你敢有遮 ê 問題，你跟綴健康資訊過日子，押尾煞行入雺煙散霧行 buē 出來？我有這个症頭。
M̄ 通按呢食，你 ê 盤無肉，肉是卵白質掌管筋肉，無食肉筋肉就 buē 生，無筋肉舒魂就無氣力。M̄ 通按呢食，你 ê 盤已經有豆仔佮米，這兩項是含水碳素，含水碳素食過頭，醣份會過額，按呢 tuì 健康無好閣 tuì 體重管理無幫贊。
我想 bueh 按呢食 kā 豆仔做肉食，畢竟豆仔是素肉，不過豆仔 mā 是含水碳素......呔討遮 ê 問題 ē 遮爾仔石磨仔心我捎無一扇寮仔門，總是我又閣清楚知機遮 ê 問題 tuì 我來講窮實無遐爾仔重要，畢竟目今 ê 我 kā 家己照顧甲猶原 buē 䆀無 hōo 高血壓、高血油、高血糖來挨拶，m̄-koh 一想著年歲沓沓仔行到換年，一个無細膩體重 mā 纏綴伊換年，我就叨撚家己，這款人生小事一點仔攏無才調忌喙，誠實了然。我敢誠實了然，我家己非常知機，一屑仔攏無，我若正港了然 gún 翁 buē 褒嗦講自牽手徙岫到德國，我 ê 健康檢查 m̄ 捌閣浮紅字，體重 mā 順利仔落崎到今 m̄ 捌翻頭重新𬦰崎過。
德國衛教療節目捷講厝內有健康 ê 扞鼎者 tsiah 有健康 ê 厝內人，這點我非常同意，gún 翁按無同意 mā 轉做百分之兩百 ê 同意，起因自伊離開自學生時代就 tī 遐實習 ê 公司，伊無想 bueh kā 日子全數投入工課就開始揣小工，伊目前做上久 ê 小工是𤆬養老院佮療養院 ê 人去看醫生，自伊做這份小工，伊總算理解伊 ê 好字運，畢竟 m̄ 是逐个人有伊 ê 好字運，身體按呢匪類猶無致著歹物，像「彼个人猶未 50 歲因為糖尿病雙目青盲閣行動無啥方便，厝內人無時間照顧伊 m̄-tsiah hőng 送來養老院。」
較早聽我講糖尿病病人生活限制厚甲若蠓，伊齊 m̄ 信篤講「糖尿病食藥仔就會使得控制，驚啥物」，這久有法度家己量 ê 血壓骨力量，起因 tī 醫療環境做小工 hōo 伊見著 tsuē-tsuē 鐵齒 m̄ 寶惜天公伯大細心賜 hōo 伊比別人閣較勇健 ê 身體 ê 拖磨。
是講，我 mā 愛感謝伊 ê 好習慣，無薰無酒閣無𪜶爸母 A-ta-mah-khòng-ku-lī 性地 ê 伊，這久 ê 我 m̄-tsiah 免按牽手晉級到看護婦。雖罔按呢我猶是 tuì 伊講，我交你牽手，我無才調搭胸坎保證我 buē 造成你 ê 負擔，總是我 ē 好好仔照顧我家己，像我照顧你按呢，起因我無興照顧 m̄ 願好好照顧家己 ê 翁婿。
一日翁仔姐做陣看衛教節目，主持人問患者牽手是啥物因端 hōo 伊替翁婿報名衛教節目，這位體格交健康齊保持甲誠好勢 ê 德國太太回答「退休 ê 日子 m̄ 是照顧病人，特別是 m̄ 聽話 ê 人。」這段話 mā 成做 gún 翁牢 tī 手機仔 m̄ 睏隔轉日喝頭疼抑是無精神出門做小工，我上捷搬出來 ê 話「知影睏無飽頭 ē 疼，免數想我 ē 食恁勥母彼套，明明就是喙白造成 ê 關節炎，硬 bueh 講彼是風濕來成做你 ê 無料看護婦。」
我有這个底氣跟綴彼位踮電視上大大典典講我 ê 退休生活 m̄ 是照顧病人 ê 德國太太，主要是我交伊相𫝛 gún 攏好好照顧家己 mā 認真面對問題，無 gún 翁兜勥母一隻蝨母嗙甲水牛大，真正搪著水牛嗙甲若蝨母。
比如講，我 tuì 齒科無好印象，來到德國喙齒沓沓仔又閣無爽快，我無想 bueh 看齒科，總是一想著細空 m̄ 補，大空叫苦隨請伊 kā 我鬥揣齒科先生看問題，發現台灣齒科講 ê 蛀齒是齒岸發癀免閣挽喙齒 m̄-koh 愛治療至少兩冬，治療期間，德國齒科先生 kan-ta 這句話「Gún 從來 m̄ 捌搪過嚴重性行到 7 ê 患者踅翻頭轉來到 3 而且保持到治療結束，大部份 ê 患者 tī 保險期結束就挽喙齒，紲落來消失去別國鬥假喙齒，搪著問題 tsiah 閣轉來揣我。」
食食是上天然 ê 藥方，好 ê 四常習慣是上天然 ê 保養，過額 ê 醫療資訊 hōo 我開始縛跤縛手 mā kā 一隻蚊子做大象舞，不過我是一位驚齷齪 ê 人 mā 無興 kā 家己捒入烏空 tuì 家己點磺火，所致我交磅仔徛遠遠，交意愛 ê 運動相放伴，過額 ê 資訊當做參考，有問題請教醫生 mā 家己做醫生，搪著無想 bueh 食肉 ê 日子，就莫食，搪著想 bueh 一盤齊齊豆仔、番薯遮 ê hōo 健康資訊講全盤全全含水碳素 ē 歕雞胿 ê 料理，我就順我 ê 心隨我 ê 意享受我意愛 ê 喙斗。
鱷梨仔是油，無要緊。
荷蘭豆仁是含水碳素，無要緊。
白鳳豆是含水碳素，無要緊。
花豆是含水碳素，無要緊。
番薯是含水碳素，無要緊。
你 ê 盤仔齊齊是含水碳素佮菜蔬無半塊肉，m̄ 通。
哦，這个問題 tuì 我來講就若高麗菜 buē hōo 你大箍，無要意伊 ê 分類，畢竟科學是幫贊咱理解 m̄ 幫贊咱叨撚厚甲若蠓 ê 相踏黜。是，寫部落格是一件好代誌，搪著齷齪相踏黜 ê 問題，順家己 ê 跤痕看向時佮目今，隨理解順其自然 ê 自然就是你愛理解「自然食物」𤆬 hōo 你 ê 享受，你向望 ê 喙斗抑是健康 m̄-tsiah 有應效。
Den Stil verbessern - das heißt den Gedanken verbessern, und gar nichts weiter!
提升風格，意思是革新思考按呢 niā-tiānn
Friedrich Nietzsche
聽公視台語台 Podcast 討論台語新辭庫研究員建中同學分張落落長 ê「苜宿芽」、「碗豆芽」遮 ê 華語辭按怎講，無面冊口座 ê 我無機會探訪，總是按烏白編分張，至少有揣著金花菜這个講法，這久順這个記持想著「碗豆芽」號做荷蘭豆穎佮荷蘭豆芽，我想著 gún 兜慣勢講 ê 三色菜，華語講 ê「三色丁」ê「碗豆仁」阿母講 ê 青豆仁 mā 會使得跟綴這个理路 kā 伊生湠做荷蘭豆仁。
提升風格正港是革新思考按呢 niā-tiann。
