幾若年前，我去台大的校園運動，佇舊體育館的頭做體操、搝筋。有一个中年查埔人騎跤踏車騎過我的面頭前，已經過去矣！看伊停落來，越頭，共車徛好，來共我講話，講我按呢做毋著，伊做一擺予我看，教我幾若个動作。做煞，伊走了後，我家己做看覓，袂使，我的跤頭趺傷食力，彼个動作無適合我，我繼續做我原本咧做的動作。我咧想，我若是查埔人，伊敢會專工停落來教我？
佇菜市仔。有一攤的頭前有幾若个人咧揀，查埔頭家大聲喝：「一斤50元。」我講我家己有紮橐仔，伊講：「家己紮橐仔一斤一百箍。」我恬恬仔離開，我知影伊認為伊咧講笑詼，華語講的「幽默」，我感覺一點仔嘛無好笑，閣是仝款的代誌，若是查埔人家己紮橐仔，講仝款的話，伊敢會講這句？查某人毋管幾歲，四界就會拄著這款無想欲拄著的代誌，無想欲聽著的話。
（2026.1.3.）
教育部台語辭典，https://sutian.moe.edu.tw/zh-hant/
