不論扞鼎抑是無，我 ê 食食喙斗 m̄ 捌走過回頭車 ê 一日熥三斗抑是隔轉日接力走標繼續熥。
這是好喙斗抑是喙白，知食 m̄ 知訴喉韻 ê 我 m̄ 知機，總是我清楚知影無走回頭車 ê 食食慣勢 hōo 我白汫無素 ê 人生，有機會按舌楦到全世界 m̄ 是縛 tī 仝世界像大多數 ê 德國人，一塊麭餾三頓，閣按三頓餾一世人。
食食反應人生，人生反應食食，gún 翁 ê 心肝寶貝𪜶勥母就是上好 ê 見本，一塊麭餾三頓，閣按三頓一世人，人生大細事 mā 相𫝛，六十冬前 hōo 西班牙人建議改手路，六十冬後手路原在 m̄ 捌改變，建議 ê 人按西班牙人改做台灣人，伊四界投 hōo 人知 ê 理由猶原相𫝛 m̄ 捌改變，台灣人無食 ê 文化 m̄-tsiah m̄ 捌貨。一个人一世人有才調堅持 m̄ 進步 mā 是厲害。咸豐三，講到今，換題目。
驚蟄(kenn-ti̍t)交換手 hōo 春分進前，天無喙清甲淚珠㴙㴙落，不過依依難捨幔在眼前 hōo 合該是白清透光 ê 頂晡轉做文青 LOMO 風 hōo 我 Blue。
Canon ê Auto 已經強甲 m̄ 免修圖，搪著天 ê 喙清 mā 愛承 Blue，唉。相機收好勢，大聲喝翁來食飯，那食那愖冰箱賰無半節 ê 瓜仔哖交愈來愈熟 ê 鱷梨仔敢有才調聽候到日鬚來行踏。
愖仔愖，愖無四伨 ê 備案，阿修羅隨來點磺火情緒叨撚，好好 ê 気持ち因為這磺火，隨 buē 臭殕隨反烏。
這定著是換年➀ê 影響，攕那插那 tuì 阿修羅講「你點 ê 磺火 tuì 我無效應」， 攕那插喙那享受瓜仔哖、林檎、麻仔葉、鱷梨仔交橄欖油、Lê-bóng 汁 tī 舌跳芭蕾 ê 幸福。
林檎又閣翻頭一公斤箍外，瓜仔哖 mā 按一支 0.59€ 起價到 1.19€，鱷梨仔....m̄ 敢繼續想落去，這篇食譜規氣莫記錄...無可能無記錄，我愛這色緻 mā 愛這滋味，這久無記錄後回就愛大海摸針，費氣費觸。
攕那插喙那哺，bueh kā 歹代誌揣出好方法，就是交伊隨人付米，隨人落鼎，聽候時間掖鉛粉...
隔轉日 m̄ 管天色如何，心肝穎 ê 綿死綿爛猶原 m̄ 放伊走，新點點是短時間，短時間是新點點，昨日成做過了代，今仔日 ê 過了代猶未過磅空，冰箱 ê 瓜仔哖捎出來削片，熟甲 kiōng-bueh 做糜 ê 鱷梨仔輕輕仔剝，文文仔切，遮光 ê 林檎揀一粒，今仔日猶未成做明仔日，田螺循舊逝，大丈夫。
田螺循舊逝，大丈夫，較行 mā 仝逝 ê 猶原 LOMO 風格...
我 ê 世界是彩色，我 ê 心情是 Panton，我 tuì 1950 無痴迷，Um das Gute zu lesen, ist eine Bedingung, dass man Schlechte nicht lese Bueh 讀出好 ê 物件，就是莫讀出歹 ê 物件。
日子是一卷冊，今仔日讀 ê 字句交明仔載讀 ê 字句無相𫝛，放阿修羅去修行就是准家己按山雺出帆。
驚蟄正式交換手 kā 透早 ê 6 點交 hōo 春分 ê 7 點，天見著新 ê 幸福做伴，金絲四散旋藤，我紅龜生蟲，龜怪 ê 情緒 mā 按磅空行出來。
感謝阿羅 ê 分張 hōo 我 m̄ 免交欠缺 ê 鱷梨仔、林檎、瓜仔哖走相逐。
粉透金，金透紅 ê 林檎文文仔切，膨皮甲若埃及番薯 ê 鱷梨仔輕輕仔剝，勻勻仔切，飽水 ê 瓜仔哖薄薄仔削，麻仔葉順橄欖油寬寬仔泅，Lidl 過 App ê 無料青豆仁取來敆，擘腹過期 m̄ 知按怎敆味 ê 白銀魚款出來敆。
春來掖鉛粉矣，今仔日 ê Canon m̄ 免調 P, Av, Tv...自動定 Auto，這是春分 ê 色緻，這是我 ê 春分。
好看䆀看在人看，好食䆀食在人食，我 ê 春分上美麗，我 ê 林檎綠生菜盤上合我胃。
➀ Wechseljahre 換年，更年期(king-liân-kî)
