我的新婦咧欲生第二胎，去病院生產佮做月內的時，我愛鬥𤆬（tshuā）大漢的，送去奶母兜，欲暗仔𤆬（tshuā）轉來。這幾若禮拜，有去後生兜的時，就佮後生，抑是新婦同齊去送佮接，熟似奶母，欲予囡仔慣勢我去𤆬。
進前我問新婦：「對奶母，恁是按怎稱呼？按怎叫伊？」
「伊講叫伊『張媽媽』。」
張媽媽佮張爸爸看起來是「外省人」，張爸爸以早佇日商公司食頭路，已經退休，張媽媽60幾歲，比我減幾若歲，應該是佇台灣出世的？我綴後生、新婦去𪜶（in）兜的時，我真少講話，予後生佮新婦去講。我有咧想，我家己去送的時，愛先問𪜶（in）：「台語恁聽有無？我佮囡仔講台語，伊自細漢就會曉２種母語。」無？
今仔日早起，我家己送囡仔去，奶母先共揹仔接過去，我手指揹仔，共奶母講：「藥仔佇內底。」
「我知道。」
「鞋仔有佇恁兜無？」
「有，在這裏。」因為昨昏佮後生同齊行，我揹囡仔轉來的時，無看著鞋仔。
囡仔共我擛手，表示再會，我嘛共伊講：「再會。」我就走矣！
其實毋免問𪜶（in）台語聽有無？問這句是誠奇怪的代誌，佇台灣講台語，是按怎愛先問人聽有無？我就直接講台語，若聽無才閣講。
（2026.1.6.）
教育部台語辭典，https://sutian.moe.edu.tw/zh-hant/
