起手無回大丈夫，交翁品好早起頓牽手成做歐洲人食生冷菜蔬盤敆麭、塗肉林檎、意大利麵等屬伊意愛，下昏飯牽手成做亞洲人食一桌有五種喉韻交燒烙魂舒 ê 味素。
棋一行，起手無回大丈夫，準做好喙斗，自帕水就透血 ê 脾土猶是無本等 uī 愛轉脾土 kā 生冷菜蔬釘根。
歐洲有閏年➀無閏月，向時四季分明 ê 節氣 tī 地球溫度若人按平埔沓沓仔𬦰上懸山，遮 ê 寒人以德國做主體，逐冬若閏月雙春年，兩春夾一冬，無被燒烘烘僫得感受兩春夾一冬，十欄九个空 ê 寒。漢醫講百病寒為先，生冷菜蔬屬五行、五色、五性 ê 寒性佮涼性適合 tī 熱人來降火氣。
西醫無這个概念，德國人敢 mā 自古就食生冷菜蔬，這个問題我無研究，總是交我成做龍鳳無愛食菜蔬 ê 德國翁婿講「生冷菜蔬比 gún 阿母白煠 ê 花仔菜、敏豆、紅白草花閣較好味素。」
Gún 翁慣勢 ê 喙白是𪜶兜阿母飼出來抑是自本生成，這个問題自我開始扞鼎已經揣著答案，所致臭臊 ê 清飯免閣熥 buē 離。
漢醫講百病寒為先，總是這个寒敢若較適合臺灣人。日本、韓國、越南遮 ê 齊捌接受儒家文化影響 ê 國家𪜶 ê 月內按怎做，我無一个認捌，總是以咱多數臺灣人齊知捌 ê 生囡後 ê 照護來講，西方人囡仔一生煞 a̋i-sīr-khu-lìn-mù 先來一大桶，咱臺灣人是隨關房間一月日無洗頭鬃、無食冰。
這个精差是按帕水生成抑是落地培養 tī 往過 m̄ 捌好玄過，這久比研究司迪麥 ê 阿貓呔討 ē 昏 tī 鋼琴頂閣較好玄，起因出世 tī 番薯島 ê 我比身軀邊 ê 德國朋友，m̄ 管是查埔查某抑是腹內有三把火 ê 少年囡仔 tī 寒人閣較 m̄ 驚寒。不過自起手無回大丈夫交翁品好早起頓做歐洲人，下昏飯做亞洲人我開始發見一月日總有黃金變水沖 ê 狀況。黃金變水沖 m̄ 捌造成我 ê 困擾，總是人愛追求完美，我愛食著照三頓，睏著照時陣看了好心情 ê 日日黃金，自然就起手斟酌繩問題。
骨頭是火爐，骨頭若含梢爐火就燒 buē 旺，無確定身體屬寒抑是屬熱 ê 我面對一月日總愛有無由來 ê 起畏寒開始繩問題。
年歲勻勻仔行到換年➁ê 我，筋骨無烏貓姊 ê 軟𩚨扭掠，總是猶算健欉有法度做䖙倒英雄 Yoga mā 無搪著翁朋友翁仔姐 ê 狀況，趨一倒手節骨碎甲若鹽，交寒人燒氣捘甲 25 度，太太 ê 換年若無夯翁仔姐就做陣喝厝內呔寒甲若冷凍庫 ê 譀呱呱。
骨頭猶算勇健無含梢，請繼續保持，換題繩。
一月日總愛來幾斗 ê 交懍恂按佗來？ 一日金烏烏金甲若烏魚仔，翁仔姐做陣那曝日頭欶維生素 D 那食早起頓，我 ê 腹肚步頻起畏寒，咂一喙燒咖啡，寒甲爍爍顫 ê 腹肚敢若幔著一領裘仔隨燒熱，盤內 ê 生冷菜蔬敆生冷白銀魚繼續送入喙，靜甲若死海 ê 腹肚又閣起蛟龍，食飯飽做金條 mā 開始勻勻仔出現金條伴水沖。
漢醫講火氣大食寒涼食物退火，不過身體驚寒繼續食寒涼食物 m̄-nā ē 呿呿嗽 buē 離，走腹 mā 走 buē 離。漢醫講 ê 寒性體質照目前 ê 狀況來看 kan-ta 五分一，明仔載閣來試一斗，看寒涼食物敢正港無適合做早起頓食，畢竟喙食隨 hōo 尻川坐數 ê 早起頓 ka̋nn 捌搪過這味，早頓店 ê 紅茶牛奶。
起手無回大丈夫，進前 m̄ 捌搪過 ê 喙食隨 hōo 尻川坐數 ê 走腹正港按生冷菜蔬盤來，這个一日月 tsiah 一兩斗 ê 走腹無嚴重甲愛成做勥母 ê 見本，kā 蠓仔做大象➂哭呻 hōo 翁聽，總是走腹出現現，uī-tio̍h 起手無回大丈夫舞豬舞狗 kan-ta 舞死家己 mā 誤著伊。
「你知影我是一位尊存隨人喙斗 ê 牽手」翁仔姐做陣看 Ghost(鬼，華：第六感生死戀)當 Oda Mae 歡喜成做好額人 Sam 要求伊 kā 手頭 ê 支票捐出去，我想著 2019 當我歡喜會使得順家己 ê 需求交勥爸母見面，翁像 Sam 按呢等支票到手 tsiah 講出實情 hōo 我心狂火著險 bueh 煏斷腦筋交這幾冬 uī-tio̍h 𪜶兜掠 buē 了 ê 喙白所湠 ê 冤家量債，我想著按怎解套 ê 講法。
今年是觀察年，聽牽手按呢講，雙目若牛 ê 伊瞪甲若牛見著鬼仝款 ê 驚惶問「我敢閣承著 gún 爸母 ê 歹癖 hōo 你無爽快？」
「你無有樣看樣，有例趁例，免驚」我笑甲腹肚疼 mā 若那搭伊 ê 心肝那講「1234 驚甲無代誌。」
𪜶小妹因為厝內慣勢離緣 2 斗(這是伊有分張 ê 數字)，我因為伊惜命命 ê 厝內傳統 mā 要求離緣，伊開人講聽入耳，鬼講擲一邊，坐騰騰聽候我 ê 換氣。
「好無相致蔭，歹煞相牽累，我個人發現我 ê 體質無適合 kā 生冷菜蔬盤做 365 頓早起頓，像屬寒 ê 紫頭菜 kā 伊轉做屬熱猶是走腹，所致我需要交你做伙商詳咱品好 ê 早起頓食歐洲，下昏飯時亞洲。」
聽著牽手 m̄ 是討論賣囝無叫囝名，當田無從田頭行 bueh 佮伊切甲透底隨講「早起頓食亞洲，窮實 mā 是好味素。」
近山知鳥音，近水知魚性，有緣鬥陣成做龍鳳 m̄ 是一冬抑是三冬 ê 短，巧手機仔隨囥伊眼前講「這猶歐洲味，咱明仔載做陣試這味你感覺按怎？」
「當然 mā 是好。」
原食譜是茄仔交蘑菇醬做伙煮 hōo 爛，我無佮意爛爛 ê 茄仔 kā 伊改做綿綿軟軟烘箱版本。
原食譜是敆清飯做伙食，我㧎 tī 飯煮好囥冷會使得維持血糖穩定交助減肥 ê 應效，這臨時臨曜 ê 菜單 buē 赴處理就大主大意 kā 伊換做塗肉林檎，押尾證實 buē 敆喙 ê 猶是全穀較敆脾土。
這是第一斗食甲十全欠一味繼續試驗 ê 版本，本底按算 ê 糙米因為無頭神 kā 浸水過暝囥冷，迒 buē 過 ê 食冷飯助減肥就放伊自由換秮仔。秮仔交糙米敢有相𫝛 ê 應效，我無趼究，總是順原食譜 ê 手路出菜，秮仔確實好味素 ê 敆喙 。
➀ 新曆 2 月 29，四年一斗
➁ Wechseljahre, Menopause，更年期
➂ 德文俗諺 Aus einer Muecke einen Elefanten machen 鳥鼠空當做圓拱門、Buē 直，刣雞用牛刀，磕著就司公姨、小題大作
