「德國食食文化按吊車尾進步到 220 這跤兜。」
「啥物意思」我問。
「總匯(tsóng-huē)新聞 APP 推薦我讀一篇世界食食排名新聞，講第一名是希臘，第二名是義大利，印尼是第三名，墨西哥第四名....德國按吊車尾進步到 220 這跤兜」翁那講那𫝻手機仔。「你確定這篇新聞 m̄ 是內容農場(luē-iông lông-tiûnn)」我問。
翁無出聲恬靜聽候我紲落來 ê 答案。
「你若講第五名是西班牙、法國、日本、中國、土耳其，我 buē 問這敢是內容農場。」
話講一半，翁若臆著我 bueh 紲講啥物，家己先紲喙講「無媠某 ê 點拄我正經 buē 愖到遮 ê 眉角。」
我微微仔笑應「確實，無我 ê 點揬，你一欉樹有影 buē 生椏。」
「你去過墨西哥，我去過印尼，我 tuì 印尼料理 m̄ 捌一仲呼，總是我個人認為印尼食食文化猶無才調交法國抑是法國相比並。所致我認為這篇文章是就(tsiū)糋路來做排名。」
「我 mā 按呢認為，起因墨西哥食物 mā 齊糋路。」
我 tuì 印尼料理無研究，印尼到今 mā kan-ta 行踏過峇里島，總是按峇里島生湠 ê 印象交目今 tī 德國接枝 ê 印象，印尼料理確實倚糋掛薟。這个印象獨屬我個人經驗無表示印尼食食就是按呢生。
按新聞生湠好玄，好玄成做阿貓 hōo 我翻草 tī 德國 tsham 眾阿麗做伙講德國翁德國大家官尻川後話 ê 食飯會，𪜶故鄉 ê 食食敢有影齊是糋掛薟做飯頓，隨向 Google 大眾廟求籤逼籤詩。
1. 歐粒旅行中Olivia Traveling - 印尼｜35+樣當地食物介紹：主食、湯、甜點、飲料
2. 九十路公車 NinetyRoad Travel --- 印尼美食有哪些！2024精選TOP 10 印尼食物推薦：薑黃飯、巴東菜、索多雞湯
Google 籤詩解了翻頭看德國電視台專文紹介 Anditas indonesische Kochkunst 印尼料理交我 ê 食飯會確實無宛 2 體。
「這是專工 uī 你攢 ê 份，無透薟。」
無行出臺灣 buē 發見亞洲人無食薟是一件紅龜生蟲 ê 龜怪，行出臺灣發見咱看無目地 ê 族群，𪜶看咱 mā 相𫝛，總是逐家猶是亞洲區，做陣講人尻川後話較有共鳴(bîng)，特別是德國喙斗。
德國人愛食肉，特別是豬肉，印尼人多數是穆斯林 m̄ 食豬肉，德印兩國 ê 敆榫準做愛深甲若菲律賓海溝猶原迒 buē 過食飯桌 ê 雙人一雙箸 bueh 食無仝味 ê 食食衝突。
遮 ê 食食衝突有雙爿 m̄ 願互相調整喙斗 ê 堅持，像一頓食麭，一頓食 Mie Nudeln mā 有看人食食 buē 上目 ê 藐視。遮 ê 問題，看人食食無目地 m̄ 捌 tī gún 兜出現，起因我 tuì 原生食食無激烈依賴，gún 翁 mā 清楚知機目今 ê 德國飯頓 kan-ta 麭、加工煙腸、Tshì-sù、Bá-tah 交甜路無閣較加。所致無滓著𪜶兜勥母 ê 青光眼「全世界我上𠢕扞灶」。
Gún mā 無 m̄ 願互相調整喙斗 ê 堅持，抑無我 buē 按食米轉做食德國麭。不過，按呢 ê 入人門，順人意 hōo gún 翁掠做熟枝食青枝，緊枝食慢枝，我 mā 愛食麭。
「我無愛食麭，彼陣 kā 麭做飯頓有兩个原因，一个是我無彼个美國時間款早起頓，因為愛上課，另外一个是心適興」當麭食甲頭殼額，我拆白講心情。
「Gún 德國人攏食麭過日。」
「恁兜一口灶無代表全部德國人。」
話一拆開，伊知影繼續蜈蚣咬蛤，以「gún 德國人攏按怎」來圍攻牽手是無事使交一擺做忌，一擺少人 hōo 翁仔姐愈行愈遠。
2025.03.11 翁某做陣看 Marktcheck 翁看著豆腐糋隨講「看起來真好味素」佮意食豆腐總是 uī-tio̍h 愛甘願 tī 德國無食豆腐 ê 我紲喙講「你講這款物 buē 食得」又加敆一个伊自囡仔就慣勢 ê 喙歪目睭斜(tshua̍h)。
「又閣來矣，又閣 bueh 講 gún 爸母 ê 歹話」我 kā 歪喙斜目調整好勢講，按伊 ê 表情我看出伊 ê 無歡喜，總是伊 mā 清楚知機水潑落地歹收回，m̄ 管六月蚶，開喙按怎臭 mā 愛鼻落去，抑無頭較大身 hōo 伊分隨人食。
喙歪目睭斜兼六月蚶，開喙臭後我無掠外請教伊隔轉日敢 bueh 食花豆，抑是下日仔款塊豆腐轉來糋，起因我清楚知影我無𪜶兜勥爸母 m̄ 驚火燒厝，驚跋落屎礐 ê 性地，特別是勥母，只要無敆伊意齊禁止。
總是，我 m̄ 是柴頭尪仔 ē 囥話，今仔日免出門翁仔姐做陣食早起頓，我看伊一支攕仔掰仔掰「你若感覺 buē 敆喙，廚房有俗麭佮寮仔 Tshì-sù。」
「我佮意，我佮意」翁緊紲喙。
「佮意無佮意 kan-ta 你知機，總是你清楚知影你 m̄ 免 uī-tio̍h 這件代誌成做恁勥母 ê 見本，一个意大利麵三種版本就是 m̄ 講，閃去邊仔喘，我來扞鼎。」
「我無興扞鼎 mā 無彼才調扞鼎，我只是好玄咱兜 mā 開始行墨西哥風」伊笑應。
「歹勢，我講話火燒厝，燒過間」我隨送一个笑面 hōo 伊。
「有這款情緒，表示伊捌發生百外改 hōo 你中氣 buē 敨。」
「Gún 翁今仔日怪怪」我 kā 手搭 tī 伊 ê 頭額。
「我無食 m̄ 著藥」翁笑講。
我頇顢扞鼎 mā 無法度規心踅網路揣食譜出菜，所致結束一日無要意 ê 齷齪，我上佮意 ê 齷齪洗浴是一出地下鐵(S-Bahn)隨斡倒爿行向有目通看，無錢通 bué ê Erdi 看𪜶兜敢有出新菜通參考。
交這出菜相拄搪 ê 軟晡，烏陰透寒風，伊 hőng 妝娗甲媠媠徛踮門口， uī-tio̍h 得著無料食譜單，我假做交觀 ê 民眾自第一个架仔看甲上押尾 ê 菜藍，紲落來假做揣無敆喙 ê 有機商品交店員 tìm 一下仔頭表示再見。
行到門跤口假做雄雄䀐著櫃檯附近 ê 廣告單，越頭笑微微 tuì 店員閣 tìm 一下仔頭，隨行向準備 hōo 客戶 ê 食譜區，遮挈一張有機料理課程單，遐挈一張基金會緣金單，提到規个手滿滿，越頭 tuì 無閒整理貨架仔 ê 店員講再見。
一出門斡一个彎，猶未行到 BW 銀行，手頭賰這期 ê Model。
