一碗無法走去芽菜的米線(粵文)

可能我真係太過政治敏感，食餐Lunch都諗起呢個六月發生嘅事… …

我已經講咗三次，我要走芽走韭，點解佢係都唔回應我訴求。

一開始去買嘅時候已經同收銀講好，走芽走韭，飛都寫埋，不過個收銀都同我講，去到畀飛個陣提一提佢哋。之後同收飛嗰個講，佢又自己同自己講就算，不過煮嗰個係佢身邊唔敢一個身位，實聽到，而且客又得三四個，無問題喇。

到我個時，我見個阿姐仲未落料，都提多次收飛嗰個阿姐，佢都係人肉錄音機，播完就算，都無所謂，做到就得喇。點知煮嘅阿姐，一pet嘢咁噠落嚟嘅即……你估你啲芽菜係打火鍋打邊爐個啲咩正嘢咩，好難食架！

坐低，一pet夾走大部份，仲有好多陰陰濕濕嘅邊夾邊食，未食完半碗手都開始抽筋，我知呢個係我手勢問題，但做咗十幾年人，我都唔想改變自己嘅生活習慣，所以我先想走芽走韭，唔好搞到自己食餐飯都咁燥咁倦……

跟住之後又有啲旁邊鶴嚟料，又話你唔環保，浪費食物，我都唔想反駁。直到個到啲員工經過，仲加多一句：

「細佬，你唔食就叫人唔好落呀嘛。」

呢下真係火都嚟，唔知邊個搞出嚟嘅呢？我真係想成碗車埋佢到！

不過，咁做就會變得係我錯，因為好明白呢個唔係和理非嘅做法，係鏡頭前做咩都好，一定要理性、非暴力、和平解決。

但佢講完之後就走咗去，我搵邊個嚟投訴？同嘛投訴啲咩？話佢出言不順態度唔好呀？佢個名牌仲要只係寫住「訓練員工」……

咁即係點呀？仲有其他人呢，路過見我夾走啲芽菜就話我浪費食物，佢哋知唔知啲芽菜唔係我要落架！我講咗唔好架喇，係佢哋無溝通一嘢噠落嚟架。仲有……你估碗嘢平架？成到兩餐M記架喇，咁受氣我去食垃圾薯條，條氣都順啲呀！

然後最重要、最緊要嘅係……

我聽日都繼續食，除非我用我嘅人生嚟反抗呢個暴政喇，或者絕食。因為我身處係荒山野領，Uber eat都救唔到我。我亦都唔會搞到食份lunch要成百幾蚊……香港人……唉……

【以上內容，全部虛構，如有雷同，實屬借刀】

賣書時間：(不包運費)

《DSE幻想校園(一) ─ 從這裡開始》 (第一冊 連載小說)

《錯的人生，對的人》 (一冊全完)