玄天上帝收妖
各位朋友，今á日beh kā ta̍k-ke講一pha古早古早ê民間傳說，to̍h是北極玄天上帝，當初iah-bē chiâⁿ-chò神明hit-chūn ê故事。古早時代，天地iah-bē穩定，人間kah妖魔界koh相chham相lām，暗暝ê時，山林--ni̍h會有怪聲，溪水會phuh白pho，百姓驚kah門窗lóng關tiâu-tiâu。
Hit-tang-chūn有1 ê少年家，伊出世tī王族，榮華富貴伊lóng有；m̄-koh伊ê心內不時teh想講，「做國王，nā是無法度hō͘百姓過好ê生活，án-ne ná有siáⁿ-mih意義？」
伊to̍h án-ne放棄王位，離開宮殿，踏入深山修行，想beh追求真理。伊一路往北行，行到tà bông-bū ê武當山。
武當山hia，山koân水冷，chúi-chhiâng ná像白龍teh飛，風聲ná像猛虎teh háu。山--lìn老道人kā伊講：「少年人nā是想beh得道，to̍h ài先斬斷凡心；nā是想beh守護天下，to̍h ài先贏過ka-tī。」
伊聽了，to̍h tī山頂起草厝，tòa tī hia修行。寒天落雪，伊thia̍p-kha坐；熱天西北雨，伊mā無走。山--lìn ê魔神á變做美女、變做猛獸，beh來試探伊ê七情六慾，m̄-koh十外冬過--去，伊ê心tiāⁿ kah ná像石頭，lóng無振動。
不而過，心魔是1 ê大考驗。有一暝夢中，伊koh轉去王宮，金殿玉階，萬民跪拜。有權有勢ê爽快to̍h親像海水強beh kā伊淹--去，to̍h tī伊凡心beh閣再起ê時陣，伊看著天頂ê北極星，猶原孤1粒koân-koântī hia lóng無振動，雄雄覺悟tio̍h講，「守一不變，chiah會鎮萬象。」
夢醒了後，伊用劍劃地，咒誓講：「Nā是為tio̍h百姓，我願意用ka-tī ê身軀去鎮天下ê妖魔鬼怪。」追求大道ê心，ùi chit陣開始堅定kah ná像鐵。
有一ê暗暝，天烏烏，thàu風lo̍h雨。忽然間，山谷內面，一尾大隻蛇衝--出-來，眼神親像火。深潭內底，一隻大隻龜浮出水面，龜殼厚kah ná像山。
蛇hoah聲親像tân雷公：「凡人，chia是靈山寶地，速速離開此地！」龜háu聲ná像做風颱：「你修行去驚動tio̍h水脈，該當受罰！」
少年家gia̍h劍，無退kah半步，講：「我修道，是為tio̍h beh鎮邪救人。Nā是lín beh做pháiⁿ，今á日lán to̍h分輸贏！」雷公kòng鼓，sih-nah劃天，蛇影ná像黑龍phah-phún，龜殼ná像石壁擋路，3暝3日，phah kah烏天暗地。
M̄-koh少年家lóng bē驚，伊看chhoaih che龜蛇，本底是天地靈獸，to̍h是因為邪氣入心，chiah會起lia̍h狂。伊無斬--in，顛倒是用真氣ka淨，ta̍uh-ta̍uh-á，蛇ê眼神變清，龜ê喘氣變穩。最後，龜蛇phak tī土脚，同齊講：「Gún願意追隨--你，守護正道。」此後，龜蛇chiâⁿ做護法將軍，後--來世間人稱呼in是龜蛇兩將。
不而過，人間iah-bē安寧，少年家真正ê考驗，這chūn chiah beh開始niā-niā。
北方siōng寒ê所在，有1 ê萬代年ê魔王——烏煞，鎮煞ê封印去ho͘ lēng--去，妖怪出出入入，庄á頭火燒厝，溪水掣流，百姓哀爸叫母。
少年家kah龜蛇兩將落山beh去處理。戰場tī溪岸邊，妖兵ná像重重疊疊ê湧。烏煞khiā tī烏雲頂，冷冷á笑講：「修道人，你敢擋--我？」少年家平平靜靜ka應講：「我m̄是為tio̍h名聲，是為tio̍h百姓。」
戰鼓響起！龜將kā伊ê身軀化做萬丈koân，擋kui群ê妖怪；蛇將飛chiūⁿ天se̍h，kā魔神á ká kah碎鹽鹽，少年家一下á to̍h ùi烏煞直直衝--去。
天地忽然間顛倒反，se̍h過來se̍h過去，幻境têng-têng，王位、權勢、榮華、富貴，全部lóng浮現在眼前。M̄-koh少年家會記chit北極星，心mā學北極星，1點á搖choah to無。伊一劍kā幻境劃--破，koh-chài用玄天印kā烏煞鎮壓tī北方霜寒雪凍ê所在，sòa--落-去天地to̍h恢復光明。百姓跪落地，喊hoah伊ê名號——真武！後--來人to̍h尊稱伊叫真武大帝。
功德震動三界。天庭ê大門開--開，雲霞ê光kui萬條，群仙列班，玉皇大帝對少年家宣旨，講：「你tī武當修行，收服龜蛇，平定魔亂。今á日冊封你做北極玄天上帝，鎮守北方，護佑人間。」烏袍加身，星光轉se̍h，龜蛇khiā tī雙pêng，少年家ùi凡人修道，最後變做鎮北之神。
朋友--ah，che故事講到chia，m̄是教咱ài phah妖怪，真正ê妖，有時tī外面，有時tī咱心內。
Nā是心像北極星hiah-nī堅定；nā是意ná玄武hiah-nī tìm-táu；咱每一ê人，lóng會tàng守護ka-tī ê天地。
暗暝nā是giâ頭看天，hit粒lóng bē tín-tāng ê星，to̍h是玄天上帝守護咱ê所在。
Hiân-thian-siōng-tè Siu-iau
Kok-ūi pêng-iú, kin-á-ji̍t beh kā ta̍k-ke kóng 1 pha kó͘-chá kó͘-chá ê bîn-kan thoân-soat, to̍h sī Pak-ke̍k Hiân-thian-siōng-tè, tong-chho͘ iah-bē chiâⁿ-chò sîn-bêng hit-chūn ê kò͘-sū.
Kó͘-chá sî-tāi, thiⁿ-tē iah-bē ún-tēng, jîn-kan kah iau-mô͘-kài koh sio chham sio lām, àm-mê ê sî, soaⁿ-nâ--ni̍h ē ū koài siaⁿ, khe-chúi ē phuh pe̍h pho, peh-sèⁿ kiaⁿ kah mn̂g-thang lóng koaiⁿ tiâu-tiâu.
Hit-tang-chūn ū 1 ê siàu-liân-ke, i chhut-sì tī ông-cho̍k, êng-hôa hù-kùi i lóng ū; m̄-koh i ê sim-lāi put-sî teh siūⁿ-kóng, “Chò kok-ông, nā-sī bô-hoat-tō͘ hō͘ peh-sèⁿ kòe hó ê seng-oa̍h, án-ne ná ū siáⁿ-mih ì-gī?”
I to̍h án-ne hòng-khì ông-ūi, lī-khui kiong-tiān, ta̍p-ji̍p chhim-soaⁿ siu-hēng, siūⁿ beh tui-kiû chin-lí. I chi̍t-lō͘ óng pak kiâⁿ, kiâⁿ-kàu tà bông-bū ê Bú-tong-san.
Bú-tong-san hia, soaⁿ koân chúi léng, chúi-chhiâng ná chhiūⁿ pe̍h-lêng teh poe, hong-siaⁿ ná chhiūⁿ béng-hó͘ teh háu. Soaⁿ--lìn lāu tō-jîn kā i kóng: “Siàu-liân-lâng nā-sī siūⁿ beh tit-tō, to̍h ài seng chám-toān hoân sim; nā-sī siūⁿ beh siú-hō͘ thian-hā, to̍h ài seng iâⁿ-kòe ka-tī.”
I thiaⁿ liáu, to̍h tī soaⁿ-téng khí chháu-chhù, tòa tī hia siu-hēng. Kôaⁿ-thiⁿ lo̍h-seh, i thia̍p-kha chē; joa̍h-thiⁿ sai-pak-hō͘, i mā bô cháu. Soaⁿ--lìn ê mô͘-sîn-á piàn-chò bí-lú, piàn-chò béng-siù, beh lâi chhì-thàm i ê chhit-chêng-lio̍k-io̍k, m̄-koh 10 gōa tang kòe--khì, i ê sim tiāⁿ kah ná chhiūⁿ chio̍h-thâu, lóng bô tín-tāng.
Put-jî-kò, sim-mô͘ sī 1 ê tōa khó-giām. Ū 1 mî bāng-tiong, i koh tńg-khì ông-kiong, kim-tiān gio̍k-kai, bān-bîn kūi-pài. Ū khoân ū sè ê sóng-khoài to̍h chhin-chhiūⁿ hái-chúi kiōng beh kā i im--khì, to̍h tī i hoân-sim beh koh-chài khí ê sî-chūn, i khòaⁿ-tio̍h thiⁿ-téng ê Pak-ke̍k-chhiⁿ, iu-goân ko͘ 1 lia̍p koân-koân tī hia lóng bô tín-tāng, hiông-hiông kak-ngō͘ tio̍h kóng, “Siú it put-piàn, chiah ē tìn bān-siōng.”
Bāng chhíⁿ liáu-āu, i iōng kiàm ōe tē, chiù-chōa kóng: “Nā-sī ūi-tio̍h peh-sèⁿ, góa goān-ì iōng ka-tī ê seng-khu khì tìn thian-hā ê iau-mô͘ kúi-koài.” Tui-kiû tāi-tō ê sim, ùi chit-chūn khai-sí kian-tēng kah ná chhiūⁿ thih.
Ū 1 ê àm-mî, thiⁿ-o͘-o͘, thàu-hong-lo̍h-hō͘. Hut-jiân-kan, soaⁿ-kok lāi-bīn, 1 bóe tōa-chiah chôa chhiong--chhut-lâi, gán-sîn chhin-chhiūⁿ hóe. Chhim thâm lāi-té, 1 chiah tōa-chiah ku phû chhut chúi-bīn, ku-khak kāu kah ná chhiūⁿ soaⁿ.
Chôa hoah siaⁿ chhin-chhiūⁿ tân-lûi-kong: “Hoân-jîn, chia sī lêng-san pó-tē, sok-sok lī-khui chhú tē!” Ku háu siaⁿ ná chhiūⁿ chò-hong-thai: “Lí siu-hēng khì keng-tōng tio̍h chúi-me̍h, kai-tong siū-hoa̍t!”
Siàu-liân-ke gia̍h kiàm, bô thè kah pòaⁿ pō͘, kóng: “Góa siu-tō, sī ūi-tio̍h beh tìn-siâ kiù-lâng. Nā-sī lín beh chò-pháiⁿ, kin-á-ji̍t lán to̍h hun su-iâⁿ!” Lûi-kong kòng kó͘, sih-nah ōe thiⁿ, chôa-iáⁿ ná chhiūⁿ o͘-liông phah-phún, ku-khak ná chhiūⁿ chio̍h-piah tòng-lō͘, 3 mê 3 ji̍t, phah kah o͘-thiⁿ-àm-tē.
M̄-koh siàu-liân-ke lóng bē kiaⁿ, i khòaⁿ chhoaih che ku chôa, pún-té sī thian-tē lêng siù, to̍h sī in-ūi siâ-khì ji̍p-sim, chiah ē khí lia̍h-kông. I bô chám--in, tian-tò sī iōng chin-khì ka chēng, ta̍uh-ta̍uh-á, chôa ê gán-sîn piàn chheng, ku ê chhoán-khùi piàn ún. Chòe-āu, ku chôa phak tī thô͘-kha, tâng-chê kóng: “Gún goān-ì tui-sûi--lí, siú-hō͘ chèng-tō.” Chhú-āu, ku chôa chiâⁿ chò hō͘-hoat chiong-kun, āu--lâi sè-kan-lâng chheng-ho͘ in sī ku chôa lióng chiòng.
Put-jî-kò, jîn-kan iah-bē an-lêng, siàu-liân-ke chin-chiàⁿ ê khó-giām, chit-chūn chiah beh khai-sí niā-niā.
Pak-hong siōng kôaⁿ ê só͘-chāi, ū 1 ê bān-tāi-nî ê mô͘-ông—O͘-soah, tìn-soah ê hong-ìn khì ho͘ lēng--khì, iau-koài chhut-chhut-ji̍p-ji̍p, chng-á-thâu hóe-sio-chhù, khe-chúi chhoah-lâu, peh-sèⁿ ai-pē-kiò-bó.
Siàu-liân-ke kah ku chôa lióng chiòng lo̍h-soaⁿ beh khì chhú-lí. Chiàn-tiûⁿ tī khe-hōaⁿ piⁿ, iau-peng ná chhiūⁿ têng-têng-tha̍h-tha̍h ê éng. O͘-soah khiā tī o͘-hûn téng, léng-léng-á chhiò kóng: “Siu-tō-jîn, lí káⁿ tòng--góa?” Siàu-liân-ke pêng-pêng-chēng-chēng ka ìn kóng: “Góa m̄-sī ūi-tio̍h miâ-siaⁿ, sī ūi-tio̍h peh-sèⁿ.”
Chiàn-kó͘ hiáng-khí! Ku chiòng kā i ê seng-khu hòa chò bān-tn̄g koân, tòng kui-kūn ê iau-koài; chôa chiòng poe chiūⁿ thiⁿ se̍h, kā mô͘-sîn-á ká kah chhùi-iâm-iâm, siàu-liân-ke 1-ē-á to̍h ùi O͘-soah ti̍t-ti̍t chhiong--khì.
Thiⁿ-tē hut-jiân-kan tian-tò-péng, se̍h kòe-lâi se̍h kòe-khì, hoàn-kéng têng-têng, ông-ūi, khoân-sè, êng-hôa, hù-kùi, choân-pō͘ lóng phû-hiān chāi gán-chêng. M̄-koh siàu-liân-ke ē-kì-chit Pak-ke̍k-chhiⁿ, sim mā o̍h Pak-ke̍k-chhiⁿ, 1-tiám-á iô-choah to bô. I 1 kiàm kā hoàn-kéng ōe--phòa, koh-chài iōng Hiân-thian-ìn kā O͘-soah tìn-ap tī pak-hong sng kôaⁿ seh tàng ê só͘-chāi, sòa--la̍k-khì thiⁿ-tē to̍h khoe-ho̍k kong-bêng. Peh-sèⁿ kūi lo̍h-tē, hán-hoah i ê miâ-hō—Chin-bú! Āu--lâi lâng to̍h chun-chheng i kiò Chin-bú-tāi-tè.
Kong-tek chìn-tōng sam-kài. Thian-têng ê tōa-mn̂g khui--khui, hûn-hê ê kng kui bān tiâu, kûn sian lia̍t pan, Gio̍k-hông-tāi-tè tùi siàu-liân-ke soan-chí, kóng: “Lí tī Bú-tong siu-hēng, siu-ho̍k ku chôa, pêng-tēng mô͘-loān. Kin-á-ji̍t chhek-hong lí chò Pak-ke̍k Hiân-thian-siōng-tè, tìn-siú pak-hong, hō͘-iū jîn-kan.”O͘-phâu ka-sin, chheⁿ-kng tńg se̍h, ku chôa khiā tī siang-pêng, siàu-liân-ke ùi hoân-jîn siu-tō, chòe-āu piàn-chò tìn pak chi sîn.
Pêng-iú--ah, che kò͘-sū kóng kàu chia, m̄-sī kà lán ài phah iau-koài, chin-chiàⁿ ê iau, ū-sî tī gōa-bīn, ū-sî tī lán sim-lāi.
Nā-sī sim chhiūⁿ Pak-ke̍k-chhiⁿ hiah-nī kian-tēng; nā-sī ì ná Hiân-bú hiah-nī tìm-táu; lán múi 1 ê lâng, lóng ē-tàng siú-hō͘ ka-tī ê thiⁿ-tē.
Àm-mî nā-sī giâ thâu khòaⁿ-thiⁿ, hit lia̍p lóng bē tín-tāng ê chhiⁿ, to̍h sī Hiân-thian-siōng-tè siú-hō͘ lán ê só͘-chāi.
