距離我戀人的死當咧拄好過有四年，我原仔書寫著關係著伊轉來人世間的幻想。敢會曉寫著寫著我就會看著伊矣？我的幻想有時寫著，有天我醒來發現伊就睏佇我的身邊，這一切不而過是一个真長真長的惡夢；有時閣寫著，我轉過身去便看見伊拍拍我的肩，問我想欲食啥物。
我一直留著伊忌日彼日的報紙佮遺書，頂懸有我的淚痕，毋過遺書頂的字體足生份，有一種堅定，重重的寫佇紙頂，無像伊的字、嘛無親像是我的字。
踮佇阮做伙蹛有七年的厝內，我逐日攏會夢見阮的回憶。四年來的逐工我攏睏佇這張雙人床頂，準確來講是我一旦佇眠床頂倒落去，我便會連鞭睏、夢見阮的回憶，共一个夢做完就會醒來。
自眠床頂𬦰起來，這擺是夢著阮今仔認捌不久時的約會。彼是誠簡單的、佇咖啡廳開講的一擺約會——彼時，我笑對伊講：「阮來並啥人的手較大！」，然後佇伊佮我手面貼著手面和時，趁機牽牢伊。伊頓牢，褫大雙眼，然後戇笑。
我的目屎流袂出來。我毋知影是按怎我對伊過身的隔轉工開始就無目屎矣，干焦賰著想哭泣的感覺不斷佇我的胸腔內大聲喝、像磅空內的回聲似的，反反覆覆對一隻傳著另外一頭。
是按怎我無法度袂記你？若我忘得了你，有是我就袂曉按呢艱苦無？毋過我嘛無想欲放袂記你，畢竟會記得你就代表著你閣活佇我的心內。我足思念你，你敢知影？我大聲喝著，煞聽袂著家己發出的聲音。
我毋知影家己哪會佇這四年活落來的。時間猶未沖淡我的悲傷，嘛毋知影敢會曉有沖淡的一工。我看著鏡中的家己，既白蔥蔥閣消瘦落肉，無成人形。重重的烏眼圈、無血色的雙喙脣、徛黃的頭毛。我扛手撫著鏡中的家己，佇一目𥍉仔看見伊徛佇我身後——噢，經過矣遐久，我早就已經知影彼是幻覺，心情無一絲波動。
我癱軟坐佇眠床頂。彼張阮捌共枕眠的雙人床。好空。是按怎干焦賰我？是按怎欲離開我？敢會使，莫行。
我自枕頭下跤提出彼張字跡早就已經霧霧的遺書，以手指頭仔摩挲著伊。便若到忌日，思念就像火燒心仝款，一發無法度收煞，予我不得已又閣前往地下室——伊的工作室。
空空的大厝干焦賰我一个人，我緩步行出房間、行向通往地下室的階段。壁堵頂有足濟相箍，囥咧阮的相片。雖然時間過去足久足久，毋過每日的挲猶閣予𪜶無一絲坱埃。上清氣的相箍內底囥咧阮予對方的情書。
行下階段，我發現這搭的扶手、壁堵、天篷頂無知當時佈滿紮刺的烏綠色藤蔓，藤蔓頂開著足濟開，𪜶有光生的金黃色花瓣，逐蕊開攏佇無仝的位置以無仝的形分布著茄仔色。𪜶像燕仔閣像尾蝶，足向望𪜶會𤆬我行的。我有共摸光滑的花瓣摸佮粗澀藤蔓，對下踏有一階，煞感覺像予捒一把般對下仆。下意識掠著藤蔓，伊便斷佇我手頂。尖刺刺入我的手面，留下一點仔一點仔的小空，毋過無血流出來。我定睛一看，予我拗斷的藤蔓斷面煞是深紅色的血肉，當咧恬恬流著鮮血。我想，量其約是我的幻覺吧——就親像是我會佇幻覺裡看見你仝款。「感謝。」我喃喃講著。
若是你佇咧，準做咧做木匠嘛肯定會共我鬥開門的。
當年，我提著情書對伊告白，予伊絚絚的抱佇懷裡。伊講：「我會一直佇你身軀邊。」我無應聲伊。
無的確我早就知影會有這工。
我轉頭看向扶手頂的藤蔓，𪜶有敢若較纏絚。你嘛是遮爾牽我的，我佮意一手牽著你，一手耍著你的頭毛。
我行入混雜著柴頭佮汫汫的花芳味的地下室，倚著凍如身屍的壁。阮的回憶佇腦內奔走。我若像會看著你笑親吻我的頭殼額仔、會聽著你講想佮我結婚、會碰著你的一隻長髮。有時我感覺彼是足久足久較早的事矣，有時閣感覺敢若干焦是昨昏。
花開著阮厝地下室，濟濟滿滿，像欲吞落人間。
展開電火，予柑仔色的光照射的無出名花蕊佇此刻愈顯得詭異，親像是洗浴佇夕陽中，閣親像是家己發著光。花蕊敢若咧跳動，敢若心臟。乓乓、乓乓。我開始不自覺來咇咇掣、手尾起麻。想著花梗內的血肉，我倒退退，雙腿一軟跪倒在地，無法度閣徛起來，只得匍匐前進，爬著走揣伊留下的痕跡。你佇佗位？綴我的爬，跤頭趺佮雙腿重重摩擦塗跤的藤蔓。𪜶流出血液，花芳味逸散來出，變甲愈厚，予人煞袂喘氣。血肉橫飛。血肉橫飛。血肉橫飛。
我癱軟在地，大口喘著粗氣，回想著你送我的花，𪜶總是抱著寡汫的色水，嘛干焦呸出薄薄的芳味。我足數念你的芳水味。芳水味代表著你的到矣，予人感覺穩心仔。我瞌上雙眼歇睏，煞聽著窸窸窣窣的聲音對四面八方傳來，自按呢閣褫開眼。
數百抑是幾千蕊花不斷來快速張合著花瓣，我完全無法度推定到底有偌濟花，干焦知影𪜶親像是有血有肉的人一般。我伸手拗斷一枝閣一枝的藤蔓，煞只是予𪜶以迅雷不及掩耳的速度再生，並生出閣較濟新的藤蔓佮遐的金黃色花蕊。知死的金黃色花蕊，遮到底是啥？我憤怒甲大力挽下一蕊花，提近鼻仔鼻著，煞發現是彼熟似的、屬佇伊的木質調芳味。
我環顧四箍輪轉，花蕊狂氣生長，憑空對逐个物件頂、逐个角仔內生長出來——伊做的桌仔、伊做的木雕、伊送的袚鍊。我做的手環、我送的模型、我送的花矸。我驚惶甲塊大喙，試圖徛起來，毋過猶原干焦會困難來爬著，像是今仔出世的小鹿。我到底咧揣啥物？
花蕊已經崁過地下室的門跤口，我出毋去矣。
過去無知偌久，我總算爬著理應是寫字桌的所在，並掠著一共共的藤蔓大肆獵刣。聽候總算會勉強搝開寫字桌屜時，毫無躊躇搝開屜的我煞發現內底干焦彼塊報紙佮遺書。一爿的藤蔓伸長共紙張刺穿，我腦中忽然想起一个人講過的話。
「這是暮蝶藤。黃色的暮蝶藤代表往生。」我驚一下咇咇掣、渾身惡寒，煞毋知影家己咧畏寒啥物。伊早就死去矣，我哪有可能閣會畏寒往生？
此時，全部的開𫝛時佇轉眼間凋謝、老去，對閃亮的金黃變為黯淡的黃咖啡色。我腦中閃過一段悲傷的旋律，咧唱著無法度大開的開佮轉毋來的人。
毋過，我到底咧咧掣啥物？
我褫開目睭，看著房間的天篷。
莫非今仔遐的攏是夢？我爬起來，感覺跤步異常輕盈，我行向地下室。
經過囥滿相箍的彼面壁時，我發現相箍內的情書拍毋見、相片頂的面全攏霧霧，若毋是我愛你，我絕對袂認出來啥人是啥人。是按怎拍毋見！是按怎欲連我最後一絲讀想攏捻熄！我佇心肝內呼吼，嚨喉煞焦發無出一點仔聲音。我𫝺𫝺頭，繼續前進。
行下地下室的階段，「暮蝶藤」根本無佇遐。果然我今仔只是做一个夢罷了。
心內想著伊輕輕摸著我的頭的款，我行入地下室。
地下室內無任何的開，一切那親像往過，我䖙著塗跤盯著天篷，目睭瞌瞌沉沉睏，無夢。
又閣褫開眼，我感覺異常的有精神，規間地下室予溫柔的搖泏柑仔色燭光填滿，一陣無知對何來來的風吹向我的面，敢若有一个力量促使我行向寫字桌。
寫字桌頂囥咧彼塊報紙佮遺書。我伸手，輕碰遺書，感受著花鹿鹿的觸感。
燭光敢熄滅，房內顯現光甲刺鑿的白光。遺書開始像心臟一般上下跳動著，乓乓、乓乓。我若像會看見伊的動脈佮靜脈、心室佮心房。字跡脈動著，我的心跳嘛隨之變快，敢若欲傱出我的胸坎。耳空邊傳來沙沙……沙沙……的聲音，是你？柴頭氣味衝入鼻腔。
我的規粒頭傳來劇烈的痛疼，疼甲我想欲磕壁。
我做矣。
瞌著眼，頭重重來挵向壁堵，總算感受著痛疼。「啊！」
目睭閣褫開時，我像一個旁觀者一般看著「彼一日」。
外口落著暴雨，伊趁著我出門買菜的時間執行。全新的遺書、散落的紙張、重重寫落的手筆。對屜深處提出的麻索、測量過的距離。
木椅倒下，有血有肉的人佇空中擺蕩。
到厝的彼刻，我跪下吱，用手面拍著塗跤。房內干焦賰我的心趒聲、拍拍聲佮耳霆，伊無發一語。
我扭動身軀，滾躘著無想欲看見這段回憶、倒退倒。
我看見彼陣我專注來看著伊雕刻一个蘭花木雕，沙沙聲充斥規間地下室。我佮意伊專注的款，就按呢看一个下晡。
柴頭散發著汫汫的芳氣，伊扲著刻刀的手指頭仔微微仔爍爍顫，逐一下刀痕攏像佇心頭劃開巡，剾下的木屑烌佇空氣中踅箍輾、落地，我抾起一片囥入橐袋仔。
蘭花的花瓣一層一層浮現，像對夢裡長出來的、像伊就是造物主。喔，我愛著伊手內誕生的一切。
伊用指腹輕輕摩過彼花瓣的弧線，若像確認伊敢有性命，閣撫過花柄，失神毋知影咧想啥，予柴頭頂的倒刺刺傷。我趕緊提出醫藥箱替伊包療。
「你知影我足愛你的，乎？」伊忽然開喙，放下刻刀，轉頭看著我。我摸摸伊的頭，感受伊絲綢般的秀髮。你是我的絲路。
「我當然知影啊。」我笑彎眼，另外一手牽牢伊予伊溫暖。「我一直攏在的。」我承著講。我知影伊足不安的。
伊掠起我的手，佇手盤唚有一喙。柔軟煞焦甲破皮的喙脣。
我轉去現實，坐起身。
燭光對壁內溢出、階段頂的影如蛇爬，壁頂開滿暮蝶藤，藤蔓蟯著咻喝我，我伸手觸摸。熟似的尖刺變為鐵釘仔，扎著我的手指頭仔，像我是受咒讖的睡美人。花蕊頕垂，想傾聽我的聲音。我共耳仔貼向離我最近的一蕊。
「你是毋著的。」伊以一種聽無出性別佮情緒的聲音講著，花瓣捲動，若像是眨𥍉眼。
我面頭前的一切開始像催眠的捲漩般踅、扭曲，我的手閣較是彎做詭異至極的弧度。
木壁的紋理伸展做河流，桌仔頂的批滑落到塗跤，煞無發出聲音。
我聽著遠方有啥人咧叫我，聲音誠輕，敢若隔著幾層玻璃。
我向頭，手頭出現彼欉木雕蘭花，伊雄雄滲出紅的汁液，像血、像嚷喝。
伊一滴一滴如雨來落下，佇塗跤散開做花。
遐的花的根往下穿，軁過枋仔、軁過塗沙，直到我看見下跤有一具身軀。
我跍落去。彼具身軀的頭毛散開，覆佇面皮。
我伸手想共伊擘開，猶毋過我的手軁過伊的面——像軁過水面。
扛起頭看向寫字桌，我看見你矣，然後我閣看見彼一日，毋過你變做我、我變做你。
我忽然全了解矣。
彼具身屍、彼張批、彼句「莫袂記得我」攏毋是伊對我講的，卻是我決定離開前的喃喃自語。
離開的毋是伊，毋過我從來無離開。
我的心敢若絞成死結。
暮蝶藤搖泏，講話聲像風吹過舊報紙，是你微弱的聲音：「我足思念你。」
我攑頭，你的身影像雲閣像霧，散開化成無數的黃色尾蝶。
𪜶停佇天篷頂、壁頂、我掌心的蘭花頂。
世界恬恬落來。
干焦賰光線，慢慢仔滲入來。
我看著下跤彼具身軀漸漸透明，佮木塗跤、花瓣、批紙做伙予光吞沒。我流下目屎。
最後一刻，我聽著報紙予風輕輕反過去——
面頂的字霧霧煞猶會辨認：
「你轉來矣。」
我的愛人仔，我總算知矣，是按怎這四年裡，我的夢會一再重演、倒轉、予我佮艱苦的起毛纏綿、同齊刺入布內。
我叫是彼是思念的花，毋過其實彼就干焦是我彼腐爛發臭的罪惡感。
我從來毋捌予你放捒——我只是無法度承認，我失去的是我家己、是我拋下你，留你向無靈魂的軀體喝咻、哭泣。
我無願相信我煞是彼个離開的人。彼傷㾀勢、傷驚桀桀、傷無像我口中彼个愛你的家己。我拍破承諾。我講過袂擲下你的。
所以我就反到轉來，共彼一切投射予你。
彼張遺書的手筆霧霧，我說服家己彼是你的字；彼張報紙的日期，我說服家己彼是你的忌日。
我甚至連哭泣攏學著你的方式，輕甲強強無聲音，連上邪惡的罪人看著攏會憐憫。
我一擺一擺重複彼場往生的戲，干焦為著無予家己成做兇手。
我需要一个死去的「你」，好予在生的「我」閣有理由存在。好予我的罪惡有所在安放。
我需要你。
我搬戲搬甲入戲，入戲到我早就已經袂記真相，深陷佇囹圄，對「你的往生」深信不疑。
虛偽的我、罪惡的我。放捒你的我。
猶毋過我早該知影的。
我早該知影彼个跪佇塗跤吱的人，毋是旁觀者。我早該知影，彼雙拍結的手、彼聲「莫袂記得我」，攏是我的。
我會記得彼工的雨聲是偌爾大聲，大聲甲會使佇地下室聽著。我會記得，木椅倒地的聲響是「咚」的一聲。
我會記得咧放下筆的目𥍉仔，我有偌向望你會轉厝，加向望你會展開門、罵我一頓、共我抱起來、講愛我。共我攬牢牢的，絚到我無法度喘氣、絚到擠出我的目屎，共我的淚𤲍乾。
猶毋過未。
我干焦聽著見雨聲佮家己的喘氣。
我終其尾親手共家己對這世上、對你身軀邊捋去矣。
原來我是按怎會夢見你，是因為遐從來無真正的「你」——彼干焦是我靈魂裡予掏空的部份，佇夢中生出你的模樣，是我無敢面對事實的愧疚感生菇生出的菇。
你是彼菇的菌絲，是我造的幻，是我愛的形體，散出孢子，佇我䖙上眠床的逐擺走入我的夢。
我講「我愛你」，其實是咧對你懺悔。
我偌爾向望你佇我的身邊。
我開始懷疑，遐的藤蔓是毋是你對我的怨懟。
暮蝶藤無代表往生，卻是「勿袂記」。
逐枝纏上我手腕的藤蔓，攏是一个我無願磕著的記持。
𪜶共我生長、開花、流出鮮紅的血。
我愈是想放袂記，就愈予𪜶拆食。
原來我毋是予伊纏住，卻是我家己化成伊。
彼一朵朵金黃的花，既是我腐爛了後的色水，嘛是你對我的怨言，也是你的目屎。
我想起你問過我：「若有一工我無見矣，你會欲按怎？」
我彼陣笑講：「我會揣著你，毋管你佇佗位。」
所以我揣有四年，反遍夢境、批紙、血肉、厝佮木屑烌，最後揣著的，毋是你，卻是我擺蕩佇空中的身影。
原來你從來毋捌離開——
離開的，是我。
我早就已經袂記我離去的理由。
我困牢佇遮，用你的名咻喝我家己。
逐改講「你轉來矣」的時陣，我攏向望會騙過運命，予啥人轉來也好，佗驚干焦是我的影。
猶毋過我有影轉毋去矣。
光已經吞沒地下室，花佮木雕做伙消失。
干焦賰我向空氣講歹勢。
歹勢彼个無會好好在生的我。
歹勢彼个予我誤會做兇手的你。
歹勢這四年的謊。
我開墳墓，囥入白賊、佇墓邊用石頭壓著你的疼。
若往生有色水，彼應該是暮蝶藤的色水——毋是烏，毋是白，卻是彼種予黃昏拆食的橘金。
伊袂光著予人看見出口，干焦會予人叫是彼是向望。
我予家己佬傷久，如今彼項光閣一擺照佇我面頂，共我講欲相信伊。
我無確定彼是毋是拍殕仔光，毋過我願意相信伊是。
我共最後一片木屑烌扲佇掌心。
彼是伊雕蘭花時剾下的，檢采嘛是我。
我出力扲絚，直到手心予撞。
彼一目𥍉仔，我聽著遠方有人輕輕喘氣——
彼聲音像風，像你，嘛像我。
我總算哭的。
目屎落在塗跤，盛開做一蕊暮蝶藤的花。
伊無色水，煞並任何花攏真實。
我知影，這一擺，我有影醒矣。
