近來魚指 m̄ 知受著啥物因端影響又閣按漲懸價行向大落價 hōo gún 翁無法度無成做 Hamster 豬仔鼠 kā 冷凍庫櫼甲 buē 喘氣。
「你敢有遮爾仔愛食魚」我問。
「這魚比小白銀(Sprotten)抑是白銀魚(Hering)閣較好味素」伊講。逐半年愛轉去齒科複診 ê 齒岸發癀(huat-hông)約 tī 後月日，伊知影四常 ē-tàng 喝無閒貼貼無通仔專車駛我去款魚 ê 日子，tī 我 ê 齒科日是走閃 buē 掉 ê 任務，隨趁這个機會先佔先贏。
照我往時 ê 性地，我 ē 六月蚶，開喙臭 kā 伊臭甲哀爸叫母 hōo 伊交我繼續一个斡倒爿，一个斡正爿 ê 睏破草蓆三領，掠你心肝 buē 著 mā 大丈夫 ê 龍鳳生活。
Gún 翁敢誠實無愛食魚，這个自囡仔就 hőng 勥爸勥母培養 ê 磺火效應需要專業心理師 kā 伊鬥相共，半路交伊成做龍鳳 kan-ta 需要按這段六月蚶，開喙臭 ê 日子看家己學著啥物代誌。
「我 kā 家己照顧好勢，m̄-nā uī 家己 mā 是 uī-tio̍h 伊，伊致著糖尿病到今猶原 m̄ 禁喙，按呢無負責任 ê 人生態度，我無法度接受，畢竟我 ê 細膩 m̄ 是特別 uī 伊 ê 病疼來骨力，我無興照顧病人。」
第一斗聽德國牽手按呢講，我感覺伊 ê 良心 hōo 狗咬去，開始融入德國社會，我沓沓仔理解這位德國牽手 ê 意思，因為驚阿鼻地獄，我 m̄ 敢討債一粒米，百粒汗，mā m̄ 敢一日到晏六月蚶，開喙臭，總是一開始扞灶，我正經無法度無成做六月蚶，開喙臭 kā 𪜶兜規家伙仔臭甲比豬牢閣較臭。
總是，開喙臭開甲押尾 mā 行向杜子春第三斗搪著獨眼老大人 ê 回答「毋 nooh，錢我是無欲挃矣」到「毋管創啥，我干焦想欲做一个『人』，會當過正直的人生。」
自我理解我 kan-ta 要意厝內代，無興沓滴別人兜 ê 問題，家己刣，趁腹內 ê 無聊代 m̄ 捌閣纓纏。
自 gún 翁得著伊 ê 寧靜，我重新行向三美惠➀人生，巴雷斯➁ mā 賜我金蘋果 hōo gún 兜 ê 豬牢轉型做有機農場。
豆仔、番薑仔、大同仔、菜擴、糙米、魚厚甲若蠓 ê 喙白齊出現 tī gún 翁 ê 碗盤，我 ê 食食色緻 mā 按無啥有虹 ê 色緻勻勻仔行向 PMS(Pantone Matching System)百色百彩 ê 色色樂鑠。
Gún 兜食飯桌 tī 我一日閒貼貼是一桌兩鼎，我先款伊愛食 ê 物 tsiah 換款我愛食 ê 物。
自我開始一日無閒貼貼，我猶原 m̄ 捌六月蚶，開喙臭，我 kan-ta 學習彼位無坦白就無三美惠人生 ê 德國太太 tuì gún 翁講「這久 ê 我無法度 uī 你攢你慣勢 ê 飯頓，所致你愛 uī 家己做決定。」
Tī 我猶閒甲掠蝨母相咬，伊 ê 飯頓準做 kan-ta 意大利麵交麭 teh 交換手，伊 ê 菜盤猶原五彩十色 m̄ 捌踅翻頭轉去伊自囡仔時就慣勢 ê 殕色，一塊 Bá-tah 抹甲若壁 ê 麭敆一塊刺乳(Tshì-jú)佮煙腿(ian-thuí)。
「我 bueh 交你大麵炒圓仔，膏膏纏食仝鼎。」
往過 ê 我聽伊按呢講隨六月蚶，開喙臭「你莫草人幔棕蓑，掠做我 ē 改變心意交恁灶空炰田蛤，相佮」這久 ê 我啥物攏 buē 應，因為講遮 ê 話 buē hōo gún 糖甘蜜甜，愛情滿厝間。不過我相信事實 ē uī 我 ê 憢疑篩出食聲。
這久翻頭看彼久，海馬已經搜無「喙白挑戰三十日」是底時開始交底時完成，總是我相信彼斗 ê 挑戰 hōo gún 翁認捌，十二點，摃十二下是偌爾仔白汫無素交 m̄ 通拍損天公伯 hōo 伊 ê 別人是硩番薯 m̄ 落頭，伊是硩番薯拋過溝 ê 好字運。
這久翻頭看彼久，我 tuì gún 翁敢有廕掉勥爸勥母 uī 伊點 ê 磺火，我一屑仔攏 m̄ 知機，總是按 gún 目今 ê 龍鳳生活看來，準做伊無廕這葩火，伊 mā m̄ 捌撏牢 m̄ 放手，像這魚。
「這久換你扞鼎，你 m̄ 通款魚臊 hōo gún 後生食，gún 兜規家仔食魚臊齊過敏」看勥母那抓癢那目睭金金講痟話，伊是好心警告我做人新婦牽手 m̄ 通遐爾仔狼毒，抑是伊好心點揬我，交我做陣食魚 ê 人齊是老大公 m̄ 是𪜶翁 m̄ 是𪜶後生？
翁兜勥母 ê 三美惠交 hōo 𪜶勥爸家己去享受，huînn-ti̍t 我清楚知機透伊血緣 ê gún 翁 m̄-nā 愛食魚臊閣 buē 過敏，食魚臊唯一 ê 過敏源是交伊仝血緣 ê 阿母。
Gún 翁自囡仔時罕得食魚，所致伊食魚 ê 工夫交我以攕仔食肉仝款頇顢，我食雞摸需要用手 kā 肉按骨𠞭甲清氣啖啖，伊食雞摸一支攕仔掛一支牛排刀清清彩彩就 kā 雞摸骨肉分離甲清氣 liù-liù，所致食甲半老老(ló-làu)愛伊按規尾花飛、金頭魬(puánn) alias Dorade 開始食確實較困難，所致就按魚指開始引𤆬伊沓沓仔行向完整一尾魚，畢竟德國 mā 沓沓仔進口冷凍沙丁魚、小鯡魚、小白銀魚、大西洋金頭魬，遮 ê 魚一公斤 4€ ~ 9€ 比豬、牛、雞大碗閣滿墘。
「我自來就愛食魚」伊那食那講。
「這我無確定，不而過按你 ê 喙白我得著人生僫得 ê 三美惠交 m̄ 免損蕩家己寶貴 ê 人生 uī 別人 ê 無佮意豬八戒拜天公，家己刣家己，像咱 ê 姻緣。」
出這出菜廣播 mā teh 訪問街路大眾，你四常上捷食啥物魚，德國人 ê 回答「魚指」閣繼續問落去「呔討 buaih 食鮮沢 ê 魚臊？」，街路大眾回答「鮮沢魚臊是框金閣包銀，食 buē 起。」
德國人因為美國文化影響抑是社會富裕帶來 ê 喙白所引起 ê 健康危機 tī 目前猶看 buē 著若日本、韓國、台灣少子化 ê 問題，不而過已經沓沓仔浮出水面。遮 ê 衛教節目敢有才調繼續利用大眾傳播教育社會大眾正確 ê 食食生活，按這幾冬本底維持 10 ~ 12% ê 政黨步頻成做第二大黨來看，合該然真僫。不而過，傳統媒體猶是有伊 ê 作用，像 Viel für Wenig 就引𤆬 tsuē-tsuē 自來無喙白是環境造成 ê 喙白囡仔學習食食是人生重要 ê 一門功課 mā 是上天然 ê 藥品。
交喙白翁婿 uī-tio̍h 別人兜 ê 問題 teh 豬八戒拜天公，家己刣家己 ê 這幾冬我 mā 看著家己 m̄ 捌想過 ê 問題，我一直認為家己是好喙斗 buē 出現翁兜勥母彼款想 bueh 直接叫伊 Halt die Fresse 恬去 hōo 人慼 ê 態度，自翁仔姐品好早起頓食歐洲，下昏飯食亞洲，我發現紅菜頭生食 mā 蓋好味素，特別是濫寡橄欖油敆寡蒜頭抑是芫荽就是一出十全 ê 好味素，一屑仔攏免敆千島醬。
➀ 希臘神話，周斯三个查某囝，𪜶代表聰明、青春、喜悅。
➁ 希臘神古人物 Paris，有三个女神齊美麗，伊互相諍家己上媠，巴雷斯是栽判，上美麗 ê 人 tsiah 有通得著金蘋果。
