W wodzie, owej płynnej materii, nie ma nic stałego
水，這个硞硞流 ê 物質，伊從來 m̄ 捌固定
Jan Heweliusz這幾日因為預防射規仙人𤺪 tú-tú，m̄ 是䖙 tī 眠床就是佮往過無啥交插 ê 電視圓仔炒麵線，膏膏纏。德國 ê 電視節目 m̄ 是無好看，是 gún 翁 m̄ 願加撏錢 bué 節目，所致 gún 兜通看 ê 節目永遠是彼幾台坐無到五分鐘隨 hōo 電視看 ê 節目。
這斗 ê 無四序無法度以睏來消敨預防射帶來 ê 無四序，手頭 ê 冊 mā 因為紅龜生蟲，龜怪 ê 気持ち hōo 我看一字生五百个影 m̄ 知家己 teh 看啥物就致心看無五分鐘就 hōo 電視看 ê 德國節目。
這台踅過彼台，彼台踅過這台一个若 Don Matteo ê 節目吸引我 ê 目睭仁，本底若驢仔骨力做穡 ê lī-móo-khòng mā 跟綴我 ê 好玄停跤歇睏。
神父 tī 街路搪著四常無攬無拈今仔日卻若厝鳥仔遐爾仔快樂 ê 查某囡仔，神父隨問囡仔「Liebes Kind, hast du heute gebetet?」(親愛 ê 囝仔，你今仔日敢有祈禱？），囡仔回答「Nein, weil meine Mutte weiss wie man kocht.」(無，因為 gún 阿母知影按怎料理矣)。
五分鐘 ê 短片講出德國囡仔 ê 齷齪佮快樂，五分鐘 ê 短片講出德國人𠢕扞鼎 ê 事實，五分鐘 ê 短片講出德國序大想 bueh 大石頭硩毛蟹 kan-ta tī 囡仔猶未轉大人較有應效。
䖙 tī 房間綿纏交手機仔談戀愛 ê 翁聽著恬寂寂 ê 客廳雄雄發笑聲隨傱來客廳問「啥物代誌遮爾仔好笑？」
Hesse tī Demian 寫過德國查某人按怎扞鼎，我 ê 德語老師 mā 捌分張叔孫仔按怎按乖乖食飯到拆白 tuì 𪜶阿母講「你 buē 曉扞鼎，準做你有全世界上好 ê 家私」我 kā 回答搝到若麵線遐爾仔長，gún 翁 mā 靜心等待我紲落來 ê 六月蚶，粒粒臭。
「你就是無祈禱恁阿母 m̄-tsiah 遐爾仔𠢕扞鼎，總是你祈禱 mā 是無較縒，畢竟恁勥母 kan-ta 聽有伊家己講 ê 話，Phantombild ist Realität➀」踅彎踅角猶是日本剾刀攑懸懸 ê 我文文仔笑講。
我講 ê 是事實，伊無法度交我㧣，只好搬出文法捙拚「伊是 Illusion」gún 翁講。
「Illusion 交 Phantombild 精差 tī 佗位？」我問。
「捷講佮無捷講」伊應。
「佗一个較捷講？」我問。
「Illusion➁」伊答。
「你交恁勥母有相𫝛 ê 症頭掠做妝娗欺騙就是 liiusion 幻想，像光學變化帶來 ê 五彩十色，總是你病症猶無恁勥母嚴重，恁勥母是 Phantomschmerz 彼款幻想」剾洗𪜶勥母我規身人步頻活起來，感謝勥母。
巡田園翻田塗讀著這篇記錄踮食譜 ê 心情練跤花想著林連鍠老師 ê《屁窒囡仔的謝師宴》然後好奇台語 ê 屁窒囡仔 tī 德語按怎講，畢竟這 m̄ 是我四常 ē 使用 ê 辭。
順英語 ê Naughty, Cheeky, Tyke, Rugrat 講甲 Hellion, spoiled brats gún 翁 mā 知影是草人幔棕蓑，假鬼假怪佯 m̄ 知抑是真正 m̄ 捌遮 ê 意思，直直講德國無遮 ê 講法，我想 bueh 順人問 ê Gregs Tagebuch - Von Idioten umzingelt 講 Idiot 畢竟冊櫥有一本 Vollidiot 華文翻譯做《男人都是智障》，早前我 tuì「智障」做形容辭無啥意見，自 hōo 人提醒「你按呢講人臭耳聾，你敢 bueh 想過真正有臭耳聾 ê 人𪜶 ê 感受？」簡單一句這是帶歧視 ê 形容辭，我就 kā 話收轉來，繼續揣形容辭，押尾揣著 Club der Dinosaurier 隨問「恐龍俱樂部 ê 囡仔恁按怎形容？」
「Frech」伊講，我閣繼續問當查某囡仔拒絕查埔囡仔 ê 邀請，伊猶原米糕𣻸恁 ē 按怎形容「Idiot」伊應。
總算 hōo 我問出一个答案，我隨 tuì 伊講咱無囡仔咱 m̄ 知影現此時 ê 囡仔𪜶按怎「Frech」總是順恐龍俱樂部我發覺未來 ê 我，凡勢免學德語，因為恁齊講英語。網路世界改變德語 ê 使用慣勢，像咱慣勢 ê 歹勢 tī 德語是 Entschuldigung，這久 ê 德國人特別是慣勢使用 TikTok ê 族群伊佮意 Sorry。德語交英語齊是我 ê 外來語，所致我 ê 回應 mā 順背來 ê 語辭做回答，像聽 Entschuldigung 回答 Kein Problem, Alles Klar, Alle in Ordnung, Alles gut，聽 Sorry 回答 It's ok, no problem, Fine。不過這久 ê 我行入一个相拍電 ê 世界，人講 Sorry，我自然回應 It's ok, no problem, Fine，紲落來反應百分之九十九是，伊無尊存 gún-ê 語言抑是伊絕對 buē 曉講德語。這種日子我按滿腹拗鬱行到目今 ê 萬項代齊有結束，唯獨煙腸二條➂，據在人，免要意。
因為巡田園 hōo 我發見向時 ê 心情練跤花然後想 bueh kā 伊交《屁窒囡仔的謝師宴》成做一篇經絲，起因〈慢啼的大隻雞〉「國中的理化都讀了無好，所以高職的化工科我讀甲足艱苦的，毋過一想著老師的鼓勵，我就閣認真拚落去！」hōo 我想著國中開始學英文，我 ê 文法一直綴人 buē 著陣，總是逐位英文老師齊 tuì 我講「文法是死--ê，語言是活--ê，你 ê 英語講甲誠輾轉 m̄ 通 hōo 文法牽去墓曠。」，這段話到今我猶記牢牢，起因我 mā 是順這个態度學習德語，畢竟連 gún 翁 mā tuì 我講「呔討 die 愛變做 der，das 變做 dem，der 變做 dem, den 我 mā 知機，起因伊順我 ê 喙自然走出來，像你講台語仝款。」，我就捷講 hōo 喙 buē 鈍。另外，林老師分張 ê 課堂大細事 mā 是我國中彼三冬 ê 雙生仔，只不過 gún 無辦任何一場同學會抑是謝師宴。
〈月是故鄉明〉「我若考無牢，siáng 考會牢？」hōo 我想著第二斗 hōo 新 ê 英文老師選去參加英文演講比賽，我照實 kā 老師講我小面神無才調上台，老師講試看覓，仝班英文文法第一名 ê 頭人講「我若無參加，啥人有才調參加」，本底堅持我愛參加比賽 ê 老師 tī 一場科發表會發見 hōo 全班選擇口白 ê 我正港小面神，一上台聲音齊無去隨交換手 hōo 英文文法頭人去參加，頭人參加 ê 結果按呢，答案交月是故鄉明無宛 2 體，考卷會曉寫 m̄-koh buē 曉講。
〈牽手緣〉故事交我無相𫝛，總是一想著我 mā 捌因為 gún 翁兩禮拜無半張批隨想伊凡勢交著新女朋友隨寫批講緣份到遮為止，押尾 tsiah 發現伊人出差去非洲無網路 ê 角勢，這个經驗 hōo 我翻頭看第一斗談戀愛傳落來 ê 毒，然後 tī 牽手人生繼續解毒。Gún 翁啥物攏好，就承𪜶爸母歹癖這項代 hōo 我心狂火著。這件代誌伊家己 mā 慼無願意成做𪜶爸母 ê 面肉，總是人生一向串驚串者。不而過，這个問題交 gún 漸漸愈倚愈遠，畢竟愛顧豬頭 m̄ 是顧鴨卵。
〈轉〉「這---坐咧坐咧，凡勢---就等著你---對臺北轉來矣！」大姊著癌離開，阿母第四斗白頭鬃送走烏頭鬃 ê 最後 11 冬人生，細漢查某囝 uī-tio̍h 工課，uī-tio̍h 愛情 mā 一日到暗無踮厝，總是見擺我敲電話講我大約仔幾點到厝，阿母就坐踮公寓 ê 亭仔跤等我，自伊目睛擘金開始。現此時 ê 我轉去台灣無人等我，跟綴林連鍠老師「一陣風透過來，我無張持阿母的頭毛是當時予風透甲白去矣？嘛毋知影，是按怎共彼个猴囡仔的呿呿嗽透無去？風愛透偌久，才會當共艱苦透予走，共目屎拭予焦咧？」淚珠㴙㴙滴 tī 無健保 ê 年代，感冒無醫生通看家己食藥房，閣較免講肝無四序 ê 肝病。
〈思念〉「囡仔猶閣戇戇毋知影愛哭！」感情足豐沛 ê 我，見著人艱苦淚珠隨滴，家己親人一个仔一个離開，淚珠 m̄ 捌滴過 hōo 我憢疑家己真正無心肝。2024 勥母又閣 kā 手伸過來，我隨撒鹽、放狗、關門，這件代誌 hōo uī-tio̍h 𪜶爸母冤甲若北極破去 ê 臭氧沓沓仔修復 ê 伊又閣破一大空，手機仔攑起來管待電話號碼是伊 ê 隨揤 886...電話喨規半晡無一人來接，二十外冬，一个親人一个一个送，一个一个掠做是親人 ê 人押尾齊做生份人 ê 齷齪 m̄ 捌 kā 我偃倒過，這斗喨規半晡 ê 電話無人來接，海漲來上岸，我哭甲碎鹽鹽。死爸路頭長，死母路頭斷，朋友 ê 爸母轉去塗州賣鴨卵，猶有姊妹仔後頭厝通轉去交講話，我有後頭厝家己 ê 厝卻無人通講話。
《翻身．番身》作者劉承賢先生 tī 話頭有一段「若欲比賽，kám毋免寫予評審佮意」hōo 我想著向時捌讀過一段評論內容大約是「台語文若是繼續按呢齊講四常代厝內事，伊 ē 無前途無發展。」低路人餾書櫥 ê 台語文、華文、佮德文，德國近代作者 Hermann Hesse 伊寫 ê 故事 mā 是四常代厝內事敢 m̄ 是，呔討隔一个海洋 ê 四常代厝內事是文學，咱家己 ê 四常代厝內事是阿沙不魯、豬屎籃仔結綵？
德國出名 ê 演員、主持人 Hape Kerkeling 伊上新 ê 一本冊寫伊交𪜶兜 ê 貓仔，登德國閱讀排行榜頭名。寫著這，人 tī 天堂 ê 鄭華娟 senn-sian mā 寫德國四常代厝內事，敢 m̄ 是，呔討台語文按呢寫是無未來、無前途 ê 文學？ 這類問題 mā 是有錢福相無錢鼓漲，像 gún 翁無認為𪜶爸母有毒，我卻認為𪜶比釙閣較恐怖。
林連鍠老師 ê 年閣交我無相疊，總是跟綴伊 ê 筆尾，我讀著成做一个人 m̄ 管出世 tī 佗一个年闊角勢齊愛求生存、求發展交恬靜梳理屬於家己獨一無二 ê 感情，像王昭華 sian-senn tī 推薦序 ê 這段話「囡仔目所看著的、真實的故鄉的田園，連話語攏真實！」，無真實 ê 家己無家己 ê 人生縮影，無行入讀入心肝穎 ê 感動。
我 ê 第一本九歌台語文文學是廖玉蕙的台語散文《彼年春天》，讀《彼年春天》ê 進前 Stabilo ê 紅筆已經楔 tī 厝內靜待我那讀那寫作業。自《彼年春天》到《錦荔枝的滋味》、《我隨意，你儘量》到《屁窒囡仔的謝師宴》我 ê 紅筆 m̄ 捌寫過漢字練習，不過劃重點像雞僆仔 Ke-nuā-á，米甕袂閣弄鐃 lāng-lâu。台文出版本到今猶有一盤魚脯仔全全頭 ê 逐家若攏漢學仔先 hōo 我心頭亂紛紛 m̄ 知按怎讀台文，總是這个問題 tī 九歌成做簡單 ê 文學就是享受閱讀，享受你家己 ê 聲音，像德語統一 ê 書面用字 Manchmal 有屬於伊家己 ê 腔調。
九歌出版，正港品質保證，無一人一體字抑是一字多面肉。
W wodzie, owej płynnej materii, nie ma nic stałego 水，這个硞硞流 ê 物質，伊從來 m̄ 捌固定，總是水有伊固定 ê 形體，敢 m̄ 是？
這 m̄ 是讀冊心得 mā m̄ 是冊評，遮 ê 文字是我 tuì 這本冊 ê 遛膨絲。
➀ 幻想是真實。
➁幻想
➂ Alle hat ein Ende, nur die Wurst zwe
