冊交為何 tshinn-tiānn-pe̍h-tiánn 講著𤆬讀。
起因，我發見華文佮台文冊敢若逐本攏需要𤆬讀，𤆬讀 ê 目標是 bueh hōo 讀者閣較理解作者想 bueh 表達 ê 意思抑是贊聲，久長 m̄ 捌讀𤆬讀 ê 我已經無印象。
總是，自接觸台文讀𤆬讀是一件有意思 ê 代誌。
除了伊成做外文冊 ê 紹介𤆬讀掠外，伊 mā 有 tsuē-tsuē 掰會佮分會(hun-hē)。
台文冊我讀猶無到額，不過現此時 ê 我搪著華文𤆬讀原仔 ē 纏綴讀華文冊 ê 態度 kā 伊准過 buē 閣掠外斟酌讀，另外 mā kā 本底 ê ut-náu 轉做題緣金。
起因咱攏知影遮 ê 掠外感心 mā 是算在額，m̄ 是無料提供。
我 ê 臺語文學淺較連紙拗 ê 囡仔船攏無法度浮 tī 水窟仔，不過臺語文學 ê 臺語𤆬讀大多數猶攏讀有捌。
這斗讀這本《Tó-tńg 倒轉》除了〈新鮮台語文〉讀有掠外，其他三篇1篇知捌意思，2篇捎無一个摠到一章節(tsiat)需要兩工 ê 時間 tsiah 有法度讀煞，我 tsiah 理解這段話 ê 意思：
「首先咱 ài 來解說『無 tshàu 無 siâu』tī tsia ê 意思 -- tō 算寫做羅馬字 mā 是 iáu 有臭尿 phuà 味。這對台灣字寫 bē tsiâu-tsn̂g、八音七調標 bē sù-sī ê 我來講，已經是能力 lia̍h 外 ê tāi-tsì。這是老實話，手面連一本字典 to 無 ê 筆者我，無 hit 個才調、mā 無 hit-lō 資格為運動場 ê sian-pái koh 台文界 ê 兄姊解說『無 tshàu 無 siâu』ê 字面...」--- 𤆬讀 P. 15
拆白講，我 mā m̄ 知影啥物是「無 tshàu 無 siâu」，總是我 ê 態度一如向時讀無跳過閬過，huînn-ti̍t 理解通篇意思比狗咬鐵，m̄ 願放閣較重要。
總是，當我發見我無法度 kā 這本小說順順仔讀 hōo 齊，我開始沓沓仔理解成功大學台灣文學系博士候選人施俊州先生 ê 𤆬讀，雖罔我原仔 m̄ 是百面理解伊 ê 意思，總是這段「無 tshàu 無 siâu」佮「手面連一本字典 to 無」hōo 我步頻感動甲流目屎。
起因，tī 車幫讀無 ê 部分倒轉來厝我原仔 ē-tàng 上網請教「ChhoeTaigi找台語」抑無我應當 ē 放棄繼續讀落去 ê 興趣。
Tī 遮我 m̄ 是 bueh 成做呻 buē 離 ê 茶鈷，起因我真感謝天公伯 hōo 我原仔有機會搪著這本冊。
起因，迵過這本冊 hōo 我認捌閣較 tsuē 家己 m̄ 捌 ê 文句 tshan-tshiūnn：
1. 分會(Hun-hē)，華語 ê 意思是 a. 辯解；解說；辯白；理論；爭辯...等等
2. 撮汰(Tseh-thuah)，浪費；糟蹋；作賤...等等
3. 方子(hong-tsí)，驚堂木，啥物是「驚堂木」法官手頭 ê 摃槌仔
足 tsuē 足 tsuē 無迵過遮 ê 作品，我 buē 去搜揣 ê 辭。
規本小說讀煞我愛拆白講，我讀無。讀無 m̄ 是作者刁意故「pué 弄怪巧」是我家己 tuì 台語 ê 語法佮認捌 ê 智識無夠額。Tshan-tshiūnn 出現 tī《語言學家破解台語》ê「大大典典」若 m̄ 是迵過 tsuē-tsuē 作者 ê 筆尾分張，我凡勢原仔 ē kā 青光眼(tshenn-kong-gán) ê 闊度當做六合來指指揬揬。最後，想 bueh 迵過這本冊來表達家己 ê 好字運。我若是 tī 2008 年搪著這本冊，我合該 buē tuì 臺文冊產生遐爾仔大 ê 興趣。起因，無字典遮 ê 家私通配合請教疑問佮隨人寫一字，以我 ê 才情準做寢頭仔讀有落尾在水 ē 讀甲花 lo̍k-lo̍k 紲落來就是反抗接觸。
寫這篇 543 ê 時陣 Google mā 一直 teh 推薦「臺語學仔先」ê 意見。遮 ê 推薦我無揤入去讀，起因連目尾攏貧惰 kā 䀐，想 bueh kā Google 講「M̄ 免閣猜你喜歡」總是我 mā 清楚知影這根本 m̄ 是猜你喜歡 ê 推薦，是 i. Robot ê NS-5 驚人枵 kā 咱攢便便。
總是，我喙白閣 m̄ 捌有一種枵號做 NS-5 驚你枵 ê 疼惜，sòo-pái 見搪著遮 ê 驚你枵食無著 ê 猜你喜歡，我只好心一橫連說聲多謝攏儉起來隨 Verlauf --- Browserdaten löschen。我無想 bueh 研究這枵為何 ē 捷出現，起因我清楚知影家己 ê 脾土。
Kā 人 ê 冊挈出來寫無寫寡讀冊心得真龜怪，所致猶是乞食攑蠓捽仔，假仙假觸一下。凡勢是別人 ê 背景，所擺 buē kā 枷無事夯上肩頭 hōo 家己目頭結或是纓纏 buē 離。Buē 纓纏無表示無感覺無要意，起因我 tuì 遮 ê 故事 tshan-tshiūnn 陳雷(吳景裕醫師) tī 伊 ê 演講分張 ê 相𫝛，每个人有家己 ê 年間。
我 m̄ 是翻譯人員或是速記員 tī 遮 buē 閣餾一斗，有緣讀著這篇文章 mā 有興趣聽吳醫師分張伊 ê 寫作歷程，請搜揣台語文學系列講座——開講台文創作——我ê台文路／陳雷。
遮 ê 故事 m̄ 是我 ê 年間，我無法度改變啥物 mā 無想 bueh 講寡啥物。總是，讀〈Puigcerda Nuevo〉我 ê 海馬鉼針開始纏綴彼當時，人 tī Puigcerda➀、Andorra、France ê 記持佮尊存別人佮咱無相𫝛 ê 理解。
貓徙岫就順手 kā《翻身．番身》敆做一篇做記錄。
頇顢揣台文冊 ê 我 tuì 台文出版 ê 印象是詩 tsuē 過散文交小說，台文出版本呔討按呢生，tuì 這个專業無一个理解 ê 我就斷筆到遮 m̄ 通假做博士博。既然按呢生呔討冬外 ê 這久又閣乞食攑蠓捽 buē 博假博，寫文章？用跤頭趺想 mā 知機，一本冊 hōo 你有印象想 bueh uī 伊記錄寡心情跤跡其中必有緣故。像《翻身．番身》ê〈Puigcerda Nuevo〉hōo 我想著咱認為 ê 清清楚楚，窮實從來 m̄ 捌清清楚楚過，畢竟咱 kan-ta 讀紙本𤆬 hōo 咱 ê 智慧。
《Tò-tńg 倒轉》交《翻身．番身》ê 出版時間拄拄好十冬閣兩月日，這十冬兩月日 ê 變化 tuì 我來講像施俊州先生「𤆬讀」《Tò-tńg 倒轉》ê 心情我讀甲憢疑家己敢捌這个語言，準做伊有註解，我猶是讀甲一粒頭兩个大。比如「2 ê 隨 uì 教室內底 sam-pán-iô 出來，表情 ná 親像 beh 領獎，不止 á tshiā-iānn」〈食罪〉，啥物是「sam-pán-iô」通篇有 tsuē-tsuē 註解，就是無「sam-pán-iô」，準做 kā 這段話當做德文來讀，無讀著動詞做結尾，永遠 m̄ 知影答案來推論「sam-pán-iô」是華語 ê「大搖大擺」m̄-koh 敢誠實是這个意思？咱無愛烏白 ka̋ng 鬥意，咱想 bueh 知影答案，「揣台語」交「教育部辭典」就成做咱 ê 救星到今。當咱認為有教授通 uī 咱解謎，讀《翻身．番身》完全無註解 ê 小說，咱又閣搪著相𫝛 ê 問題捌字 m̄ 捌意，大丈夫拆字爿請教授 uī 咱解題，有 ê 教授有回應，有 ê 教授 mā 雙手剖西瓜講「no sé」搪著這个情形，我學著放輕鬆，跳過閬過 tshan-tshiūnn 聽德國政治人物講政治，規逝演講聽煞越頭請教夜間部同學恁政治家敢 teh 表達遮 ê 意思？
十冬閣兩月日 ê 變化敢是作者話頭 ê「想講咱寫 tse，看無 ê 人看無，看有 ê 人嘛無定著會看，有看 ê 人 to 也無定著看有內底 ê 機關....」這點，我想 bueh tuì 作者講我有讀也知影機關交感覺好讀，不而過我個人 tuì「話頭」閣較有感想，像寫台文 ê 因端，參加比賽 ê 想法，攏 hōo 我跟綴遮 ê 文字巡家己 ê 想法。
我交作者相𫝛「無食褒袂死」所致按痞客邦沓沓仔 kā 一寡文章徙到方格子，這兩搭屬於我個人 ê 圓湠圓，有人來讀，無人來讀 tuì 我來講齊是 Alles hat ein Ende, nur die Wurst zwei 一屑仔齊無要意，「若猶會要意欲寫、欲愛人讀，攏是為著台語」我無作者 ê 使命感，總是我感謝家己出世 tī 這个美好年閣，有機會我口我寫 hōo 家己 ê 鹹酸苦甜汫有機會迵過固定 ê 文字翻草，畢竟頇顢人無才調這久寫「七逃」後回寫「佚迌」，紲落來幾冬無見翻頭餾心事猶有才調認出伊是 tsiâ？
「頭前講為著比賽咧寫...若欲比賽，kám 毋免寫予評審佮意，干干仔咱無按呢想，干干仔咱 to 欲寫家己愛寫--ê，欲寫家己感覺有意思--ê。」初寫台文投稿是 Muse ê 相放伴，無投稿電腦敲 buē 出半字，總是凡勢咱有歲頭，囡仔時立願家己開一間學校 hōo 學生仔自在做家己 ê 願望，順投稿過程沓沓仔翻頭轉來相揣 hōo 我漸漸仔理解 m̄ 是咱𠢕寫，是目今 ê 市場猶有空間 hōo 咱 ê 䆀筆花發穎，一理解這點，Muse 免來監工我 mā 有才調敲一篇全台文 ê 廢話。
最後，利用這篇回應作者 ê 這段話「讀者檢采會感受著 tsit 个寫作心態 ê 轉變也 kú-kánn。」頇顢肉跤者如我讀 buē 出變化，總是按我個人慣勢 ê「會使得」、「會當」、「會使」、「會得」這類 ê 文字 buē 閣出現 1885 這類 ê「會會 kuē-kuē」我確實感覺讀《翻身．番身》比讀 《Tò-tńg 倒轉》閣較有意思。另外，我向望有一日有機會讀著《台語現代散文選》〈無正常 ê 海豬仔腦〉這類散文集。
這 m̄ 是讀冊心得 mā m̄ 是冊評，以上。
➀ 德國 Leipzig 人稱呼家己是 Kleine Insel in Sachsen，Llivia 西元八世紀是 Grafschaft Cerdanya ê 首都，目今交西法柴杙城市 Puigcerda 隔法國領土相對向，所致當地有 ê 人 mā 按呢稱呼 Llivia，伊是西班牙 tī 法國本土 ê 小島。
2023.12.04
