德國人底時時行啉紫頭菜汁我無研究，總是見總舖師教人絞紫頭菜汁，我 ê 反應交攝影工作員𫝛款，紫頭菜就 hōo 伊跍 tī 菜蔬區莫越界成做果汁。
三个試驗者，三个無佮意，準做總舖師講營養豐沛，三个試驗者猶是講「菜蔬歸菜蔬，果汁歸果汁，營養有 tsuē-tsuē 路途通得。」
寫著紫頭菜汁我又閣成做貓好玄，臺灣敢有綴著遮 ê 時行食優格粉？隨向 Google 跋筊，Google hōo 我象桮，臺灣 mā 綴著德國時行。臺灣 ê 優格敢閣 tshan-tshiūnn 向時按呢，齊是優格奶，倚 bueh 7 冬 m̄ 捌轉去臺灣無理解，總是優格 tī 德國是少缺，遮 ê 人鮮沢優格 m̄ 食，食加工優格粉，這....別人兜 ê 代 m̄ 免我加講，總是一想著紫頭菜汁試驗者 ê 反應交回答，我 mā 好玄，好好食一項物件敢有遮爾仔困難？我 ê 意思是，無欠喙齒 ê 人呔討 kā 遮 ê 湯湯水水當做飯頓來食？
囡仔時 kan-ta 𣁳一湯匙入碗做飯湯食，阿母就隨講「你敢 mā 跟綴恁阿媽無牙愛透湯 tsiah 有才調好好哺一頓飯」阿母講這段話 m̄ 是剾洗阿媽，是 bueh 提醒我按呢食飯 tuì 胃無好。現此時 ê 醫學發達 mā 證明，食物無哺 hōo 幼幼直吞閣較勇健 ê 胃腸 mā buē 堪。
趁 Stoll 阿爸 ê 話，紫頭菜 tuì 我來講是新食物。第一斗知機這項菜蔬 mā 是迵過食食愛食有機生食 ê 台北朋友，彼陣 ê 紫頭菜齊進口，價數鞏金閣包銀，準做朋友講甲偌好久，我猶是交伊徛遠遠，畢竟我 ê 手骨一屑仔攏無粗勇。
後來有機會來德國談戀愛 kā 這个屬歐洲人 ê 菜蔬分張 hōo 伊聽，伊隨捾罐頭轉來講「Gún 德國人攏按呢食」，就此紫頭菜成做我 ê 謝絕戶。是講，謝絕戶 mā m̄ 是紫頭菜一項猶有白草花、紺草花、白銀魚，簡單一句來德國談戀愛總有按膨風成做消風轉去臺灣。彼陣 ê 我 mā 深深相信德國無好食物。
總是我猶是臺灣喙斗 m̄ 是德國喙斗，我 ê 胃腸無才調扞 WDR QUARK: Gesunder Darm – gesunde Psyche? So funktioniert unser Mikrobiom 4 分 36 秒這款飯頓過日。德國人有 30% ê 人身體非常無健康，遮 ê 無健康按自來廠房設計無完整 ê 人無 tsuē，遮 ê 無健康大多數是悜性閣悜性造成。
德國人 ê 逞性食食，m̄ 免我這个外國人加話，畢竟𪜶家己 ê 醫生 mā 講，只要逞性食食改變，大多數 ê 患者有法度翻頭 kā 健康揣轉來，總是德國人慣勢食藥處理問題，這項藥無應效換別項，這 mā 是咱德國醫療 ê 大問題，咱德國 ê 藥仔若林檎 ê 窒倒街。
我無德國喙斗 mā 無德國脾土，所致自食食慣勢跟綴 gún 翁按呢食，罕得抗議 ê 胃腸三不五時 Ver.di(抗議)，抗議甲我掠做我 bueh 上西天。
舉一个例，2019 進前猶未交𪜶爸母拆破面進前，gún 上北彩衣娛親探望𪜶，𪜶一家伙仔像 Quark ê 4:36 按呢相紲食一禮拜規仙人猶原好好，我食到第三天隨 buē 振 buē 動，因為腹肚疼。這件代誌 hōo 勥母撏牢牢，起因伊認為我是刁意故無合群交刁工 kā 洗面。
「Gún 翁交 gún 後生攏愛食我款 ê 物，你 m̄ 免款。」
「遮 ê 物是恁後生交翁婿交代我款--ê。」
我無德國喙斗 mā 無德國脾土更加無德國勇甲若戰車 ê 體格 uī-tio̍h 解決腹肚無四序 ê 問題，我開始 kā 眼光囥踮德國食譜，起因臺灣 ê 紫頭菜食譜 tuì 我來講 buē 敆喙。
臺灣 ê 紫頭菜按怎賣，我 m̄ 捌一个呼，總是歐洲 ê 紫頭菜有三種選擇，一種是罐頭，一種是真空包裝，一種是著時鮮沢 ê 紫頭菜。這三款頭前兩款是隨開隨食，德國著時 ê 紫頭菜是 6 月到 11 月。
受地區食食影響，gún 遮 ê 鮮沢紫頭菜無啥銷路，所致我 ê 紫頭菜齊款真空包裝轉來試鹹汫，目前上敆喙 ê 紫頭菜是按法國。德國交荷蘭 ê 紫頭頭，酸甲 hōo 我好玄德國有偌 tsuē 人愛洗腰子。
三廳官難斷家內事，德國人兜 ê 代就交 hōo 德國人去處理 m̄ 免加我一匙湯匙芥辣醬➀。
我愛食紫頭菜，總是這久無著時，準做著時半路交伊做朋友 ê 胃腸 mā buē 堪得隔轉日 ê 走腹...
我無𠢕脹肚抑是𠢕走腹 ê 問題，總是胃腸一搪著鮮沢紫頭菜隔轉日就喙食，hōo 尻川坐數，走腹走 buē 離。不過這个現象 kan-ta 限 tī 鮮沢紫頭菜。
平平是紫頭菜，真空包裝食隔工 buē 走腹，呔討鮮沢食隔轉日隨走腹? なぜ? Warum? 掛心伊過寒，我 mā 人參殺人無罪，大黃救人無功 ê 對症下藥透薑黃(kiunn-n̂g)猶是無較縒 ê 500g 一包 ê 真空包裝紫頭菜捙拚 buē 過無夠 200g ê 鮮沢紫頭菜。
Pourquoi？呔討按呢生? 唯一 ê 答案只有身體交鮮沢紫頭菜都合 buē 拄好 niā-tiānn。
這站仔美國四界抾關稅 tuì 歐洲關稅猶未抾到農產品，德國市場煞勻勻仔見無美國番薯 hōo 愛食番薯 ê gún 淡薄仔心酸酸。是講，美國番薯近來罕得看敢是關稅問題，我家己 mā 無確定，不過按美國番薯沓沓仔 tī 德國收水，埃及、葡萄牙、西班牙交非洲 ê 番薯沓沓仔發穎生湠，講這个變化無受著關稅影響，我個人是感覺這个機會較少。不而過，這个問題凡勢 mā 受南加州大火燒 ê 影響。
美國番薯交葡萄牙抑是西班牙遮 ê 番薯相比並，窮實無宛 2 體，總是美國番薯就交𪜶 hōo 人 ê 印象「人懸漢大」，所致準做𪜶 ê 價數比葡萄牙抑是西班牙遮 ê 番薯較漲懸價一寡，我猶是選擇伊。
這斗踅 Aldi 見著埃及番薯總算無閣幼枝骨，價格 1 公斤又閣減 30 仙歐圓，比近來又闙漲懸價 ê 塗肉林檎大碗閣滿墘，海馬隨泅來這出 m̄ 免沐油煙閣有飽滇營養 ê 鱷梨仔紫頭菜番薯烘，美味しい。
➀ Seine Senf dazu geben 德國俗諺語，發表個人意見
