「這瓷仔有毒。」
第一斗交伊見面，gún 翁隨 hōo 勥母上童聽我 ê 話食藥包穩你食百二閣 buē 食虧。
第一斗交伊見面見，準做我無信仰，我猶是順勥母 ê 乩身交伊保持距離，畢竟我跤踏 ê 萬項代伊上知機。第二斗交伊見面，手猶未伸出去摸勥母隨來跳童，我斡頭問一句「這瓷仔有毒，伊呔猶原活跳跳，遮是德國，敢 m̄ 是？」邊仔掠做家己是神 teh 跳神舞 ê 勥母乩身隨退童問「敢 bueh 款幾个轉來做網衝?」
「伊 buē hōo 你做乞食，總是我交伊是花缽仔種菜，無緣」我應。
2022 德國人痟來去巴爾幹半島洗魂舒，交勥爸換車 ê gún mā 順這波時行落南巴爾幹車日子，tī gún 人猶未車到巴爾幹半島第一站羅馬尼亞，gún 翁 tī 行踏巴爾幹需要經過 ê 匈牙利開始勥母上童，這餐廳用這瓷仔貯物有毒，m̄ 通 kā 交觀，這 gún 德國講無健康 m̄ 通 bué...
我自本就無興 bué 東 bué 西 mā 慣勢伊彼支 buē-su 未來 ê 好心人 ê 喙，所致 m̄ 捌要意伊交爸母相𫝛，掩 buē 密 ê 喙。
不過，當相𫝛 ê 物件 tī 匈牙利、保加利亞、羅馬尼亞齊有毒，換到希臘無毒，這我就換我起童。
「這瓷仔無毒，你 bueh 羊奶口味抑是牛奶口味？」翁問。
「這瓷仔有毒 m̄ 通 kā 支持」我講。
「希臘是歐盟，一切照歐盟規定，這瓷仔無毒，你愛啥物口味？」
「希臘是歐盟，咱愛大大典典支持路邊攤假包 ê Adidas, Nike。」
翁知影我 ê 日本剾刀利甲 hōo 伊疼，總是伊 m̄ 是普通人，伊交𪜶爸母相𫝛，世間病疼只要藥仔一吞，啥物攏 buē 疼 ê 鐵齒銅牙槽講「遮是希臘，萬事齊是一步棋，一步著 ê 大丈夫。」
「五肢指頭仔伸出來無平長是四常，tī 恁兜是月光下看人影，巴禮講道，家己攏著 tsiah 是四常。」
「我無大細心，看人無目地...」
「人講這是𪜶 ê 政策，你講德國無這个政策，這 m̄ 是大細心，懸低耳看人無目地是啥？」
Tī 羅馬尼亞 uī-tio̍h 捒車 hőng 通知 buē-tàng 捒出去店外，伊成做 Mǹg-sǹg 交工作人員大細聲，uī-tio̍h 省 10 塊台幣交人圖書館交繃講「gún 德國圖書館齊無料提供，是按怎恁遮無提供，按呢伊 bueh 踮恁遮放尿。」
彼陣 ê 伊是欠鎂所致情緒無法度控制，抑是目頭懸甲火星，我 m̄ 知影總是我清楚知機，我 buē 放伊按呢生。
「我 m̄ 知影彼陣 ê 我呔 ē 按呢生，m̄-koh 我無大細心....」
有大細心無，這个問題伊家己上清楚，我無興交伊繼續討論，雙目金金繩 tuì 價數，趣味矣，德國是牛奶優格俗價，羊奶優格鞏金，遮是羊奶優格俗價，牛奶優格鞏金，當然 mā 愛款羊奶優格➀。
優格款轉來，我 tsiah 想著，希臘優格包裝 mā 齊有意思，塑膠包裝齊鞏金，瓷仔包裝齊俗價，這是希臘保持傳統 ê 商業保護抑是工業不足致使現代科技依賴進口所致？
這个問題，我無法度回答，總是見著中國商店成做希臘人 ê 百貨公司，我好玄 ê 問題隨水清魚現。
我 m̄ 是第一斗交這款 kā 優格貯 tī 瓷仔 ê 包裝相借問，行踏波士尼亞 ê 2014 抑是 2016 就捌交伊相照面，彼久 ê 我無寫 Blog mā 無驚失人禮跟綴參加面冊社團，所致 m̄ 捌 kā 心思囥 tī 伊身軀，m̄-koh tuì 伊印象深刻，起因我支持 mā 意愛倚山食山，倚海食海 ê 生活方式 alias 我向望家己 ē-tàng 減少使用塑膠物。
自希臘優格瓷仔成做 gún-ê 碗盤之一，彼个放伊自由 ê 虛華又閣踅翻頭挨拶，總是我千想萬想，m̄ 值得橐袋仔袋龍銀 ê 性地。我願意 uī 希臘古典撏龍銀鬥相楗，我 m̄ 願意 kā 龍銀浪費 tī 市草交人民所得無法得做比並 ê 優格。
寫著市草交人民所得無法得做比並，二月初行踏捷克絞頭鬃，我 tuì 翁講「捷克若 bueh 放棄 CKZ 使用歐圓我 mā bueh 抗議。」
虛華一發穎，伊 buē 徛黃，伊 kan-ta ē 愈來愈健欉 hōo 我 tuì 伊痴迷。Tī 德國土耳其商店捷見著 ê 紅瓷仔，hōo Bismarck 講是火藥庫 ê 巴爾幹有 tsuē-tsuē 國家受鄂圖曼 ê 影響，我相信離開歐元區合該然有機會交伊繼續相拄搪。
這个推測 tī 北馬其頓得著證實。
自瓷仔收藏 tsiâu-tsn̂g 我又閣成做一隻貓好玄家己呔討 tuì 伊遮痴迷？畢竟我個人是意愛金滑外型 ê 瓷仔。
一日想 bueh kā 菜蔬、魚指、糙米貯入大碗公做 Bowl➁，頭殼若中痧 ê 症頭雄雄挽筋清楚，我就是嫌這按捷克款轉來 ê 大碗公做 Bowl 無大範，頭殼就纏綴網衝相片踅金龜磨。
當愛情無中心思想，痟想 ê 物 mā 是食buē 著硞硞綴，食了嫌漚貨 ê 喙食喙嫌，臭酸食到生黏。
這按希臘交北馬其頓收藏轉來 ê 瓷仔，目今成做壁花收藏。
本底想 bueh 跟綴 Bowl 直接講白話「生菜碗」，總是一想著德國人佮意 kā 若宗教 teh 使用 ê 缽(Puah)當做生菜盤，我又閣貓 buē 離好玄華文 ê 缽ㄅㄛ臺語按怎講，請教教典，教典佮台視台語新聞逐工一字攏賜我這个智慧 Puah 佮 Puat，按呢就是伊「生菜缽」。
巡田園，翻田塗讀著「這瓷仔有毒」我又閣成做貓想 bueh 知影臺灣按怎報導，總是向 Google 跋來 ê 桮 97 % 是中國交香港 ê 文章，3% 是臺灣，這敢表示咱臺灣 ê 問題無中國佮香港 ê 厚突突，我 m̄ 知。
巡田園，翻田塗，這久 ê Meta 又閣允准無𪜶兜口座 ê 人 ē-tàng 自在請教𪜶兜 ê 資料庫，這是我按 Google 請教來 ê 智慧；
1 . 豆豆媽咪的貼文
2. 陶來福陶藝工作室
話正經攏在人講，gún 兜有兩塊 hōo 勥母洗甲圖 kiōng-bueh 無去 ê 盤仔，gún 翁講彼大丈夫，這久講擲掉，這句擲掉 m̄ 知是順某 ê 無佮意，我 m̄ 是糞埽桶，恁爸母 buaih 挃 ê 物件免數想我替𪜶收藏，抑是真正理解啥物是 das Gift 有毒。
➀德國 ê 牛奶優格 500g 0.89€，保加利亞羊奶優格 150g 1.29€。
➁ Bowl 按美國素食文化來，伊 ê 概念按日本 ê 丼(どんぶり/Donburi)演化，Bowl ê 特殊，簡單來講一碗「佛缽」有菜蔬、五穀米糧佮果子。
