2024 挪威車日子露營，tī 挪威惡魔之舌 Trolltunga 彼跤兜露營，挪威人露營敢若較慣勢家己紮 Gá-suh 出門，所致當挪威成做 gún 遮 ê 外國人一心向往(hiòng-óng) ê 露營勝地，自本在額 ê 設備成做無夠額。
自搭布棚晉級到 Caddy，gún-ê 露營裝備 mā 齊有 Gá-suh 通款飯頓，總是一搪著「無料」準做廚房遠甲若臺灣去阿根廷，準做廚房需要排隊我 mā 願意排隊，畢竟錢四跤，人兩跤，一个錢無拍二十四個結 buē 使得。
瑞典交挪威 tī 疫情進前，罕得聽德國人分張，疫情開始挪威交瑞典因為露營制度交德國無相𫝛，一時間成做露營七星寶地 hōo 德國人成做烏仔魚搢水，拚勢上北露營。Gún 自本就按算去挪威交瑞典行跤花，一見德國人如此熱情斡頭隨落南交向東行，等待這波熱情洘流 tsiah 出發。
2024 熱人，本底猶無按算 ê 瑞典交挪威露營車日子，因為慢牛總愛厚屎尿 hōo 我正式提出離緣，慢牛 uī-tio̍h 安搭這个問題隨 kā 綿豉熥 m̄ 知幾百冬 ê 西班牙車日子露營換做伊寶惜 ê 牽手心所向望 ê 瑞典交挪威。
挪威除了三文魚交交換光批認捌 ê 七山崙 ê 城市 Bergen 猶閣有啥？瑞典除了ABBA, IKEA 交《德黑蘭的囚徙》作者致著 ê 病灶是按伊 ê 首都號名，瑞典猶閣有啥？
這是心心念念想 bueh 行踏卻 m̄ 願先做功課 ê 我 ê 慢牛厚屎尿，總是這个慢牛厚屎尿猶是贏過啥物攏 m̄ 解決，kan-ta 要求我「入人門，順人意」閣較好，起因我 ê 無計畫猶是有按算，像惡魔之舌，只不過我無節著伊竟然遮爾仔出名，出名甲險險揣無露營地通歇暝交攢一頓糜飯若 teh 戰爭。
出發惡魔之舌進前迵過德國少年囡仔我認捌著阿湯兄捌來挪威拍電影，挪威 ê Preikestolen 聖壇岩 mā 因為阿湯兄 ê 影戲成做全球上出名 ê 觀光景點，總是我無料想著惡魔之舌交伊相𫝛出名。
「咱無 bueh 健行，換別搭歇暝」當我見著若中國春運挨挨陣陣，人插插插隨 tuì gún 翁講。
「繼續向行前，咱就愛睏路邊」翁擔一下仔肩講。
無法度跟綴德國人自在 tī 大自然解決生理需要 ê 我隨攑白旗，表示就按呢。
自瑞典到惡魔之舌進前，我 m̄ 捌燃過一鈷滾水 hōo gún 翁聽，自語言按英語文換做西班牙語 hōo gún 楔著一角位，我勥母上童拚勢燃茶鈷 hōo gún 翁聽「這个露營區拍歹瑞典交挪威 ê 露營好名聲 M̄-nā 四序大碗滿墘閣有局。」
「咱 mā 好字運，搪著我 ē 曉講西班牙語」翁又閣擔一下仔肩表示，m̄ 管我按怎哭呻，事實就是事實，伊就是貴甲無道理閣無四序 ê 欠東欠西。
我 m̄ 知影別國按怎生，總是見著挪威人 tī 家己 ê 國度露營需要講無輾轉 ê 英文，這 mā 蓋紅龜生蟲 ê 龜怪。
挪威 ê 露營價數大約 tī 25 歐圓一台車，這一台車敢有算大小，我無清楚，總是惡魔之舌彼暝，一台車無算人頭 45 歐圓兼無提供電源 hōo 我火山爆炸，準做廚房相挨相𤲍我 mā 綿精 buaih 動 Gá-suh 款下昏飯，四常放我一个人獨立作業 ê 翁 mā 因為這个現象徛踮門跤口等我發落。
挪威熱人若寒人，廚房 ê 門 m̄ 免人關，伊家己 ē 自動關門，因為燒氣 teh 行。當我準備 kā 白煠卵 ê 蓋挈起來，規个目睭雄雄罩一陣霧交一陣熟似 ê 芡芳味，我交隔壁 mā teh 煠卵 ê 挪威少年人做陣 kā 頭越向倒爿，一位交我相𫝛面模仔 ê 女子，敢若無要意廚房無排油煙機，門窗 mā 關甲密喌喌 ê 形 teh kā 蒜頭交蔥仔芡芳，紲落來 kā 罐頭 Kam-má-tooh 花飛倒落去，規个廚房隨若三溫暖 hōo 人見 buē 著物，鼻空 mā hōo 伊 ê 手路嗾甲拍咳嗽。另外一頭排隊等待微波爐 ê 美國少年囡仔緊甲門拍開 hōo 這个氣味通出外旅行，若螞蟻認真煠麵煠卵抑是微波 ê 每一个人總算得救。
物件款好，翁成做貓笑問我「彼个看起來誠𠢕扞鼎 ê 女子按佗來？」
「若無意外，聽英語口音交煮食慣食，應當按臺灣來」我笑應。
這久記錄這篇食譜海馬泅去這件家己 mā 捌做過 ê 現世，隨想著是人無法度改變慣勢，抑是目頭懸過天 hōo 咱無法度入港隨灣，入鄉隨俗，綿豉無仝鄉仝俗？
寫這段話交彼位短短一面之緣 ê 女子無底代，總是按伊生湠 ê 問題 hōo 我有機會翻頭看家己 mā 捌做過 ê 代誌，像食翁蜜，食甲 buē 記得家己窮實 buē 曉扞鼎 tī 𠢕人頭前展肉跤 ê 見笑代。
歐洲人是按怎捷食燉肉抑是烘箱料理，我想這交𪜶 ê 廚房多數無安裝燒氣有相干，遮 ê 料理手路 hōo 𪜶 tī 寒人 m̄ 免要意窗仔無通風。
寢頭仔扞鼎，我捌 uī-tio̍h 稅來 ê 厝無通仔 hōo gún 安裝排油煙機，款糜飯齊開窗仔吹燒氣佮 gún 翁成做相拍雞仔冤家量債，這久 ê 我入人門，順人意，我無納電錢，我訓練家己窗仔門開開猶原有法度扞鼎，貧惰洗碗盤 ê 我 mā 訓練家己飯頓 m̄ 免食梅花，m̄-koh 食綢春花(tiû-tshun-hue)，像這出菜，一盤有幾仔項菜色，無油煙 ê 番薯、白花仔菜、紅菜頭、紅洋蔥，淡薄仔油煙 ê Lê-bóng 蜂蜜雞襟胸。
寫著 Lê-bóng 想著劉怡里營養師分張 ê 小撇步，食食透寡 Lê-bóng 汁喉韻有無相𫝛 ê 鹹汫，我 bueh 添一句，自跟綴這个小撇步我 mā 發覺烘箱料理 ê 油 ē-tàng 閣較減寡，像白花仔菜烘，往過慣勢濫 2 湯匙(30ml) tsiah 有才調 hōo 伊油光金滑，這久 1 湯匙無到就有法度烘出芳𩚨軟 ê 白花仔菜。
Lê-bóng 你誠實是魔法師，神奇甲！
