「你敢捌斟酌這个講法」翁仔姐做陣食早起頓，那討論對面美國太太倚 bueh 2 禮拜無見人，凡勢去安胎，那討論車庫有三台 Bián-juh 厝頂又閣一堆太能陽枋 ê 放送頭阿媽落樓梯 ê 動作敢若閣較無四序，翁食菜 ê 小妹步頻徛在我眼前 hōo 我成做貓，好玄伊 tuì 小妹 ê 想法，起因我個人認為人 ê 食食態度是自來性地 ê 牽藤。
「牛奶按動物來，我無啉，我啉豆奶。」
交翁來往，我隨知影翁有一个無蹛德國 hōo 𪜶爸母投講是了尾仔囝 ê 小妹，這个小妹 uī-tio̍h 動物福利(Tierwohl)選擇做素食者。初聽翁分張小妹 ê 愛心，我規个人感受著伊無私 ê 愛，押尾感覺這个素食者交阿媽 ê 屘囝屘姨無宛 2 體 ê 啥物是素食，啥物 m̄ 是素食齊𪜶講了準算，無地參詳，簡單一句無順𪜶 ê 意，你就是刁工 kā 揣麻煩。
自囡仔時代就認捌阿媽 ê 屘囝我愛叫阿姨 ê 屘姨伊 ê 特殊，一搪著素食者我無第二句話 ê 倚遠遠遠來表示我 tuì 𪜶 ê 尊重。簡單講隨人付米，隨人落鼎，食食慣勢無相仝莫硬愛相疊，除非做陣食飯 ê 人是食方便素，抑是無要意臊素齊囥一桌 ê 素食者。
我無攻擊素食者，也無批評素食者，總是這是囡仔時代 ê 經驗引𤆬我保持一頓飯有才調好好仔享受 ê 方式。
Gún 阿媽 ê 屘囝是鼎、碗、箸一沐著臊齊愛換，無換規个厝頂隨掀 ê hōo 兄哥交阿姊齊無愛交伊來往，gún 遮 ê 序細一講著一世人無結婚 ê 伊，若入大厝 Tsiâ bueh 負責，隨个走甲若飛，無人 bueh 接手就知影伊 ê「綿死綿爛」偌顧人怨。
凡勢有人 ē 講，這誠正常矣，伊無食臊，鼎有臊味自然 buē 敆喙，像穆斯林無食豬肉，一食沐過豬肉 ê 鼎 mā 隨無四序。遮 ê 問題 gún 囡仔時齊捌搪過，uī 阿媽 ê 屘囝攢一副屬於伊個人 ê 食飯家私猶是無法度滿足伊 ê 需求，伊愛 gún 逐家跟綴伊 ê 跤步食素解罪惡。
人生有信仰是好代，總是當信仰成做食人 ê 正當理由來壓迫別人自由 ê 意志，彼就破功走火入魔。
一个素食講甲若跤帛，我 mā 厲害，哈。
「Tsuē 冬前 tī 台灣 ê 麵攤搪著一位澳洲人，伊講伊是素食者，我順伊 ê 盤仔看彼尾魚伊隨知影我 ê 想法隨笑講『我是食魚 ê 素食者』」盤內 ê 串仔敆入卵包送入喙，那熥倚 bue̍h 20 冬前 ê 記持「順這个澳洲朋友 ê 分張，我是海產素，來到德國 uī-tio̍h 褲袋仔袋磅子 tsiah 轉做肉食者。」
德國 ê 海產偌鞏金，以 Hummer 歐洲龍蝦來做比例，按網路請教來 ê「阿布潘水產」ê 波士頓龍蝦交自稱德國上大碗閣滿墘(Lohnt sich) ê 超市 tī 2025.14.14 ~ 4.19 ê 特價商品，冷凍歐洲龍蝦一公斤 70.79€。以歐洲龍蝦做比例是較一分田磅甲幾若甲，不過這个價數拄好反應準做我綿豉做魚素者 uī-tio̍h 心臟需要 ê B12 我猶是破戒食四跤交兩跤，畢竟我 ê 食食興趣無包括藥仔做飯食。
德國醫學衛教節目 Die Ernährungs-Docs 有一集討論素食者驚大箍 mā 驚營養無夠額 kā 營養保養品當做飯食 hōo 我想著德國醫生交《醫師好辣》急診醫師分張 ê 故事「有 ê 人就是愛食藥 kā 藥做飯食」來表示綿死綿爛 m̄ 調整，仙醫仙丹 mā 僫救 。像 Die Ernährungs-Docs 這集，營養師講你 ê 無四序有路通改善，總是咱搪著一个問題，遮 ê 食物齊無適合你 ê 需求。
德國人追求健康食素食甲出一大捾問題猶無驚惶，我 kan-ta 這个想法，假使德國無先進交完整 ê 醫療保險，遮 ê 人敢猶綿死綿爛追求𪜶明知影 ê 素食問題？這个議題無啥好討論，起因人齊有火燒林投，buē 死心 ê 綿精。像勥母就是德國醫生講 ê 有問題 m̄ 改善，倚靠藥仔改善問題有才調維持 20 冬左右，20 冬後猶原踅翻頭轉來個人體質。
「我認捌 ê 素食者有 teh 做 Yoga kan-ta 同事𪜶媽媽一位 uī-tio̍h 改善規日仝手勢造成 ê 筋骨無四序，我認捌 ê 歐洲素食者十个有十个人 teh 做 Yoga，恁小妹 mā 是其中一个，這敢是恁歐洲人 ê 素食者套餐？」年歲沓沓仔添，營養沓沓仔減，那問那食那斟盤底 ê 菜色敢有七彩虹交 211：二份菜蔬，一份含水碳素，一份卵白質。
「我 m̄ 知影，不過這个組合 tī 歐洲誠四常」翁講。
「我減敆一味」我想著第一斗來德國談戀愛，我 tuì 翁講厝內環境敢有法度徙位，我需要做 Yoga，伊見我衫褲普通，無 Yoga 苴仔隨講做 Yoga 愛穿這款衫，愛使用這款苴仔交愛做這款動作，我恬靜無應聲簡單應一句「我骨力做 Yoga kan-ta 順漢醫師 ê 建議，做 Yoga 這幾个動作會使得改善車禍帶來 ê 腰疼問題。」
「佗一味？」伊問。
「Boho Style 波希米亞風格。」
運動穿插 tī 德國誠時行，猶未成做貓好玄這類穿插因由，我以家己慣勢 ê 理路認為德國是一个愛運動 ê 民族，成做貓四界巡街路發見代誌 m̄ 是戇人我想 ê 簡單，不過波希米亞風格有 80% 是 Yoga 素食者，特別是純食菜蔬 ê 素食者，像 gún 翁 ê 前女朋友，伊認為 Yoga 交菜蔬是健康 ê 保證。這个保證德國衛教專題節目 mā 捌討論過，這類純菜蔬者平均 12 冬 ē 搪著心臟無力 ê 問題，這類 ê 素食者以我個人 ê 觀察𪜶 mā 是波希米亞穿插 ê 死忠支持者。
「你敢捌斟酌這个講法，呔討動物奶做 ê Tshì-sù 無問題，啉動物奶就 buē 挃？今仔日 ê 甜路主角是優格透豆奶」𣁳一匙食奶水食甲圓輾輾 ê 燕麥片交奇亞子那講。
「Vegetarier 交 Vegan 無相𫝛，你敢知影？」
台灣人食 Like Meat 素雞、素肉、素魚... ê 歷史比恁久長交 gún 兜親情有人蒜頭、薑、葱齊 m̄ 食，我呔會 m̄ 知，反白睚 hōo 伊看是我唯一 ê 回應。
「伊歡喜就好」翁驚白煠卵食甲吐緊換話題。
「恁德國人愛詳細分類，按呢恁小妹是動物福利 ê 素食者抑是動物權利 ê 素食者？」我問。
「我無研究，伊歡喜就好。」
「食食慣勢是人格反應，伊交恁爸母無宛 2 體齊是我講準算 ê 一代傳一代，準做水火不容，猶是台南火山巖關仔嶺 ê 水火洞，峇峇峇。」
Gún 翁無應話，我繼續𪜶兜 ê 傳統開拆我 ê 研究「恁小妹講恁老母有病愛去看醫生，我順近來接觸 ê MIND DIET 繩恁兜 ê 食食慣勢交恁德國醫學會提醒恁失智症患者年歲愈來愈少年，而且人數愈來愈懸做推理，恁老母 ê 腦神經退化無到失智 mā 無才調保存三十歲後 ê 記持，所致過了代 m̄ 捌過了過。」
無一个人佮意聽外人按呢剾洗家己 ê 親人，總是這个外人講 ê 話 m̄ 是內行人看布底，外行人綴人 bué ê 譬相，繼續保持恬靜。
「恁老母四十歲外歲捅膽無去，你晏伊十冬，恁爸母愛咸豐，講到今，別人講甲臭臊 ê 提醒永遠一耳空入，一耳空出，你 mā 相𫝛，恁爸母磕 buē 著就風火狂四界點礦火燈，你 mā 相仝」話講甲遮 gún 翁隨紲話「這馬 ê 我無欠鎂。」
德國人有 80% 欠鎂，欠鎂造成半頭風、喙清、歹落眠、頭眩、上童、無頭神...這是德國醫學會公告 ê 數字，交欠鎂紮來 ê 症頭，gún 翁交伊 ê 爸母齊有，自伊改善喙白無跟爸母食百二 ê 食食，以上 ê 症頭齊走無見人。
「你愛感謝恁牽手德語講甲離離落落猶有才調掠重點處理問題 m̄ 是綿死綿爛牛角歕無風 A-ta-mah-khòng-ku-lī」我笑應。
「啥物是麥德食食」伊問。
四常我慣勢請維基大神代先做解釋，這斗無德文版本只好家己沓沓仔開拆 hōo 伊聽「Mind Diet 是地中海食食敆預防交治療高血壓 ê DASH Diet ê 食食方式，兩个齊按美國來。」
講煞伊家己隨去 Google 正港僫揣，押尾請教瑞士人工智慧解釋 hōo 伊聽，我順瑞士無料人工智慧 ê 資料掠重點講「Mind Diet 10 大項，除了酒咱無啉用食掠外，你齊有食，DASH Diet ê 五大食食交 Mind Diet bueh 相𫝛，除了 Mind Diet 無牛奶，DASH Diet 有牛奶類並建議食無脂肪抑是低脂肪類，咱兜順恁德國醫學會 ê 建議，身體無各樣建議選擇 Magermilchprodukte，像優格 1.5%，素食者好 ê 卵白質來源 Magerquark。」
「自你停跤德國捷請我食膨餅無要意我 ê 喙斗來治療我 ê 喙白，若剪蟲 ê 半頭風、僫落眠等等齊無見半个，甚至 hōo 醫生呵咾這个歲無食藥營養素閣夠額，正港無簡單，請好好保持」伊那講窮桌頂，見這暗時食西瓜，半暝仔反症，無講寡拍抐涼我 ē 著蛆。
「Tī 這厝瓦免驚飯碗食無清氣無地通食甜粅粅，借問先生敢需要我繼續 kā 你飼，抑是款兩點鐘後 ê 點心？」我問。
「一日食兩頓，頓頓食 hōo 足，糖仔餅自然免相楗」翁講。
「Gún 有一句話相諍 m̄ 認輸，相輸 m̄ 捌贏 ê 人，凡事揣理由 ê 人，白虎湯拚千碗 mā 是無較縒。你歹船拄著好港路，搪著𠢕扞鼎 ê 老母到今猶原無出大問題」喙咂一喙咖啡愖阿母 ê 年代假使有健保，阿母敢會 tshan-tshiūnn 翁爸母按呢「有醫保，健康匪類，大丈夫，無驚。」
「準做歹船拄著好港路，做陣牽手 ê 人是 m̄ 驚火燒厝，驚跋落屎礐 mā 是無較縒」向時 buē 按呢講爸母 ê 翁正港暗時食西瓜，半暝仔反正 hōo 我隨伸手摸伊 ê 頭殼額「我無發燒，詹美樹小姐」。
聽伊講我自囡仔就慣勢 ê 字名姓隨笑講 「Mind Diet 確實有應效。」
Gún 翁𪜶爸母到今 m̄ 捌 kā 我 ê 字名姓鬥著位。這是刁意故抑是無頭神 ê 記持 kan-ta 3 秒 tshan-tshiūnn Finding Dory ê 藍倒吊是路蕎蔥，不成蒜無價值去講，起因藍倒吊無外甥仔點燈火，一切照舅(舊) ê 記持。
「恁小妹講恁老母愛去看醫生，你 mā 相𫝛 ê 半斤八兩，食動物奶做 ê Tshì-sù 大丈夫，啉動物奶是苦毒動物 ê 我講準算，你按這个系統來，你愛多多支持繼續絞做伙」我講。
「交官窮，交鬼死，交牛販食了米，m̄ 通」伊笑應。
我 m̄ 知影 gún-ê 龍鳳情敢有才調行過愈來愈無興討論 ê 呔討你 bueh 按呢生，按恁爸母遐獨立敢有遐爾仔困難， 總是少年搪著 ê 人生經驗 hōo 我認捌，歹肉無割，好肉 buē 生，半路折扁擔 tsiah 有機會交問題賣囝無叫囝名，當田無從田頭行 ê 交齷齪切 hōo 透底，清氣啖啖。
翁目今 ê 變化是 Mind Diet 有應效抑是跟雞跟雞啼，跟狗跟狗吠，我無清楚，總是我清楚知影我無 hōo 伊喊著，有樣看樣，有例趁例交𪜶兜 ê 傳統絞做伙 hōo 家己好無相致蔭，歹煞相牽累用龍眼殼拭尻川。
