我是 Mayo，媠某問「你確定 bueh 寫一篇？」我講「確定，總是我頇顢弄筆需要勞煩你 kā 我鬥栽筆花。」
我是 Mayo ê 代筆者，伊褒唆 ê 媠某「意愛 hōo 勥爸勥母一日貼貼上童 ê 你罕得遮好禮，我無 kā 你鬥相共我 ē 犯你兜 ê 欹講我甕肚。」
「媠某有囡仔量。」「我無囡仔量，m̄-koh 我確實誠𠢕請鍾馗。」
本成掠做 Covid 19 buē tshan-tshiūnn 流感成做麵線 m̄ 管咱人按怎祓、按怎扯(tshé)、按怎擢、按怎搝齊 buē 斷筋，千算萬算 m̄ 值伊一張，伊 m̄-nā 𠢕搬四川換面 mā 我生湠 hōo 我慣勢 ê 按算成做一場空，mā hōo 我理解自由無獨限政治 tsiah 有才調 kā 伊束縛。像逐年轉去臺灣行尞 ê 按算 tī 這段準做無政治做束縛，我 mā 甘願束縛 m̄ 出門。
往過，一年轉去臺灣 2 斗，這斗食 buē 著大埔鉄板焼き(Teppanyaki)、三商巧福 ê 牛肉麵、附中附近 ê 鉄板焼 khe-tsiap-puh 炒麵齊有法度後回 tsiah 補，這久搪著愛耍四川換面 ê Covid 19，一冬變兩冬，兩冬變.....。
數念是犀牛 hōo 伊望月，一月過一月，天啊，地啊，我底時 tsiah 有法度轉去臺灣食遮--ê das ist zum reinsetzen 夭壽骨好食 ê 臺灣料理。
「Kā 錢疊緟，犀牛免望月」代筆者 ê 插撥。
窮真，我 tuì 遮 ê 臺灣料理並無好印象，起因德國無路邊攤，準做有路邊攤街路 mā buē 油漉漉，抑是規个油湯攤敢若千外冬 m̄ 免洗盪 hōo 我綿豉拒絕媠某交眾臺灣朋友 ê 邀請。
這久翻草，我正經是 A-ta-mah-khóng-ku-lī 食蒜頭，吐蕗蕎。
「少年若無一擺戇，路邊哪有有應公」代筆者插撥。
這幾工交媠某做陣看《我的阿北同學》 學習媠某 ê 母語台語，媠某 ê 母語無學著半句 m̄-koh 跟綴影片 ê「我自細漢食到大漢」ê Khe-tsiap-puh 炒麵 hōo 我想著麻豆夜市 ê 牛排敆麵。
Tī 媠某準備徙岫到德國 ê 頂一冬，媠某講伊按算無目的聊聊仔踅一逝臺灣，愛哭愛綴路交 m̄ 捌勻勻仔踅臺灣 ê 我隨攑手講等我，咱做陣踅臺灣，我 tsiah 有機會認捌這个從來 m̄ 捌行踏有歷史 ê《倒風內海》。
「往過捌讀過一本小說，小說寫麻豆歷史，總是彼陣 ê 我想空想縫 kan-ta 要意戀愛，sóo-tí 現時 ê 我無才調 tuì 你講伊 ê 歷史」媠某那講那看 Bluezz 揣來 ê 旅宿地址，我那聽媠某 ê 分張目那繩四周圍，遮敢正經有旅舍通歇暝？
當我準備開喙講「一暝超過預算 mā 無要緊」ê 時，媠某手指一間看起來若阿妗兜 ê 建築講「這間」隨行入去交頭家媽 Check in，我目那繩旅社 ê 設備，麻豆 tī 往過應當誠繁華，因為伊 hōo 我想著囡仔時 ê Beja 貝雅➀。
Gún tī 麻豆 ê 日子拄好搪著舊歷過年，旅舍附近 ê 油湯攤無開門，媠某又閣無愛食餐廳，當 gún 你一喙我一喙徛 tī 旅社門口討論下昏飯愛食啥，頭家媽行倚交媠某講話，無偌久我就來到無佮意 ê 夜市。
「外甥仔點燈火，一切照舅(舊)，你無愛食夜市，遮 ê 火鍋店抑是 7-11 齊營業，你 ē-tàng 去遐款你愛食 ê 物，食飯飽後，咱做伙 tī 旅社大廳相等。」
我順媠某 ê 話看向夜市挨挨推推 ê 民眾「伊看起來交觀光夜市無相仝，我綴你行。」
「咱已經行到尾矣，你敢有相著敆你喙斗 ê 物？」媠某問。
「拄才有看著一塊牛排疊一粒卵包，彼是啥？」我問。
「臺灣 Sizzling Steak，bueh 試鹹汫無？」
「你知影 gún 德國人無按呢食牛排。」
「遮是臺灣 m̄ 是德國」媠某頭挽 leh 就行，無伊揣無路 ê 我緊綴伊 ê 跤步，三伐做一伐。
菜色點好，我綴媠某 ê 跤步交人敆桌坐踮低紅桌低椅條等牛排上桌，見著仝桌 ê 人那食牛排那揤紅色佮黃色 ê 塑膠矸仔「彼膏膏物是啥？」我問。
「Khe-tsiap-puh 佮芥辣醬」媠某講。
「Gún」當我準備熥清飯，頭家送一盤無肉 m̄-koh 有麵交我上熟似 ê 三色菜「彼是啥？」
「鐵枋麵」媠某那講那徛起來行向頭家身軀邊 ê 湯鼎𣁳湯，當我想 bueh 開喙講「你食就好，我 buaih 食湯」媠某已經𣁳二碗燒滾滾 ê 湯講「有你上愛 ê Bá-tah 交 hōo 你無料食到哽胿。」
「無料你確定？」
「遮是臺灣 m̄ 是德國，句點。」
「這湯比 Knorr 閣較好味素」我那食湯又閣見著有人 kā 麵濫佮卵做伙，紲落來摻 Khe-tsiap-puh 當我準備開喙，媠某先出聲「這交恁德國人食意大利麵仝款是四常 ê 配備(phuè-pī)。」
臺灣人食牛排 ê 慣勢交 gún 德國人有太 tsuē ê 無相仝，這久開始我上好成做六隻天鵝 Die Sechs Schwäne➁ ê 小妹，等到時機夠水 tsiah 開喙。
「你哪無摻 Khe-tsiap-puh mā 無 kā 卵濫落去麵內底？」
「隨人有隨人 ê 喙斗，不過我臺中人，gún 食麵較慣勢摻東泉薟椒醬。」
「你 m̄ 是無食薟？」
「伊 m̄ 是薟，伊是 gún 臺中人 ê Khe-tsia̍p-puh 無伊食麵是白汫無素。」
我 tuì 臺灣 ê 夜市無生份，總是這是我第一斗 kā 膽紮 tī 魂舒交媠某做陣食夜市，到今我猶原無啥慣勢夜市烏 lù-lù ê 塗跤交隨時有可能是遮一搭水，遐一搭油 ê 環境，總是這斗 ê 經驗 hōo 我後日願意認真踅夜市挵險。
「你敢猶 ē 記持咱 tī 台南食著 ê 鐵板焼牛排？」我問媠某。
「我 buē 曉做鉄板焼き(Teppanyaki)」愛經過胃，媠某果真理解我 ê 想法。
「我想 bueh 問，咱敢有機會食 Khe-tsiap-puh 麵？」
「大丈夫閣送你一塊肉」媠某講。
我愛媠某！！！
人生 mā tshan-tshiūnn 一篋 Tsioo-kóo-lè-tòo 你無試，你永遠 m̄ 知機家己 ē 搪著啥物味素。
我是亂皂𥴊仔店 ê 作者，記錄這篇文章 mā 搪著有人講華語 ê「調味」無人講 tiàu，我無興交人討論這个猶未定形 ê 語法，總是生份人 ê 點揬成做我 ê 營養 hōo 我有一个機會生湠家己 m̄ 捌 ê 智識。像《行仔內 ê 話》EP4 高雄燕巢(iàn-tsâu)幼麵 ê 出日拍尻脊，落兩攏免食 ê 出 m̄ 是 tshut 是 tshu̍t 入聲。
入聲指七聲八調 ê pih 佮 to̍k，閣較詳細 ê 解說請參考台南妹仔教你講台語 EP7 又短又緊的聲音？入聲韻母一定要會♥白話字聲調篇（中）｜台南妹仔教你講台語。
➀ Tī 葡萄牙
➁ 格林童話
2021.04.15
