Von allen Welten, die der Mensch erschaffen hat, ist die der Bücher die Gewaltigste.
Tī 人類創造 ê 世界，上強大 ê 是冊
Heinrich Heine看冊 ê 慣勢是照冊行跤到 ê 時間來讀，《我隨意，你儘量》照這个慣勢應當是排到明年 tsiah-ē 讀 ê 冊，起因手頭猶有足 tsuē 請臺灣e店佮聚珍臺灣 kā 我鬥相共寄 ê 冊。
既然我有這个癖是按怎這久 ê 我有法度寫一篇文章來展冊？癖是死--ê 人是活--ê，按呢簡單 niā-tiānn。
Tī 面冊看我無𤺪，我看伊猶 buē 慼，一日貼貼 ê 閒縫我真愛踅作者 ê 面冊讀伊 ê 文章綴伊 ê 筆花感受生活佮我 m̄ 捌 ê 智識，像作者寫「高雄椅條」(我 ê 記持若無豬母牽去牛墟，kā 城市記 m̄ 著位)故事 hōo 我想著發財仔車 ê 奇幻世界，我看 buē 著 ê 物，一問發財車主人就隨出現 ê Surprise 抑是佮芋仔爸做陣扛伊 ê 讀冊椅抑是我 ê hōo 發財仔車主人修理 ê 記持。
雖罔，我 ê 起步真慢。
作者 tī 2006 就開始寫台文 Blog《花埕照日》，我愛 ê《大佛普拉斯》〈 有無〉是伊寫 ê 詞，作者 mā tī 中央社出版 ê《做伙走台步》進前就 tī 面冊寫文章，遮 tsuē 好揣閣大葩 ê 資訊，我齊無認捌一項，準做彼陣 ê 我足佮意大佛普拉斯，我 ê 目猶是青光眼，我 ê 心就敢若翁較早 tuì 高血壓佮糖尿病 ê 態度相仝，彼曷 m̄ 是啥物大問題 ê 停跤 tī 仝一个箍仔踅玲瓏。
我 buē 記持我是按底時 tuì 台語文有興趣，總是我非常確定 m̄ 是按「我 ē 曉兩種語，臺語佮臺灣國語」ê 大佛普拉斯抑是〈有無〉，起因臺語歌 m̄ 是我意愛 ê 喙斗，臺語無講 mā 無差，起因自阿母轉去塗州賣鴨卵，我 ê 生活已經無人通佮我講臺語，準做有人通佮我講台語我 ê 舌 mā 若豬砧掛 ê 豬舌接 buē 轉豬身 ê 2266，不過自出世就接好 ê 舌 mā m̄ 是臺語這語有這个現象，往過 hőng 褒嗦 ê 華語，目今 hőng 剾洗講呔有外國腔，因為頭家是加拿大人交伊做陣做穡十外冬英語講甲 hōo 人掠做我 tī 加拿大人蹛過 ê 腔口現此時 hőng 講你慣勢講德語--hooh，uī-tio̍h 好好牽手人生上卌 tsiah 開始學習 ê 德語 hőng 講連國校 ê 水準齊無夠額閣有厚厚外國腔口，聽無，我 tī 遮 ê 退步交無進步逐日情緒叨撚，戇--ê 也有一項會，你呔討無半項會 ê 飯桶。
這个情緒困擾我幾仔冬，特別是祝英台三聲道 ê 影片出現，我 tī 德國驚甲目屎直直輾，起因我連上在手 ê 台語 mā 扞 buē 好勢，讀無朋友抑是網路生份人分張 ê 台語，像「五狼迪ㄟ謀」、「很慢ㄟ奶雞」朋友笑甲 ka-ka 叫，讀無驚失氣 ê 我 uī-tio̍h 面子隨扮仙相趁相喊綴𪜶笑遮 ê 我窮真一屑仔齊 m̄ 知機伊是啥物意思 ê 五仁。
恁同事 ê 牽手有才調 tī 遮 m̄ 驚人講伊青盲，是因為伊 tī 臺灣是提學士學位，所致在伊 ê 眼中 buē 曉讀德文交講德語，只不過是文化背景交教育權無相𫝛 m̄ 是正港 ê 青盲牛，像𪜶阿媽按呢交人接接唯一 ê 工具舊漚舊臭需要擲挕捒 ê「台語」。
Tsuē 冬前翁 ê 同事𤆬牽手來 gún 兜做客，聽翁同事講牽手交阿媽講台語，久無講台語 ê 我興趣趣交伊講台語，得著 ê 態度交人 tī Cieszyn 相𫝛，只不過加一條無料心理師聽臺灣太太呻德國人掩掩揜揜看伊 buē 上目 ê 無四序。
我無啥確定家己 tuì 台語文 ê 興趣敢發生 tī 2019，總是我清楚知影 uī-tio̍h 理解台語敢有字典隨 kā 頭殼動甲 Google 揣著 iTaigi愛台語，紲落來雙跤踏雙船，心頭亂紛紛 m̄ 知佗一條辭目 tsiah 適合就 kā 伊轉做文字分張 tī 網路，一位 m̄ 捌見過面 ê 台語老師推薦我「教育部台語辭典」我 tsiah 想著𫝛款是 uī-tio̍h 學習需求上網落訂，押尾 hōo 我隔海哭呻伊是佬仔 ê《做伙走台步：疼入心肝的24堂台語課》有一篇是「姚榮松：用正確的字寫想說的話」有談著「教育部台語辭典」，就此 Der Weg stellt jedem nur eine Frage: Wer bist du➀ hōo 我揣著我家己 mā 引𤆬我行向家己 ê Drei Weg - Tres Caminos➁順中央社《做伙走台步》我認捌李江却台語文基金會 ê 台文通信Bong報、周盈成先生 ê 世界台~Sè-kài Tâi 交「在面冊（臉書）上，王昭華是這樣自我介紹的」ê 王昭華，我順這三條路開始我正港 ê 朝聖之路，像 In 80 Tagen um die Welt 環遊世界 80 日，是正港世界行透透 ê m̄ 是無兜無捎，牽山伴林。
我順這三條路發見，讀台語文比讀德文抑是英文閣較輕可，準做 tsuē-tsuē 字 m̄ 捌學過順原句 mā 了解意思，比如《阮兜隔壁彼間美術館》〈秋歌〉 --- 讀呂赫若〈牛車〉
山裡彼片烏雲
遮閘半爿天幕
營養不良的赤牛
追趕坎坎坷坷的險路
枵飢失頓的囝兒
佇破草厝仔哼哼呻
七刺五耙的家後
恬恬踮灶跤目屎流
低路人 m̄ 捌學習過「爿」總是順詩句練跤花隨知影伊就是華語 ê「這邊那邊」，「枵」就是華語 ê「肚子餓」字典一屑仔攏免請教。
自《做伙走台步》認捌「佛系的台語文推廣者」王昭華 sian-senn 開始成做較行 mā 仝路 ê 田螺巡去伊 ê 面冊讀伊 tī《做伙走台步》分張 ê 這段話「我喔，就是對生活有什麼感覺或觀察就寫，就很像冰箱有什麼就煮什麼，無菜單料理啦。」到今我猶無理解 tī 白話論述冊本 tsuē 過詩 ê 年閣，台文呔討十本有九本是詩，然後手寫詩，喙講華語兼以華文做紹介。這个問題到今我猶無理解 mā 無興綿豉研究，起因我清楚知影我愛這類冰箱有啥就煮啥 ê 無菜單兼無排盤 ê 台語文。
2021 主動註銷家己，我 ê Drei Wegs 賰 Ein Weg《台文通訊Bong報》2023 踅台文出版本，巡著王昭華 sian-senn ê《我隨意，你儘量》隨向聚珍臺灣落訂，書按臺灣飛到德國落地，隨 kā 自來讀一本書愛照落訂時間來讀 ê 慣勢擲挕捒，先讀《我隨意，你儘量》，我感謝九歌出版社 kā 王昭華 sian-senn ê 作品整合做一本冊出版 hōo 天增歲月人增歲，雙目卻愈來愈鈍目 ê 我 m̄ 免牢 tī 電腦前抑是提譀鏡讀台文，甚至有機會做我上愛做 ê 代誌，想 bueh 臭頭仔包布，防蠅(風神)隨有資料通反，像這久想著翁仔姐做陣破豆 ê 故事 hōo 我想著〈市草的花草〉。
「16 台無去矣」我講。
「按呢你 ê 德語 tsiah buē hōo 奧地利德語抑是 Schlesien 德語洗花兼守牢牢 ê 錢袋仔押尾 hőng 收花」翁笑應。
目今 ê 德國 bueh 按腔口分別人是東南西北真僫，特別是少年輩，目今 ê 德國少年囡仔 mā 敢若聽有一款腔口一款講法，像「Machen」講「Mochen」、「Durchschnitt」講「Dochschnitt」➂遮 ê 音無順德國通用腔口講齊是外國語仝款。
我因慣勢自在，所致學習德語 ê 路途永遠選擇適合我氣口 ê 講法 hōo gún 翁笑講 16 台閣繼續看落去，gún 兜 ē 出現一个明明蹛德國卻講奧地利腔 ê 外國人。伊這款講法是較譀古，不過我確實感覺街路四常聽 buē 著 ê「我」tī 叫賣台 tshan-tshiūnn〈市草的花草〉ê 這段話「市仔，特別是傳統的市場，可能會是台語上慢『蒸發』的所在矣，燒氣、濕度，若集中佇一塊培養碟仔：別位無通湠落去的性命，佇遮猶閣活跳跳。」我個人 m̄ 知機 16 台 tuì 語言 ê 包容性大過 17、18、20、21 敢是自家地區傳統語言 mā 沓沓仔成做外國語 ê 因端，總是 21 台節目有 6 台叫賣台，唯獨 16 台 hōo 我「卡花」卡牢牢，不過 m̄ 捌起心動念成做𪜶兜市草 ê 一蕊花芳𪜶兜 ê 花園，不過感謝𪜶芳我 ê 花園。
W wodzie, owej płynnej materii, nie ma nic stałego
水，這个硞硞流 ê 物質，伊從來 m̄ 捌固定
Jan Heweliusz
2023.10.06 按波羅的海三國轉來，看 thenn tī 食飯桌 ê《我隨意，你儘量》猶原美麗無做漚鹹菜，想著波羅的海三國露營車日子一日貼貼貓徙岫，按算讀 ê 書一本齊無讀著跟綴車內 ê 濕度、燒氣成做漚鹹菜 hōo 我 m̄ 甘 tiuh-tiuh，這久轉來厝見著這本出門進前下性命 kā 伊一口氣讀 hōo 煞，徛起身斡頭伐出門 hōo 伊成做栽 tī 綠室 ê 書，我雄雄感謝綠室菜蔬 ê 發明，無𪜶我 ê 人 mā 跟綴彼緟紮出門 ê 冊，按活力十足成做死殗殗閣漚鹹菜。
我個人有一个歹癖，冊一䆀就想換擲掉。不過這斗 ê 車日子紮出門 ê 齊是台文冊 hōo 我跟綴《我隨意，你儘量》ê 態度接受書 ê 隨意。押尾猶是愛講，這 m̄ 是讀冊心得，更加 m̄ 是好書推薦，總是一本 hōo 人想 bueh uī 伊 kā 感受轉做文字 ê 行尞絕對有伊觸著人 ê 故事。
2025.4 月 hōo 我 lī-móo-khòng 揤到 16 buē 隨換台 ê 16 台，因為 gún 兜 ê 電視跟綴時代 buē 著 hōo 我無才調繼續成做〈市草的花草〉hōo 武市 ê 物理仔「叫花」、「卡花」，總是我足享受這幾冬跟綴物理仔 ê 跤步看𪜶隔一个螢幕「洗花」兼「收花」ê 滿足，然後感謝𪜶 hōo 我有這个機會感受上自然 ê 燒氣佮濕度，像林生祥，美濃山下歌手所寫 ê 這段話「昭華的文字不煽情、不炫技，就好好說一個故事，文如其人」自然自然。
2025 翻頭看 m̄ 捌 ê 串驚串著到這久 ê 自然自然就好，像恆星順家己固定 ê 軌道，Keep walking，我感謝 m̄ 捌見過面 ê 台語老師，因為伊 ê 點揬 hōo 我揣著台文 Drei Wegs，並實踐 Drei Wegs 其中一段 ê 智慧「Tui 我來講，我看著、想著 ê 代誌，就用台語文寫出來，人有興趣讀、想 bueh 了解，自然就會來探訪。」
初寫台語文，我驚人讀無 mā 跟綴王昭華 sian-senn tī 面冊 ê 紹介按呢寫部落格「華語翻譯貼佇回應的第一層樓（若是無人搶頭香）。」這久 ê 我 mā 跟綴這段話「我隨我的心意寫作，正經僫讀，啊！請讀者你也盡量。」文章有註改解 ê 部份齊 uī 家己頇顢 ê 記持。
➀ ICH BIN DANN MAL WEG von Hape Kerkeling
➁ 聖雅各路三路線
➂ 是以我個人音感來做腔口差別記錄，交書面用字無底代
