［前註１：直接用台語唸，正字的意思佮華文仝款的有７成，干焦３成的意思無相仝，毋知影意思的，查本文後尾網址的辭典。
註２：這是為某一个社團寫的，嘛來貼佇遮。］
我來寫一屑仔佮這个社團有關係的代誌。佮我的前女友參詳開放式關係，她無理解，毋接受，膏３年，感情煞鼓矣！
伊蹛台南。阮開始鬥陣的時，我佇高雄有工課，決定稅厝，成立工作室，逐禮拜坐高鐵去高雄蹛幾若工，那做工課，那約會，是一段誠樂暢的日子。
後來台北的工作室創好，半年了後，發覺按呢２邊走來走去袂使，代誌做袂好勢，共高雄的工作室結束，規个倒轉來台北。
變做伊２禮拜的拜六、禮拜來台北一擺。原本阮就有一寡仔問題，親像講袂來，伊無感覺，因為伊講啥物話頭，我攏會使佮伊講落去；毋過我有趣味的代誌，伊無興趣，抑是毋知影。平常時講電話，是講甲誠歡喜，毋過伊有當時仔咧我講話的中間插別的話題入去，濟擺了後，我才有勇氣講：「我還沒講完。」伊隨停落來，予我繼續講，等我講完了後，閣問一句：「你講完了？」伊講伊欲講的，對我頭拄仔講的話攏無回應。
誠久了後，我才知影，伊無咧聽，抑是聽無我咧講啥，才會有彼款的插喙。
我佇台北咧想，我遐濟的無滿足，欲佮伊按呢過落去？想著開放式關係，我知影這種的關係已經10年矣！我一直認為佮我無關係，我佮伊無無好的所在，毋免分開，閣捌別人就好。
我看冊、看資料，去參加阿球的讀冊會，去了解這件代誌。
佮伊提這个建議進前，愛做一个準備，共我厝內面的人，會閣來往、同齊做代誌的朋友出櫃，共𪜶（in）講我有女朋友矣！
（2026.1.6.）
教育部台語辭典，https://sutian.moe.edu.tw/zh-hant/
