Freiheit ist immer die Freiheit der Andersdenkenden
自由交咱認為 ê 永遠攏無相𫝛
Rosa Luxemburg無事揣事愖
我 tī 想， kan-ta「作文」是用台語其他 ê 齊是華語，tshan-tshiūnn 是按怎 bueh 按呢寫佮寫作 ê 起因，是因為驚大眾讀無路來抑是 tī 𫝛款 ê 文學內底已經揣無空間通成做出名人？畢竟，逐家攏是鰮仔魚，鰮仔魚 bueh 按怎成做白腹仔(看新聞挖挖哇，按澎湖來 ê 小花講，白腹仔愈來愈少)就愛先試這件代誌，看家己敢有法度按鰮仔魚轉做紅鰱魚，無法度轉做紅鰱魚，至少原仔是一尾 m̄ 驚 hőng 看 buē 著 ê 鰮仔魚。我 m̄ 知影，起因目前我 kan-na 捌 tī 亞特聊聊天聽過「台語話故事」出版社不是影印店，這集聽過前衛出版社 ê 總編輯鄭清鴻先生分張《復活的人》佮《幻影號的奇航》ê 作者胡長松先生 ê 分張。
寫台語確實是較無市場，m̄-koh 這 mā 表示空間原仔闊莽莽
原句 m̄ 是按呢講，總是這是我家己濃縮 ê 蜂蜜。我無心望成做作家或是出名人，總是聽著這段話 hōo 我言行一致 m̄ 是乞食攑蠓捽仔，假仙。雖罔，我 m̄ 捌胡長松先生，我 mā m̄ 知影四常 ê 伊敢是一日到晏 teh 咬別人 ê 舌「是按怎 m̄ 按呢做」ê 人，總是聽鄭清鴻總編輯按呢分享 hōo 我感覺伊是一个足真 ê 人。
我 ê 台語文冊讀甲原仔無 tsuē mā m̄ 是語文專家，總是按「踏頭話」開始讀就是華語，有百分之90 ê 經驗是「作文」是挈「大/打滷麵」來講我是「滷麵」。我無反對借字、借意，畢竟西方語文 mā 是借來借去，借到落尾 tsiâ tsiah 是根，tsiâ tsiah 是 hőng 湠過來 ê，已經無人要意，起因遮 ê 攏是自家文化 ê 一部份。只是，當借字、借意成做 Single White Female 彼就足恐怖.......我 m̄ 知影「作文」寫台語，其他寫華語 ê 人，𪜶真實 ê 想法。
總是，見讀這種「作文」是本土語言，「生活」是華語 ê 文章攏 ē hōo 我想著 Dance with Wolves....我真佮意這齣電影，總是綴年歲愈 khiú 愈長，我 mā tuì 浪漫湠做故事 ê 結尾。雖罔，電影是交代 Dance with wolves 佮 Stands with a fist 是 uī-tio̍h 逃避仝族 ê 追殺 tsiah 離開 Sioux....別人 ê 自由 tsham 我無底代，就敢若無人逼我家己去踅這款箍仔𫝛款。
- 母語寫作是你 buē 分懸低 buē 分媠䆀 buē 要意別人 ê 指指揬揬，母語是你喙自在講手自在寫 ê 自然。
這是人 tī Кирково(Kirkowo/Kirkovo/基爾科沃), Bŭlgariya(保加利亞) ê 飯店聽李勤岸教授 tī 關懷廣播電台 ê 演講 ê 一段屬於家己 ê 蜂蜜。
窮實，這是一篇以漢羅手寫 ê 哭呻文，呔討無事寫哭呻文，過了代 ê 故事宛然溪水流過準做翻頭除了甘甜賰 ê 齊是白汫無素 ê 除非你硬 bueh kā 添糞埽。畢竟世界 ê 溪流面肉齊相𫝛，像因河(inn)佮伊薩爾河(Isar)做陣流入多瑙河(Donau)，你敢有才調區別做伙流向黑海 ê 𪜶？敨放家己認為 ê 自由 tsiah 有法得得著真正屬於家己 ê 自由 Freiheit ist immer die Freiheit der Andersdenkenden。
那 kā 紙本文字徙岫到部落格，心內 ê 齷齪宛然世間每一條河，押尾成做養飼世間萬物 ê 海洋。像絕版 ê《哈佛台語筆記》順時間泅入網路資料庫，養飼我 ê 世界。像《青春寫真散文集》養飼我 m̄ 捌行過 ê 人生。
《青春寫真散文集》我真佮意教授談著語言佮族群 ê〈台語 ài 和樂〉mā 真佮意〈我 ê《黑臉》：我出第一本冊 ê 故事〉教授講著少年 tuì 寫作 ê 自卑現此時翻頭轉去窮實 kan-ta 這个因由，tuì 這个語法 ê 敏感度猶無閣，這件代誌 hōo 我足深 ê 感受，起因自逐家流行寫部落格 ê 我 mā 捌搪過相𫝛 ê 問題，我看別人按怎寫按怎好，我按怎寫按怎䆀，押尾放棄綴朋友寫部落格，這久重新翻頭寫部落格，主要語文齊 m̄ 是我上在手 ê 語法，總是心無自在準做寫華文 mā 是 buē 掠扭。〈饒赦 ê 藝術〉「若是會當算出原諒幾遍，按呢就是猶未原諒 m̄ 知影幾遍，一直到完全無 teh 致意，無 koh 抾恨，就是耶穌講 ê 七十个七遍」，我是世俗人 tuì 耶穌 ê 認捌無深，總是當我讀著這段，我想過了代 ê 齷齪 m̄ 捌繼續成做我 ê Mǹg-sǹg 就表示我 mā 達成七十个七遍。
