根據科學研究，一頓飯頓時間上少愛食三十分鐘，大腦 tsiah 有法度理解咱食飽矣。
順這个科學研究，我成做一隻貓好玄，一頓飯頓 ê 內容若 tshan-tshiūnn 相片按呢生，大腦敢需要繼續開 30 分鐘 tsiah 有才調感受「咱食飽矣？」
我 ê 食飯時間 m̄ 捌窮時算秒，起因我自囡仔時食一頓飯至少 10 分鐘，無法度食過 10 分鐘規氣放棄。高職三冬，因為導師紅龜生蟲，龜怪 ê 堅持，要求 gún 一粒便當 kan-ta 會使得食 5 分鐘，我規氣放棄訂便當，換 hőng 貼標仔講「無合作。」
這款舊漚舊臭，過了代放火燒，免閣喋。不過我想 bueh 知影家己 ê 大腦需要幾分鐘，起因我捷感覺家己食一頓飯頓，食甲 kiōng-bueh 揣 Sandmann 睏神交牙槽骨痠...
目前 ê 我無俗稱落下頦，華語講 ê「顳顎關節」愛揣齒科先 ê 問題。
寫著「顳顎」我好玄台語按怎講，請教線頂字典得著智慧生：顳顎 jiap-kok。
搪著科學研究進前，無啥人投我食一頓飯若 bueh 趕火車，不過 tsuē-tsuē 人投講我驚大箍，僫招食晝。
這个恐龍年閣 ê 故事無啥好熥，總是無熥這件過了代無彼个才調紲講 hőng 投食飯若 teh 趕火車。
啥物是大箍，啥物是瘦抽這件代誌 tī 我 uī-tio̍h 別人兜 ê 喙痟過一斗 m̄ 捌閣要意，總是自出業開始感受身體無愛一日食三頓，我就順身體 ê 通知按一日食三頓轉做兩頓到今 m̄ 捌變化，除非我 ê 早起頓食無夠額像相片按呢生，我 tsiah-ē 踅做三頓。
第一斗交 gún 翁兜 ê 勥爸母見面，我請 gún 翁 kā 𪜶爸母講我一日食兩頓，食頓時間交𪜶 buē 敆逝，我會使得家己攢。
勥爸母應好，不過事實交品好 ê 事項是一人行一路。翁兜心肝寶貝代，鼻無鳥鼠無洗身軀，所致閬過，總是順科學研究我非常確定，翁兜 ê 心肝寶貝準做一頓飯頓食超過三十分鐘閣敆咖啡、果汁猶是食 buē 掠枵 ê 8 點食一頓，10 點閣來一斗，一日六頓。
搪著科學研究 ê 今仔日，巧手機仔𫞼頭前 hōo 伊 tuì 我窮時算秒。
腹肚開始脹胿矣，看一下仔時間，12 分鐘，盤猶有偌 tsuē 物？
我 ê 天公伯，肉猶原規塊好好，一塊攏無減，白鳳豆交馬鈴薯猶有三分一，白花仔菜猶有四分一，舖底 ê 麻仔葉 mā 猶有二分一，忝，繼續拍拚。
「敢食有飽，我會使得繼續 kā 你飼」45 分鐘足，最後一喙優格送入喙隨請教人已經成做一欉日頭花栽 tī 磚坪行光合作用 ê 翁。
「2 塊全麥俗麭𩛩果子醬，多謝。」
「你愛知影家己是枵饞抑是腹肚枵」翁仔姐牽手減肥初期，翁順𪜶兜 ê 慣勢講按呢食飯頓傷過額，我按斟酌分拆到切橛成做枵饞抑是肚腹枵 hōo 伊家己思考。
「枵饞」翁那做日頭花那講。
俗麭𩛩果子醬款去磚坪，我 mā 跟綴伊 ê 跤步栽 tī 磚坪成做日頭花順阿波羅 ê 馬車一輪一輪向西行。
向時慣勢飯矸 kan-ta 肉一味 ê 翁，因為健康 mā 跟綴勥母 ê 跤步 hōo 伊決心肉食少菜加添。
總是伊 ê 人生態度 tshan-tshiūnn 近來聽 SWR1 Podcast 討論社會福利 tsiâu-tsn̂g ê 德國呔討散凶家庭無減反增其中一段「大狗爬牆，小狗看樣，序大無好樣，序小討和尚，爸母討食 m̄ 討趁，歹竹敢 ē 出好筍」，佗一項是菜，佗一項 m̄ 是菜，伊講準算。
早前猶是過冬鳥翁某，伊承爸母 ê 專家講 tuì 我是一耳空入，一耳空出，這久家甲徛遮，搪著伊講 gún 爸母講專家按怎講，我隨請 Visite, Die Ernährung-Docs 等等 ê 德國專家出面交伊盤撋。
這盤料理就是 Visite, Die Ernährung-Docs 交伊喙白盤撋 ê 成果。一塊雞襟胸兩人分，無夠 ê 肉交換手 hōo 白鳳豆。菜蔬，特別是生菜 m̄ 是西洋萵仔菜 tsiah 是菜，麻仔葉交頭目生菜等等齊是生菜。白花仔菜 m̄ 是䆀味，是好味素猶未揣到位。
